Gatejnin cajcho ricarcushun imatataj pushacoj religiosucuna rurarcaycan Ucraniacho guerra wichan:

•   “Iglesia Ortodoxa Rusa nishganpa pushacojnin, Patriarca Kirill jutiyoj runaga imalatapis wilacushgachu Rusia ima ruraycashganpita. Chay Iglesia lapan camacächishgancunataga hasta guerrata rurananpaj quiquin Rusiapa presidentin utilizash” (EUobserver, 7 marzo, 2022).

•   “Patriarca Kirill jutiyojga wilacamushga, Ucraniacho guerrata galaycärishganga, chaycho cawaj runacunapa juchanraycurshi caycan” (AP News, 8 marzo, 2022).

•   “Iglesia Ortodoxa Ucraniana nishganpa pushacojnin metropolitano Epifanio I jutiyoj (Kyiv marcapita), lunes junaj marcanta bendecirgan Rusia tropacunapa contrancho peliananpaj. Jina nergan enemiguncunata o Rusiapita soldaducunata wanuchipäcushganga manami juchachu” (The Jerusalem Post, 16 marzo, 2022).

•   “Noganchicunaga acuerduchomi caycanchi defendimänanchipaj lapan tropacunawan, jina bendeciyculanchi Ucrania naciunninchita defendipäcushganraycur y mañacuyculanchi paycunaraycur” (Declaración del Consejo de Iglesias y Organizaciones Religiosas de Ucrania,  a 24 febrero, 2022).

 ¿Ima ninquitaj? ‘Jesusmi pushacojnë’ nej religiuncunaga ¿ninmanchuraj waquincunata guerraman aywananpaj? ¿Bibliaga imata nin?

Guerracho religiuncuna imano yanapacushgan

 Unaypitanami religiuncunaga cutin cutin guerracho yanapacärishga ‘jauca cawayta tarinapaj’ nir. Achca watacunapa Jehovapa testiguncunaga ali claro wilacärishga luta religiuncuna imata rurapäcushganta. Publicaciunninchicho ima nishganchita jucnin jucninta ricärishun.

•   “Las cruzadas: ‘trágica ilusión’” nishganga wilacun imanomi Iglesia católica romana nishganpa culpanraycur wanuchinacuycuna cashga, Diospa y Jesuspa jutincho.

•   “La Iglesia Católica y África” shumaj wilacun iglesiaga imalatapis rurashgachu guerra mana cananpaj y marcacuna alapa mana chiquinacur wanuchinacuycuna mana cananpaj.

•   Cay yachachicuycunapis “¿Tiene la culpa la religión?”, “El papel de la religión en las guerras” y “La religión toma partido” shumaj wilacamush católico, ortodoxo y protestantes nishgancunapa pushacojnincuna imano yanapacärishga guerraman lapan aywajcunata”.

¿Cristiano religiuncunaga guerracho yanapacunmanchuraj?

 Jesús yachachicushgan: “Kikiki kuyakushqaykino runa mayikita kuyanki” (Mateo 22:39). “Chikishuqnikikunata kuyapäkunki” (Mateo 5:44-47).

 Jesús yachachicushgan: “Noqa manami kay patsacho mandaqtsu kaykä. Kay patsacho mandaq kaptïqa prësu tsarimaqkunawan discïpulükuna pelyapäkunmanmi karqan” (Juan 18:36). “Pipis espädawan wanutsiq kaqqa espädawan wanutsishqami kanqa” (Mateo 26:47-52).

 Cayman yarpachacuy: Jesusta defindinalanpäpis gatejnincuna armancunata mana utilizapäcushga carga, ¿alichuraj guerracho armacunata utilizaptinchi? Yachacunayquipaj cayta leiy: “El cristianismo y la guerra: ¿son compatibles?”. Chaycho musyarinqui naupa cristianucuna imata rurapäcurgan Jesusta cäsucärishpan.

¿Imaraj pasanga guerracho yanapacoj religiuncunata?

 Jesús nishganta mana cäsucojcunataga Diosninchi mana chasquinchu, chaypämi Bibliapis claro parlamun (Mateo 7:21-23; Tito 1:16).

•   Apocalipsis libruga wilacunmi religiuncunapa culpanraycur “maytsay runakunapa yawarnin mashtaraykan”; quiquin Diosmi chayta nin (Apocalipsis 18:21, 24). Caypita masla yachacunayquipaj cayta leiy: “¿Qué es Babilonia la Grande?”.

•   Jesusmi nergan luta religiuncunata Diosninchi ushacächinanpaj, paycunaga imayca mana alicunata rurapäcush, Bibliapis nin ismushga yorano cashganta y ‘muturir ninaman qaykushqa’ cananpaj (Mateo 7:15-20). Imano cananpaj musyayta munarga cayta leiy: “¡Se acerca el fin de la religión falsa!”.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images