KE KAK inda dahme kisin serepeino oh kompoakpah kan wadawadek? Ei, pwuhk wet me ke wadawadek—Nai Pwuhk en Poadoapoad kan en Paipel. Oh irail kin wadawadek poadoapoadohte me ke wadawadek—“Iaduen Kitail Pahn Kak Mour Kohkohlahte.”

Ke ese dahme irail suksukuhliki? Keieu, kitail anahne en ese duen Siohwa oh sapwellime Ohl Sises ma kitail men mour kohkohlahte. Paipel inda: ‘Iet ahl en mour kohkohlahte. Sukuhliki duen Koht mehlel, oh sapwellime Ohl me e poronehdo sampah, Sises Kraist.’

Iaduen kitail pahn kak sukuhliki duen Siohwa Koht oh sapwellime Ohl Sises? Ehu ahl iei atail wadek Nai Pwuhk en Poadoapoad kan en Paipel sang ni tapi lel imwi. E padahkiong kitail soahng tohto me duen Siohwa oh Sises, kaidehn? Oh e pil padahkiong kitail soahng tohto me ira ketin wiahdahr oh soahng kan me ira pahn ketin wia. Ahpw kitail pil anahne en wia laud sang ihte wadek pwuhk wet.

Ke kilang pwuhk teio me mi pohn taht? Iei Paipel. Peki emen en wadek ong uhk ire kan sang nan Paipel wasa me poadoapoad en nan pwuhk wet kohsang ie. Sang nan Paipel kitail kak sukuhliki oratik koaros me kitail anahne ese pwe kitail en kak papahong Siohwa ni ahl pwung oh ale mour soutuk. Ihme kitail en wiahkihla tiahk ehu en onop Paipel ansou koaros.

Atail sukuhliki duen Siohwa Koht oh Sises Kraist kelehpw sohte itar. Kitail kak wehwehkihla oh esehla ira oh mehkan me ira padahkki, ahpw sohte ale mour soutuk. Eri ke ese dahme pil anahn?

Kitail pil anahne en mourki atail mour pahrekiong mehkan me kitail sukuhlikiehr. Ke tamataman Sudas Iskariod? Ih emen kisehn 12 me Sises pilada pwen wia sapwellime wahnpoaron ko. Sudas loalokongkihla laud duen Siohwa oh Sises. Ahpw dahme wiawiong ih? Ansoukis mwuhri e tapiada noarok, oh e pangala Sises rehn imwintihti kan ki mwohni silper silihsek. Ihme Sudas sohte pahn ale mour soutuk.

Ke tamataman Kehasai, ohl me kitail sukuhliki nan Poadoapoad 69? E mwahuki ahniki likou oh mwohni tohto me kaidehn pein ah. Ih eri koasoai likamw pwen ale mehpwukat. Ahpw Siohwa kadeikada ih. Oh e pil pahn kaloke kitail ma kitail sohte peikiong sapwellime kosonned kan.

Ahpw pil mie aramas mwahu tohto me ansou koaros kin men papahong Siohwa ni lelepak. Kitail men duwehte irail, kaidehn? Kisin Samuel iei emen me mwahu kitail en alasang. Tamataman, duen me kitail kilang nan Poadoapoad 55, e mahki sounpahr pahieu de limaute ni ansou me e tapiada papahong Siohwa nan tehnpas sarawi. Ihme kahrehda mehndahki ahmw pwulopwul, ke sohte nohn pwulopwul pwe ken sohte kak papahong Siohwa, ke pil kak.

Pil ehu, aramas me kitail koaros men idawehn iei Sises Kraist. Ni ansou me e wia kisin pwutak, duen me sansalda nan Poadoapoad 87, e mihmi nan ihmwen kaudok koasokoasoaiong mehteikan duen Seme nanleng. Kitail en alasang ih. Kitail en padahkiong wen aramas tohto me kitail kakong duen atail Koht kalahngan oh kasehlel Siohwa oh sapwellime Ohl, Sises Kraist. Ma kitail pahn wia mehpwukat, kitail pahn kak mour kohkohlahte nan sapwellimen Koht paradais kapw sampah.