جدوں تواڈا کوئی دوست توانوں کوئی تحفہ دیندا اے تے توانوں کیہو جیہا محسوس ہوندا اے؟ تُسی بڑے خوش ہوندے او تے اپنے دوست نُوں وکھانا چاہندے او کہ تُسی اوہدے تحفے لئی دلوں شکرگزار او۔ یہوواہ تے یسوع مسیح نے وی سانوں سب توں ودھیا تحفہ دِتا اے۔ ایہہ تحفہ کیہڑا اے تے اَسی ایہدے لئی شکرگزاری کیویں وکھا سکنے آں؟‏

1.‏ یہوواہ تے یسوع لئی شکرگزاری وکھان دا اِک طریقہ کیہڑا اے؟‏

بائبل چ وعدہ کیتا گیا اے کہ جیہڑا بندہ یسوع مسیح تے ایمان ظاہر کرے گا اوہ ہمیشاں دی زندگی پائے گا۔ (‏یوحنا 3:‏16‏)‏ یسوع تے ایمان ظاہر کرن دا کیہہ مطلب اے؟ ایہدا مطلب صرف ایہہ نئیں کہ اَسی بس اپنے موُنہوں کہہ دَئیے کہ اَسی یسوع نُوں مننے آں سگوں سانوں اوہدے حکماں تے چلنا وی چاہی دا اے۔ (‏یعقوب 2:‏17‏)‏ جدوں اَسی اپنے کماں، گل‌بات تے فیصلیاں توں اپنے ایمان نُوں ظاہر کراں گے تے یہوواہ خدا تے یسوع نال ساڈی دوستی ہور پکی ہو جائے گی۔—‏یوحنا 14:‏21 نُوں پڑھو۔‏

2.‏ اَسی کیہڑے خاص موقعے تے یہوواہ تے یسوع دی محبت لئی شکرگزاری وکھا سکنے آں؟‏

اپنی موت توں اِک رات پہلاں یسوع نے اپنے شاگرداں نُوں دَسیا کہ اوہ اِک ہور طریقے نال وی اوہدی قربانی لئی شکرگزاری وکھا سکدے نیں۔ یسوع نے اوہناں نُوں اِک خاص موقعے تے حاضر ہون لئی کہیا جنہوں بائبل چ عشایِ‌ربانی یاں مالک دی یادگیری دا کھانا کہیا گیا اے۔ (‏1-‏کُرنتھیوں 11:‏20‏)‏ یسوع نے ایس موقعے نُوں منان بارے اپنے شاگرداں نُوں حکم دِتا کہ میری یاد چ اِنج ای کریا کرو۔‏ (‏لوقا 22:‏19‏)‏ ایہہ حکم صرف یسوع دے پہلے شاگرداں واسطے ای نئیں سی۔ ایہہ اوہناں لئی وی سی جنہاں نے بعد چ یسوع دے شاگرد بننا سی تاکہ اوہ یاد رکھ سکن کہ یسوع نے اوہناں لئی اپنی جان قربان کیتی اے۔ یسوع دی موت دی یادگیری چ شریک ہو کے تُسی ظاہر کرو گے کہ تُسی اوس عظیم محبت لئی دلوں شکرگزار او جیہڑی یہوواہ تے یسوع نے تواڈے لئی وکھائی اے۔‏

 ہور سوچ‌وچار لئی

3.‏ اپنے کماں توں شکرگزاری وکھاؤ

فرض کرو کہ اِک بندہ تواڈی جان بچاندا اے۔ کیہہ تُسی اوہدے ایس احسان نُوں بُھل جاؤ گے؟ یاں فیر تُسی فرق فرق طریقیاں نال اوہدے لئی شکرگزاری ظاہر کرن دی کوشش کرو گے؟‏

ساڈی زندگی یہوواہ خدا دی دین اے۔ 1-‏یوحنا 4:‏8-‏10 نُوں پڑھو تے فیر ایہناں سوالاں تے گل بات کرو:‏

• یسوع مسیح دی قربانی ساڈے لئی اِک قیمتی تحفہ کیوں اے؟‏

• یہوواہ تے یسوع دے ایس قیمتی تحفے بارے تُسی کیہو جیہا محسوس کردے او؟‏

یہوواہ خدا تے یسوع نے ساڈے لئی جو کجھ کیتا اے اَسی اوہدے لئی شکرگزاری کیویں وکھا سکنے آں؟ 2-‏کُرنتھیوں 5:‏15 تے 1-‏یوحنا 4:‏11 تے 5:‏3 نُوں پڑھو۔‏ ہر ایت نُوں پڑھن دے بعد ایس سوال تے گل بات کرو:‏

• ایس ایت دے مطابق اَسی یہوواہ تے یسوع لئی شکرگزاری کیویں ظاہر کر سکنے آں؟‏

4.‏ یسوع مسیح دی مثال تے چلو

شکرگزاری ظاہر کرن دا اِک طریقہ ایہہ وے کہ اَسی یسوع مسیح دی مثال تے چلیے۔ 1-‏پطرس 2:‏21 نُوں پڑھو تے فیر ایس سوال تے گل بات کرو:‏

• اَسی کیہڑے طریقیاں نال یسوع دی مثال تے عمل کر سکنے آں؟‏

• مسیح دی موت دی یادگیری تے کیہہ ہوندا اے؟‏

 خلاصہ

یسوع دی قربانی لئی شکرگزاری وکھان دا بہترین طریقہ ایہہ وے کہ اَسی یسوع تے ایمان ظاہر کرئیے تے اوہدی موت دی یاد چ ہون والی خاص عبادت چ شامل ہوئیے۔‏

دہرائی

• یسوع تے ایمان ظاہر کرن دا کیہہ مطلب اے؟‏

• یہوواہ خدا تے یسوع نے ساڈے لئی جو کجھ کیتا اے تُسی اوہدے لئی شکرگزاری کیویں ظاہر کر سکدے او؟‏

• یسوع مسیح دی موت دی یاد گیری چ شامل ہونا ایناں ضروری کیوں اے؟‏