جدوں وی کوئی مصیبت آندی اے یاں فیر کجھ بُرا ہوندا اے تے اَسی سوچنے آں کہ”‏اِنج کیوں ہویا؟“‏ بائبل چ واضح طور تے دَسیا گیا اے کہ دُنیا چ اینیاں مصیبتاں تے بُرائی کیوں اے۔‏

1.‏ شیطان نے کیہہ کیتا جدی وجہ توں زمین تے بُرائی پھیل گئی؟‏

شیطان اِبلیس نے خدا دے خلاف بغاوت کیتی کیونکہ اوہ دُوجیاں تے حکومت کرنا چاہندا سی۔ ایس لئی اوہنے آدم تے حوا نُوں وی خدا دے خلاف بغاوت کرن دی ہلاشیری دِتی۔ اوہنے حوا نال جھوٹھ بولیا۔ (‏پیدایش 3:‏1-‏5‏)‏ اوہنے حوا نُوں ایہہ یقین دَوایا کہ کوئی بوہت ای چنگی چیز ہے وے جیہڑی خدا اوہنوں نئیں دینا چاہندا۔ اوہنے تے اوہدے ذہن چ ایہہ گل وی پائی کہ خوش رہن لئی خدا دے حکماں نُوں مننا ضروری نئیں اے۔ شیطان نے دُنیا دا پہلا جھوٹھ بولیا تے حوا نُوں دَسیا کہ اوہ کدی نئیں مرے گی۔ ایسے لئی بائبل چ کہیا گیا اے کہ شیطان جھوٹھا اے سگوں جھوٹھ دا پیو اے۔‏‏—‏یوحنا 8:‏44‏۔‏

2.‏ آدم تے حوا نے کیہہ کیتا؟‏

ایہو جہی کوئی شے ہے ای نئیں سی جیہڑی یہوواہ خدا نے آدم تے حوا نُوں نہ دِتی ہوئے۔ اوہنے کہیا سی کہ اوہ باغِ‌عدن دے ہر درخت دا پھل کھا سکدے نیں بس اِک درخت دا پھل نہ کھان۔ (‏پیدایش 2:‏15-‏17‏)‏ پر اوہناں نے اوسے درخت دا پھل کھادا جدے توں یہوواہ خدا نے منع کیتا سی۔ پاک کلام چ دَسیا گیا اے کہ حوا نے اوس درخت دا پھل لیا تے کھادا۔‏ اوہدے بعد آدم نے وی اوہ پھل کھادا۔‏ (‏پیدایش 3:‏6‏)‏ اِنج اوہناں دونواں نے خدا دی نافرمانی کیتی۔ آدم تے حوا بے‌عیب سن ایس لئی اوہناں لئی خدا دا حکم مننا مشکل نئیں سی۔ پر اوہناں نے جان‌بجھ کے بغاوت کیتی تے ایہہ ظاہر کیتا کہ اوہ خدا نُوں اپنا حکمران نئیں من دے۔ ایس وجہ توں اوہناں نُوں بڑا نقصان چکنا پیا۔—‏پیدایش 3:‏16-‏19‏۔‏

3.‏ آدم تے حوا دے گُناہ دا ساڈے تے کیہہ اثر ہویا اے؟‏

خدا دا حکم توڑن توں بعد آدم تے حوا گُناہ‌گار بن گئے تے ایس لئی اوہناں دی اولاد چ وی گُناہ آ گیا۔ ایسے لئی بائبل چ لکھیا اے کہ اِک آدمی دے ذریعے گُناہ دُنیا چ آیا تے گُناہ دے ذریعے موت آئی تے موت سارے انساناں چ پھیل گئی کیونکہ ساریاں نے گُناہ کیتا۔‏‏—‏رومیوں 5:‏12‏۔‏

سانوں فرق فرق گلاں دی وجہ توں مصیبتاں دا سامنا کرنا پیندا اے۔ کدی کدار اَسی اپنے غلط فیصلیاں دی وجہ توں مصیبت چ پے جانے آں۔ پر کدی کدی ایہہ مصیبتاں دُوجیاں دے غلط فیصلیاں دی وجہ توں آندیاں نیں۔ تے کدی کدار اِنج وی ہوندا اے کہ اَسی غلط ویلے تے غلط تھاں تے ہنے آں۔—‏واعظ 9:‏11 نُوں پڑھو۔‏

 ہور سوچ‌وچار لئی

4.‏ ساڈیاں مصیبتاں دا اصل ذمے‌دار

بوہت سارے لوک سوچدے نیں کہ ایس دُنیا نُوں خدا چلا رہیا اے۔ پر کیہہ ایہہ گل سچ اے؟ ویڈیو چلاؤ‏۔‏

یعقوب 1:‏13 تے 1-‏یوحنا 5:‏19 نُوں پڑھو تے فیر ایس سوال تے گل بات کرو:‏

• کیہہ دُنیا چ پھیلی ہوئی بُرائی تے مصیبتاں دا ذمے‌دار خدا اے؟‏

5.‏ شیطان دی حکمرانی توں کیہہ نقصان ہویا اے؟‏

1. 1.‏ آدم تے حوا گُناہ توں پاک سن تے اِک سوہنے باغ چ رہندے سن۔ پر اوہناں نے شیطان دے پچھے لگ کے یہوواہ دی نافرمانی کیتی۔‏

2. 2.‏ آدم تے حوا دی بغاوت دے بعد دُنیا تے گُناہ، دُکھ تکلیفاں تے موت دا راج ہو گیا۔‏

3. 3.‏ یہوواہ گُناہ، دُکھ تکلیف تے موت دا راج ختم کر دَوے گا۔ فیر انسان دُبارہ اِک سوہنی دھرتی تے رہن گے تے گُناہ توں پاک ہو جان گے۔‏

 6.‏ سانوں دُکھی ویکھ کے خدا دُکھی ہوندا اے

کیہہ خدا نُوں ساڈا دُکھ درد محسوس ہوندا اے؟ غور کرو کہ بادشاہ داؤد تے پطرس رسول نے ایس حوالے نال کیہہ لکھیا۔ زبور 31:‏7 تے 1-‏پطرس 5:‏7 نُوں پڑھو تے فیر ایس سوال تے گل بات کرو:‏

• توانوں ایہہ جان کے کیہو جیہا محسوس ہوندا اے کہ یہوواہ خدا ساڈیاں مصیبتاں تے تکلیفاں نُوں جان دا اے تے ساڈی بڑی پرواہ کردا اے؟‏

 خلاصہ

اَج دُنیا چ پھیلی ہوئی بُرائی تے مصیبتاں دی سب توں وڈی وجہ شیطان، آدم تے حوا دی بغاوت اے۔ پر خدا ساڈے دُکھاں تے تکلیفاں نُوں محسوس کردا اے۔ ایس لئی اوہ بوہت چھیتی ایہناں نُوں ختم کر دَوے گا۔‏

دہرائی

• شیطان نے حوا نال کیہڑا جھوٹھ بولیا؟‏

• آدم تے حوا دی بغاوت دا سارے انساناں تے کیہہ اثر ہویا؟‏

• سانوں کیویں پتہ اے کہ خدا ساڈے دُکھ درد نُوں محسوس کردا اے؟‏