Sawaspene Kin Sewese Peneinei en Keirda nan Arail Kaudok

SAWASPENE kesempwal ong irail me men ahneki peneinei me kin poakohng oh kaudok ong Siohwa. Ni ahnsou me Siohwa ketin kapikada tepin pwopwoudo, e kasalehda kesempwalpen sawaspene. Ihp anahne wia ‘sawasepen’ Adam. (Sen. 2:18) Ohl pwopwoud oh lih pwopwoud anahne sawaspene. (Ekl. 4:9-12) Pwehn kapwaiada pwukoa kan me Siohwa ketikihong pahpa oh nohno oh seri kan, irail pil anahne sawaspene.

Kaudok en Peneinei

Barry oh Heidi naineki seri limmen. Irail diarada me sawaspene pwehn kaukaule wia onop en Paipel en peneinei kin sewese irail en kekeirda. Barry koasoia: “Ekei ahnsou, I kin koasoanehdi seri kan en kaunopada ekei ire kan ong onop en peneinei. Ekei pak I kin koasoanehdi irail en wadek ehu ire sang nan makasihn oh ehukihong peneinei dahme re diarada. Se pil kin wia kamwomwada kan ong kalohk pwe seri kan en ese dahme re pahn nda.” Heidi pil nda: “Kiht koaros kin ntingihdi mehn akadei kan me se men lel, oh se kin kasawih mepwukat erein at onop en peneinei pwehn kilang uwen at kekeirda.” Pwopwoud wet pil diarada me arail koasoanehdi en dehr kilang kasdo ekei soutik kin kihong emenemen irail ahnsou mwahu en wadawad.

Mihting kan en Mwomwohdiso

Mike oh Denise nainekihda seri pahmen. Ia duwen arail peneinei paiekihda arail kin sawaspene? Mike nda: “Ekei pak, mehnda ma se kin koasoanehdi mwahu sen mwadang lella ni mihting kan, se sohte kin pweida. Ahpw se diarada me ni at kin sawaspene, e kin sewese kiht en mwadang lella ni ahnsoun mihting.” Denise koasoia: “Ni en seri kan ar kekeirda, emenemen irail kin ahneki pwukoa kan. Kim, nait serepein, kin sawas ni ahnsoun kuk oh kaunopada tehpel en mwenge.” Neira pwutako, Micheal tamanda oh koasoia: “Se kin wia mihting en mwomwohdiso ni soutik en Niare nan imwato. Kahrehda se kin kamwakelehda pereo, nan tahto, oh koasoanehdi sehr kan.” Pil emen neira pwutak, Matthew, nda: “Pahpa kin mwadangodo mwurin doadoahk ni soutik en mihting kan pwehn sewesei kiht onopada.” Ia imwilahn met?

E Katapan en Sawaspene

Mike nda: “Nan pahr 1987, ngehi oh Denise tepida wia doadoahk en pioneer. Ni ahnsowo, nait seri silimen kin mi reht. Riemen pil wiahla pioneer kei oh meteikan iang wia doadoahk en kauwada Pedel. Pil ehu kapai me se ahneki iei me at peneinei sewese irail meh 40 en inoukihda arail mour oh papidaisla. Nin duwen peneinei ehu, se pil paiekihda iang doadoahk en kauwada Wasahn Kaudok kan nan sahpw teikan.”

Ei, e katapan en sawaspene nan peneinei. Ke kak pil rapahki ahl teikan pwehn sewese omw peneinei? Ke kak kamehlele me sawaspene pahn sewese omw peneinei en kakairada amwail nanpwungmwahu rehn Siohwa.

[Kilel nan pali 10]

Wia kamwomwada kan pahn sewese peneinei en kekeirda nan kalohk