Ester 2:1-23
2 Chaicuna pasashca jipaca, rey Asueropa culira yalijpimi, reina Vasti imata rurashcataca cutin reyca yarirca. Shinallata paita castigangapaj imata decidishcatapashmi yarirca.
2 Chaimi reypa ayudante personalcunaca paitaca cashna nirca: “Reymanga jarihuan nara cashca juyailla joven huarmigucunatami mascana can.
3 Reyca pai mandajushca tucuilla provinciacunapimi shuj jaricunata agllana can. Chai jaricunami, jarihuan nara cashca tucuilla juyailla huarmicunata, palacio de Susapi tiashca huarmicunapa huasipi* tandachina can. Chai huarmigucunata cuidangapami Hegái runaca a cargo quidana can. Shinallata chai huarmigucunaca ashtahuan juyaillagucuna tucungapami tratamientocunata* chasquina can. Hegaica reypa sirvientemi* can y huarmicunapa guardiami can.
4 Shinami rey ashtahuan gushtashpa ricushca huarmiguca, reina Vastipa randi reina tucuna can” ninajurcami. Chai nishcata rey alicachishpa uyaimandami, chai consejotaca catirca.
5 Mardoqueo shuti judío runaguca palacio de Susapimi sirvijurca. Mardoqueoca Jaír runapa churimi carca. Shinallata Simeí runapa nieto y Quis runapa bisnietomi carca. Quis runaca benjaminitami carca.
6 Paica* Judá llactamanda rey Jeconiashuan* Babiloniaman apai tucushca gentecunapurapimi carca. Rey Jeconiastami, Babilonia llactamanda rey Nabucodonosorca prezo apashcarca.
7 Taita y mama illa quidajpimi, Mardoqueoca paipa prima* Hadassá* huarmigutaca cuidarca.* Hadassaca Estermi carca. Esterca juyaillagupachami carca. Paipa taitamamacuna huañujpimi, Mardoqueoca paipa ushigutashna Estertaca viñachirca.
8 Rey imata ordenashcata y pai llujchishca leyta gentecuna uyashpaca, ashtaca joven huarmigucunatami palacio de Susamanga aparca. Chai huarmicunata cuidachunga Hegái runatami churarca. Paimi huarmicunapa guardia carca. Estertapashmi reypa huasiman* aparca y paitapash Hegái runa cuidachunmi churarca.
9 Ester huarmiguca Hegái runapa ñaupapica alimi ricurirca. Alicachishpa* ricuimandami Hegái runaca Ester ashtahuan juyaillagu ricurichun tratamientocunata* chasquichun uchalla encargarirca. Shinallata ali micunacunata chasquichunbashmi encargarirca. Estermanga reypa huasimanda ashtahuan mejor 7 sirvientacunatapashmi curca. Chai jipaca, Esterta y paipa sirvientacunatapashmi huarmicunapa huasipa* ashtahuan mejor pushtuman aparca.
10 Esterca paipa pueblomanda y paipa familiamandapash nimata na parlarcachu. Chaitaca pimanbash na parlanachu cangui nishpa Mardoqueo mandashcamandami shina rurarca.
11 Mardoqueoca cada punllami huarmicunapa huasi* patio frenteta yalin carca. Paica Ester imasha cashcata yachangapaj y paihuan ima pasajushcata yachangapami chaitaca ruran carca.
12 Joven huarmigucunaca turnarishpami rey Asueropa ñaupapi presentarin carca. Pero reypa ñaupapi nara presentarishpallatami, ashtahuan juyaillagu tucungapaca 12 quillacunata shuj tratamientota* cada uno catina carca. Cai tratamientota catingapaca, 6 quillacunataca aceite de mirra nishcatami churarina carca. Cutin chaishuj 6 quillacunataca aceite balsámico nishcata y huaquin cremacunatami churarina carca.
13 Chai jipami joven huarmiguca reypa ñaupapi presentaringapaca ña lista carca. Joven huarmiguca huarmicunapa huasimanda* reypa huasiman ña rigrijushpaca, ima munashcatami mañan carca. Chaimi pai imata mañashcata cun carca.
14 Joven huarmiguca chishi, reypa huasiman yaicushpaca, tutamandatami llujshin carca. Llujshishca jipaca huarmicunapa chaishuj huasimanmi* yalin carca. Chai huasipica reypa sirviente* Saasgaz runami a cargo carca. Paimi chaishuj huarmicunapa* guardia carca. Joven huarmiguca rey ninanda alicachishpa,* shutipi cayachun cachajpillami reypamanga cutin tigran carca.
15 Reypa ñaupapi, Ester presentarina horas chayajpica, Esterca Hegái runa imata mañachun nishcatallami mañarca. Hegái runaca reypa sirviente* y chaishuj huarmicunapa* guardiami carca. (Chai tiempopica tucuicunami Estertaca ninanda juyan carca). Esterca Abihail runapa ushimi carca. Abihail runaca Mardoqueopa tiomi carca. Esterca Mardoqueopa viñachi ushimi carca.
16 Rey Asuero 7 huatacunata mandajujpimi, Estertaca reypa palaciopi reypamanga pusharca. Décimo quillapimi pusharca. Décimo quillaca tebet* shuti quillami carca.
17 Tucuilla chaishuj huarmicunatapash yalimi rey Asueroca, Estertaca juyai callarirca. Jarihuan nara cashca chaishuj huarmicunatapash yalimi Esterca reypa ñaupapica ali ricurirca. Y Estertami reyca ashtahuanbachaca gushtashpa* ricurca. Chaimi reyca, Esterpa umapi reinacuna churajuna adornota* umapi churachirca. Shinami Esterca reina Vastipa randi reina tucurca.
18 Reyca paipa tucui principecunaman y tucui sirvientecunamanmi shuj jatun micuita rurarca. Chai jatun micuica Estermandami carca. Reyca provinciacunamanda gentecunatapash libre* saquichunmi mandarca. Shinallata reylla caraita ushashca regalocunatapashmi carajurca.
19 Por segunda vezmi jarihuan nara cashca huarmigucunataca* tandachirca. Chai horasca Mardoqueoca reypa palacio pungupimi tiajurca.
20 Esterca Mardoqueo mandashcashnallatami paipa familiamandapash y paipa pueblomandapash nimata na parlarca. Esterca, Mardoqueo paita cuidajushca tiempopishnallatami cazushpa catirca.
21 Chai punllacunapica Mardoqueoca reypa palacio pungupimi tiajurca. Chai punllacunapica, Bigtán y Teres shuti ishcai funcionariocunaca* ninanda culirashca caimandami, reyta huañuchingapaj* munashpa parlarinajurca. Paicunaca reypa huasipi trabajaj porterocunami carca.
22 Chaita Mardoqueo yachaj chayashpaca chai ratomi reina Esterman villarca. Chaimi Esterca Mardoqueopa shutipi reymanga villarca.
23 Chai cierto o na cierto cashcata yachangapami investigarca. Tiempohuanga cierto cashcatami yachaj chayarca. Chaimi chai ishcandi runacunaca jatun racu caspipi* huarcui tucurca. Chaitaca reypa ñaupapimi, chai tiempocunapi ima pasajushcata escribina libropi escribirca.
Notacuna
^ Caica reypa huarmicunapa y reypa concubinacunapa cuartocunami carca.
^ O “masajecunata”.
^ Hebreo shimipica “eunuco” nijunmi. Glosariopi “eunuco” shimita ricupangui.
^ Caipica Quis runamanda o Mardoqueomandami parlajun yarin.
^ 2 Reyes 24:8pica Joaquín nijunmi.
^ O “paipa taitapa huauquipa ushi”.
^ Ester shutitami hebreo shimipica Hadassá nin. Cai shutica ‘mirto’ nijunmi.
^ O “tutor carca”.
^ O “palacioman”.
^ O “amor leal”.
^ O “masajecunata”.
^ Caica reypa huarmicunapa y reypa concubinacunapa cuartocunami carca.
^ Caica reypa huarmicunapa y reypa concubinacunapa cuartocunami carca.
^ O “huaquin masajecunata”.
^ Caica reypa huarmicunapa y reypa concubinacunapa cuartocunami carca.
^ Caica reypa huarmicunapa y reypa concubinacunapa cuartocunami carca.
^ Hebreo shimipica “eunuco” nijunmi. Glosariopi “eunuco” shimita ricupangui.
^ Hebreo shimipica “concubina” nijunmi. Glosariopi “concubina” shimita ricupangui.
^ O “gushtashpa”.
^ Hebreo shimipica “eunuco” nijunmi. Glosariopi “eunuco” shimita ricupangui.
^ Hebreo shimipica “concubina” nijunmi. Glosariopi “concubina” shimita ricupangui.
^ Apéndice B15ta ricupangui.
^ O “amor leal”.
^ O “turbanteta”.
^ O “amnistía”. Cashna nishpaca impuestocunata na paganamanda, cuartelman na rinamanda, huaquin prezocunata libre saquinamandami parlajun. Shinallata caicunamanda shuj o ishcaitalla ruranamandami parlajun.
^ O “joven huarmigucunataca”.
^ O “ishcai oficialcunaca”.
^ Hebreo shimipica “maquita churangapaj” nijunmi.
^ Glosariopi “jatun racu caspi” shimita ricupangui.
