Bibliaca ¿imatata shamuj punllacunamandaca yachachin?
Shamuj punllacunapica imashinashi causashun nishpa tapuripashcanguichu. Bibliapica, cai mundopi importante cosascuna ñalla pasanatami villajun.
Diospa Gobierno imahora chayamunata yachachunmi, imacunalla pasanata Jesusca villarca (Lucas 21:31). Jesusca nircami: Shamuj punllacunapica jatun guerracunapash, terremotocunapash, yarjaipash, millai ungüicunapash tianga nircami. Tucui chaicunami cunanbica pactarijun (Lucas 21:10-17).
Shinallata Bibliapica, cai tucurimui punllacunapi, gentecunapa gobiernocuna mandajujpica gentecunaca nalicunami canga ninmi. Caitaca Bibliapi, 2 Timoteo 3:1-5ta liipangui. Cunanbi gentecuna imashina cajta, imacunatalla rurajta ricushpami chai textocunapi shimicuna pactarijushcata ricupanchi.
Bibliapa nishcacuna pactarijujta ricushpami Diospa Gobierno ñalla cai alpapi jatun cambiocunata rurashpa, ali causaiguta apamunata yachapanchi (Lucas 21:36). Bibliapica, gentecunamandapash, cai alpamandapash ali cosascunata Taita Dios ruranatami villajun. ¿Imacunatallata ruranga?
SHUJ ALI GOBIERNOMI TIANGA
‘Tucui gentecuna, tucui llactacuna, shuj shuj rimaita rimajcuna paita servinajuchunmi, mandai ushanatapash, alicachi tucunatapash, mandana llactatapash [Jesusman] curca. Paipaj mandanaca, causaita causaicaman na tucurij mandanami, pai mandana llactaca napacha tucuchi tucungachu’ (DANIEL 7:14).
¿Imatata nisha nin? Diospa Gobierno cai alpapi mandajpimi tucuicunaca cushilla causashun. Diospa Gobiernopica Jesusmi Rey can.
UNGÜICUNACA ÑANA TIANGACHU
“Chaipi causajcunaca, pipash na: “Ñucaca huañujunimi” ninajungachu” (ISAÍAS 33:24).
¿Imatata nisha nin? Shamuj punllacunapica imapash ungüicunataca na charishunllu. Shinallata para siempremi causaita ushashun.
TRANQUILO ALI CAUSAIMI TIANGA
‘Cai pacha tucui manñacunacaman jatun macanajuicunata’ tucuchinga (SALMO 46:9).
¿Imatata nisha nin? Shamuj punllacunapi guerracuna ñana tiaimandami para siempre tranquilo ali causashun.
CAI ALPAPICA ALI GENTECUNALLAMI CAUSANGA
“Nali runaca illangami. [...] na jariyajcunami, llactataca [o alpataca] japinga” (SALMO 37:10, 11).
¿Imatata nisha nin? Nali gentecunaca ñana tiangachu. Cai alpapica Taita Diosta cazuj gentecunallami causanga.
CAI ALPACA SHUJ JUYAILLA PARAISOMI TUCUNGA
“Huasicunata shayachishpami, chaipi causanajunga. Uvas chagrata tarpushpami, chaipi fucushcata micushpa causanajunga” (ISAÍAS 65:21, 22).
¿Imatata nisha nin? Cai alpaca juyaillagumi tucunga. Taita Diosca, ñucanchi mañashcashnami paipa munaita cai alpapi pactachinga (Mateo 6:10).
Cai temacunata ashtahuan liipai
BIBLIAPA TAPUICUNA
Taita Diospa Gobiernoca ¿imacunatallata ruranga?
Taita Diospa Gobierno cai alpata mandajpi imacunalla pasanata ricupai.
