Caran huatai intiru mundumanda ashca tucui timpu Diosta sirvijcuna Watchtower Galaad Bibliamanda Escuelama cumbirashca anun. Cai escuelara charinunmi Centro Educativo Whatchtower Patterson (Nueva York) a llactai. Cai escuelai yachanun paiguna asignaciongunara alira pactachingaj Jehovahuaj organizaciombi. Cai yachachishcauna yanapanun congregaciongunara shinzhiyachingaj ñaupajma catinuchu shinallara intiru mundui tiaj sucursalgunara.

 Galaad nishca Escuela intiru mundumandami an. 2019 clase 147 nishcai 56 graduajcuna 29 llactaunamanda anuca. Galaad Escuelama cumbirashcauna Betelitaguna, Tandarijcunara Cuirasha Purijcuna, misioneroguna, precursores especiales nishca anun.

 Cai escuelamanda ñaupa punda clase manara callarijllaira ashca timpuhua puruntunun. Estados Unidos llactai tiaj Betel Rinaunamanda Oficina aviombi rina boletogunara randinun cai escuelama cumbirashcauna ringahua. Clase 147 nishcama ringahua, huaquimbi pasaje valica caran shujpaj 1.075 dólares Patterson llactama pactangaj, tigrangaj. Islas Salomonmanda yachaujcuna chuscu cuti avionda apina anuca Patterson llactama pactangaj, shinallara tigrangaj quinsa cuti avionda apina anuca. Rinandi, trigranandi 35.400 kilómetros tupu rina anuca (22.000 millas). Caran cai aviombi rina boleto 2.300 dólares valica. Mana ashca cullqui gastangaj cai Rinaunamanda Oficina pishi valij boletogunara randinun, shu programa informático nishca utilizasha Internetpi mascanun. Ña boletora mascashca huasha cai programa semanaguna, quillaunas mascasha catin mas pishi valij boletogunara randingaj. Shinallara aereolíneas cushca creditogunara, millas de viajero frecuente nishcara utilizanun boletogunara randingaj.

 Ashca yachaujcuna Estados Unidos llactama icungaj shu visa ministinun. Chiraigu Intiru Mundui Pushaj Oficinamanda Departamento Jurídico nishca shu llactama estudiangaj visa charinuchu yanapan. Cai tramitegunara rurangaj caran shujpaj huaquimbi 510 dólares valin.

 ¿Imasnara ñucanchira yanapan paiguna yachashcamanda? Hendra Gunawan Sureste Asiático partii tandarijcunara cuiraj cuinta sirvin. Pai sirviushca congregaciombi Galaad Escuelai graduaj casarashcauna tianun. Pai nin: “Ñucanchi congregaciombi precursores regulares mana tianuca. Shinajpi cai casarashca congregacionma pactashca huasha paiguna cushihua Bibliamanda yachachij ashcaraigu shujcuna precursorado apinuca. Timpu huasha ñucanchi congregacionmanda shu pani Diospa Mandanamanda Yachachisha Purijcunahua Escuelama rica”.

 Sergio Panjaitan Galaad Escuelamanda graduashcaunahua pariju tarban shu sucursal Sureste Asiático partii. Pai nin: “Paiguna apishca yachachishcara mana paigunajllara shu bendición aca, astaumbas ñucanchij shu bendicionmi ashca. ¡Ashcara yachanuca! Shinajpi ahuayarina randimanda paiguna yachashcara shujcunara yachachinun. Chita rurasha ñucanchira animachinun, shinallara ñucanchi shujcunara animachinchi”.

 Cai Escuela charingaj ¿maimanda cullquira charinchi? Intiru mundui Bibliamanda yachachingaj cuyashca cullquimanda, ashcauna paiguna munashca tupu cullquira cuyanun Internetpi donate.jw.org nishca puistui. Pagarachu cuyai siqui shunguhua yanapashcamanda cai intiru mundumanda escuelama ringaj.