Apocalipsis (o Revelación) 13:1​pi parlashca 7 umacunata charij manllanai sacha animalca cai mundopi tiashca gobiernocunatami ricuchin.

•   Cai textopi shuj gobiernomanda parlajujtaca alimi yachapanchi. Porque shuj gobiernollami poderta, mandangapaj tiarina pushtuta y ashtaca autoridadta charin (Apocalipsis 13:2).

•   Chai gobiernoca shuj llactamanda gobiernollaca na canllu. Porque Bibliapica cai mundopi gobiernocunamanga “tucui jatun familiacunata, tucui pueblocunata, tucui idiomacunata parlaj gentecunata y tucui llactacunata mandana autoridadtami chasquirca” ninmi (Apocalipsis 13:7).

•   Daniel 7:2​manda 8​camanga chuscu manllanai sacha animalcunamandami parlan. Shujca leopardo nishca animalshna cashcata, shujca ososhna, shujca leonshna cashcata y cutin shujcarin 10 cachocunata charishcatami nin. Chai chuscu sacha animalcunata shujllapi tandachishcatami Apocalipsis libropica 7 umacunata charij manllanai sacha animal cashcata nin. Profeta Daniel parlashca chuscu manllanai sacha animalcunaca “jatun mandajcunata”, jatun llactacunatami ricuchin. Y chai llactacunaca shuj shuj tiempocunapi mandashcatami ricuchin (Daniel 7:17, 23). Caita ricushpami Apocalipsis capítulo 13​pi parlashca 7 umacunata charij manllanai sacha animalca gobiernocunata ricuchishcatami yachapanchi.

•   Chai sacha animalca ‘mar yacumandami’ llujshirca. Chaica cunan punllacunacaman gentecunata mandashpa shamushca gobiernocunatami ricuchin (Apocalipsis 13:1; Isaías 17:12, 13).

•   Bibliapica chai manllanai sacha animalpa numeroca 666 cashcatami nin. Chai numeroca ‘gentepa número’ cashcatami ricuchin (Apocalipsis 13:17, 18). Cai manllanai sacha animalca demoniocunataca na ricuchinllu, sino cai alpapi gobiernocunatami ricuchin.

 Cai mundopi gobiernocunaca shuj shuj cosascunamandami na unidos can. Shinapash paicuna autoridadta charingapaj munaimanda y Taita Diospa Gobiernota na cazungapaj munaimandami shujllashna tandanajushca can (Salmo 2:2). Chai gobiernocunami Armagedón punllapi shujllashna tandanajushpa Jesucristohuan y paipa soldadocunahuan macanajungapaj shayaringa. Shinapash mishaitaca na ushangachu, paicunaca tucuchi tucungami (Apocalipsis 16:14, 16; 19:19, 20).

‘10 cachocunata y 7 umacunata’ charij manllanai sacha animal

 Manllanai sacha animalpa 10 cachocuna y 7 umacunaca ¿imatata ricuchin? Apocalipsis capítulo 13​pillatami ‘sacha animalpa estatuamanda’ parlan. Chai sacha animalpa estatuaca puca puca color cashcata, shinallata 7 umacunata y 10 cachocunata charijtami ricuchin (Apocalipsis 13:1, 14, 15; 17:3). Caicunamanda parlashpami Bibliapica chai sacha animalpa umacuna y cachocunaca gobiernocuna cashcata ricuchin (Apocalipsis 17:9, 10, 12).

 Shinallata Apocalipsis 13:1​pi parlashca, manllanai sacha animalpa 7 umacunaca cai mundopi gobernashca 7 jatun llactacunatami ricuchin. Chai llactacunaca Jehová Diospa llactataca ninandami llaquichishca. Chai llactacunaca Egipto, Asiria, Babilonia, Medopersia, Grecia, Roma y Reino Unido y Estados Unidos llactacunami can. Shinapash ¿imashpata chai manllanai sacha animalca 10 cachocunata charin? Bibliapica numerocunapash shuj significadota charijtami ricuchin. Por ejemplo, número 10​ca tucui completo cashcatami ricuchin. Shinaca 10 cachocunata charij manllanai sacha animalca cai alpapi tiashca tucuilla gobiernocunatami ricuchin. Shinallata chai sacha animalpa cachocunapi coronacunata churajushca cashcatami ricuchin. Chaica chai 7 jatun llactacuna gobernajuj tiempopillata, chai tucuilla gobiernocunapash al mismo tiempo gobernajushcatami ricuchin.