Bibliata yachajunaca gentecunapa causaita cambiai ushanmi. Bibliapa shimicuna imashina Ricardota, Andrestapash ayudashcata ricupashun.

RICARDO. 15 huatacunata charishpaca shuj pandillamanmi yaicurcani. Ñuca amigocunaca nalicunatalla ruranatami yachachihuarca. 10 huatacunatallapash carcelpi cangapami munarcani. Ñuca llactapica carcelpi cashca gentecunatami ninanda respetan carca. Chaimi paicunashna cangapaj munarcani.

Shuj shuj huarmicunahuanmi puñun carcani. Drogatapashmi chupan carcani, millai millaimi carcani. Shuj tutaca shuj jatun macanajuipimi carcani. Ña huañugrini yarcanimi, shinapash na imapash pasahuarcachu. Chaimi cambiangapaj munaimanda, ñuca causaipi pensarircani. Shinapash ¿imatata rurana cani? ¿Pita ayudai ushahuanga? yarcanimi.

Ñuca familiacunaca ashtaca problemacunahuan, llaquillami causan carca. Shinapash ñuca mamitapa turica, paipa familiahuanga ali, cushillami causan carca. Paicuna Bibliapi mandashcacunata pactachishpa causajtami yacharcani. Paicunaca Taita Diospa shutica Jehová * cashcatami yachachihuarca. Chaimi chai jatun macanajuimanda huaquin punllacuna jipalla Jehová ayudahuayari nishpa mañarcani. Shuj punlla jipallami, shuj testigo de Jehová ñuca huasiman shamurca. Na crinayaimi carca. Paihuanmi Bibliata yachajui callarircani.

Bibliata yachajui callarishca jipallami, ñucapa punda amigocunaca paicunahuan llujshichun telefonopi cayamun carca. Shinlli cajpipashmi paicunataca na nircani. Bibliata yachajushpa catingapami munarcani. Chai decisionda japishcamandaca, na arripintirinichu. Ñuca causaipica ashtaca cosascunami cambiashca, cunansi cushillapachami causani.

Shuj pandillapi respetashca cangapaca 10 huatacunatapash carcelpi yalishalla yarcanimi. Chaimi Diostaca 10 huatacunatallapash paita sirvishpa, shuj gentecunata Bibliamanda yachachingapaj saquihuai nishpa mañarcani. Bibliapa nishcacuna, gentecunata ñucatashna ayudachunmi munarcani. Chai mañaitaca Taita Diosca uyahuashcami, cunangamanga 17 huatacunatami Taita Diosta sirvijushcani. Cierto, carcelpica imahorapash na carcanichu.

Ñuca punda amigocunamandaca, huaquingunaca carcelpimi can. Huaquingunacarin ñami huañushca. Ñuca testigo familiacunataca na shujcunashna cashcamanda, Bibliapa nishcacunata pactachishcamandami agradicini. Paicunataca ni shuj pandillerotapash na respetashcatami, respetani. Ashtahuanbachaca ali causaiguta charichun ayudashcamandami Jehovata agradicini.

 ANDRÉS. Pobrella pushtupimi causarcani. Chaipica drogata jatujcuna, huañuchijcuna, imatapash nishpa rurashpa umachijcuna, culquipajlla puñuj huarmicunami tiarca. Ñuca taitaca machashpalla, cocaína drogata chupashpallami causan carca. Ñuca taitamamacunaca macanajushpallami causan carca.

Huambralla cashpami tragota ufianata, drogata chupanata yachajurcani. Shuhuashpa, shuhuashcata jatushpami purin carcani. Huaquin huatacuna jipaca, ñuca taitaca ali llevaringapaj munaimandami drogata, nali cosascunata llactapi jatungapaj, pacalla yaicuchinata yachachihuarca. Chaita rurashpallami ashtaca culquita ganai callarircani. Shuj punllaca ñuca huasiman policiacuna shamushpami, carcelman apahuarca. Pitachari huañuchingapami munashca nishpami 5 huatacunapa sentenciahuarca.

Shuj punllaca Testigocuna, carcelman Bibliamanda parlangapaj shamunatami uyarcani. Chaimi chaita uyangapaj rircani. Paicuna cabalta parlashcamandami Bibliata yachajui callarircani. Testigocunaca Bibliapi, Taita Dios imata mandashcatapachami yachachihuarca.

Ñuca causaipi cambiocunata rurana cashcatami cuenta japircani. Bibliata yachajujujta ricushpaca chaishuj prezocunaca imacunatapash nishpami manllachihuarca. Chaimi Jehová Diosta ali yachaita carahuai, aguantangapaj fuerzata cuhuai nishpa mañarcani. Shinami na manllashpa chaishuj prezocunamanga imata yachajujushcata parlarcani, imata ninajujpipash aguantai usharcani.

Carcelmanda llujshina horaspica ninandami manllanayarca, ratotaca quedanshnami yarihuarca. Llujshijujpica huaquingunaca cayacaman, shujcunacarin “tuparishun, hermanito” nihuarcami.

Ñuca causaipi Taita Dios, na ayudachun saquishpaca maipicha caiman carcani. Jehová Diostaca ñucata juyashcamanda, pacienciata charishcamandaca ninandami agradicini. *