Causaimanda parlashpaca huaquingunaca cashnami tapurishca: “¿Imashpashi caipi canchi?” o “Ñucanchi causaihuanga ¿imashi pasanga?”. Bibliapica Taita Diospa amigo cangapami causanchi ninmi. ¿Imamandata shina nin? Biblia ima nijta ricupashun.

•   Taita Diosmi ñucanchitaca rurarca. Bibliapica Taita Diosmi “ñucanchitaca rurarca. Ñucanchica, na ñucanchimandallata rurarishcachu canchi” ninmi (Salmo 100:3; Apocalipsis 4:11).

•   Tucuita ruraj Taita Diosca pai munashcashna causachun munashpami tucui ima tiashcatapash, gentecunatapash rurarca (Isaías 45:18).

•   Taita Diosca ñucanchita rurashpaca paimanda ‘yachajuna munaita’ charina yuyaihuanmi rurarca. Chaimandami imashpa causajushcata yachana munaita charinchi (Mateo 5:3). Chaita yachachunmi Taita Diosca munan (Salmo 145:16).

•   Diosmanda yachajungapaj munaita charishpaca Taita Diosta rijsingapaj, paipa amigo tucungapami esforzarinchi. Chaita ruranaca na shinllichu can. Chaimi Bibliapica cashna nin: “Taita Diospaman quimirichi. Shina quimirijpica, paipash cangunapaman quimiringami” nishpa (Santiago 4:8; 2:23).

•   Taita Dios munashcashna causashpallami paipa amigo caita ushashun. Taita Diospa munai maijan cashcataca Bibliapimi ricuchin. Bibliapica “Taita Diosta manllangui, pai mandashcacunatapash pactachingui” ninmi. “Runacunapaca, chaita ruranami tucuita yali ashtahuan ali” ninbashmi (Eclesiastés 12:13).

•   Jipa punllacunapica Taita Diosca llaquicunata tucuchishpami paita sirvijcunamanga para siempre causaiguta cunga. Chaipimi Taita Diospa munaica pactaringa (Salmo 37:10, 11).