سبق نمبر 24
فرشتے کون نیں تے اوہناں دا کم کیہہ اے؟
یہوواہ دے خاندان دے بےشمار فرد اسمان تے رہندے نیں۔ اوہ چاہندا اے کہ اَسی ایہناں بارے وی جانیے۔ ایہہ فرشتے نیں جنہاں نُوں خدا دے پُتر کہیا گیا اے۔ (ایوب 38:7) بائبل فرشتیاں بارے کیہہ دَسدی اے؟ فرشتے ساڈی زندگی تے کیہہ اثر پاندے نیں؟ تے کیہہ سارے فرشتے خدا دے خاندان دا حصہ نیں؟
1. فرشتے کون نیں؟
یہوواہ خدا نے زمین بنان توں پہلاں فرشتیاں نُوں بنایا سی۔ خدا وانگوں اوہ وی اسمان تے رہندے نیں تے اَسی اوہناں نُوں ویکھ نئیں سکدے۔ (عبرانیوں 1:14) بائبل دَسدی اے کہ فرشتیاں دی تعداد کروڑاں چ وے تے ہر فرشتہ دُوجے فرشتے نالوں فرق اے۔ (مکاشفہ 5:11) فرشتے یہوواہ دے کلام دی آواز سُن کے اوہدے تے عمل کردے نیں۔ (زبور 103:20) پرانے وقتاں چ یہوواہ خدا نے اپنا پیغام اپنے بندیاں تک پونچان، اوہناں دی حفاظت کرن تے اوہناں دی مدد کرن لئی فرشتیاں نُوں زمین تے گھلیا۔ اَج فرشتے مسیحیاں دی مدد کردے نیں تاکہ اوہ اوہناں لوکاں تک پونچ سکن جیہڑے خدا بارے سکھنا چاہندے نیں۔
2. شیطان تے بُرے فرشتے کون نیں؟
بائبل دَسدی اے کہ کجھ فرشتے خدا دے وفادار نئیں رہے۔ پہلا فرشتہ جنہے بغاوت کیتی اوہنوں شیطان تے اِبلیس کہیا جاندا اے جیہڑا سارے لوکاں نُوں گمراہ کر رہیا اے۔ (مکاشفہ 12:9) شیطان اصل چ دُوجیاں تے حکومت کرنا چاہندا سی۔ ایس لئی پہلے اوہنے آدم تے حوا نُوں خدا دے خلاف کیتا تے فیر ہور فرشتیاں نُوں خدا دے خلاف بھڑکایا۔ ایہہ فرشتے شیطان دے پچھے لگ کے باغی تے بُرے بن گئے۔ یہوواہ نے ایہناں نُوں اسمان توں زمین تے سُٹ دِتا تے اوہ بوہت چھیتی ایہناں نُوں ختم وی کر دَوے گا۔—مکاشفہ 12:9، 12 نُوں پڑھو۔
3. شیطان تے بُرے فرشتے سانوں گمراہ کیویں کردے نیں؟
شیطان تے بُرے فرشتے لوکاں کولوں اوہ کم کراندے نیں جنہاں چ بُرے فرشتیاں نال رابطہ کیتا جاندا اے۔ مثال لئی اوہ لوکاں نُوں ہلاشیری دیندے نیں کہ اوہ نجومیاں، مستقبل دا حال دَسن والیاں تے عاملاں کول جان۔ کجھ لوک تے ایہو جیہا علاج کراندے نیں جدے چ بُرے فرشتیاں نال رابطہ کیتا جاندا اے۔ بُرے فرشتے لوکاں نُوں ایہہ یقین وی دَواندے نیں کہ اوہ اپنے اوہناں عزیزاں نال گل کر سکدے نیں جیہڑے فوت ہو گئے نیں۔ پر یہوواہ خدا سانوں حکم دیندا اے کہ اَسی جِنّاں دے یاراں تے جادوگراں کول نہ جائیے۔ (احبار 19:31) خدا نے سانوں ایہہ حکم شیطان تے بُرے فرشتیاں توں بچان لئی دِتا اے۔ اوہ خدا دے دُشمن نیں تے سانوں نقصان پونچانا چاہندے نیں۔
ہور سوچوچار لئی
سکھو کہ فرشتے کیہڑے کیہڑے چنگے کم کردے نیں، سانوں ایہو جہے کم کیوں نئیں کرنے چاہی دے جنہاں دا تعلق بُرے فرشتیاں نال اے تے اَسی شیطان تے بُرے فرشتیاں توں کیویں بچ سکنے آں۔
4. فرشتے یہوواہ خدا بارے سکھن چ لوکاں دی مدد کردے نیں
فرشتے آپ لوکاں کول جا کے اوہناں نُوں خوشخبری نئیں سناندے۔ پر اوہ خدا دے خادماں دی مدد کردے نیں تاکہ اوہ ایہو جہے لوکاں کول جان جیہڑے پاک کلام دِیاں سچائیاں نُوں سکھنا چاہندے نیں۔ مکاشفہ 14:6، 7 نُوں پڑھو تے فیر ایہناں سوالاں تے گل بات کرو:
-
مُنادی دے کم چ سانوں فرشتیاں دی مدد دی ضرورت کیوں ہوندی اے؟
-
کیہہ توانوں ایہہ جان کے حوصلہ مِلدا اے کہ فرشتے نیک دل لوکاں تک پونچن چ تواڈی مدد کردے نیں؟ تُسی جیہڑا جواب دِتا اے، اوہدی وجہ کیہہ اے؟
5. بُرے فرشتیاں نال تعلق رکھن والے کماں توں دُور رہوو
شیطان تے بُرے فرشتے یہوواہ دے دُشمن نیں ایس لئی اوہ ساڈے وی دُشمن نیں۔ لُوقا 9:38-42 نُوں پڑھو تے فیر ایس سوال تے گل بات کرو:
-
بُرے فرشتے انساناں نال کیہو جیہا سلوک کردے نیں؟
اَسی نئیں چاہندے کہ بُرے فرشتیاں دا ساڈے تے کوئی اثر ہووے۔ اِستثنا 18:10-12 نُوں فٹنوٹ توں پڑھو a تے فیر ایہناں سوالاں تے گل بات کرو:
-
بُرے فرشتے ساڈے نال رابطہ کرن لئی کیہڑے طریقے استمال کردے نیں؟ تواڈے علاقے چ بُرے فرشتیاں نال تعلق رکھن والے کیہڑے کم عام نیں؟
-
تواڈے خیال چ یہوواہ نے سانوں بُرے فرشتیاں نال تعلق رکھن والے کماں توں دُور رہن دا حکم کیوں دِتا اے؟
ویڈیو چلاؤ تے فیر ایہناں سوالاں تے گل بات کرو:
-
تواڈے خیال چ جیہڑا دھاگا ماریہ دی دھی نے پایا ہویا سی کیہہ اوہ خطرناک سی؟ تُسی اِنج کیوں سوچدے او؟
-
ماریہ نُوں بُرے فرشتیاں توں بچن لئی کیہہ کرن دی ضرورت سی؟
سچے مسیحی شروع توں ای بُرے فرشتیاں دا مقابلہ کردے آئے نیں۔اعمال 19:19 تے 1-کُرنتھیوں 10:21 نُوں پڑھو تے فیر ایس سوال تے گل بات کرو:
-
توانوں ایہو جہی ہر شے نُوں ختم کیوں کر دینا چاہی دا اے جدا تعلق بُرے فرشتیاں نال اے؟
6. شیطان تے بُرے فرشتیاں دے خلاف جنگ جتو
بُرے فرشتیاں دا حاکم شیطان اے۔ پر باقی وفادار فرشتیاں دا سردار میکائیل یعنی یسوع مسیح اے۔ میکائیل کِنّاں طاقتور اے؟ مکاشفہ 12:7-9 نُوں پڑھو تے فیر ایہناں سوالاں تے گل بات کرو:
-
کون زیادہ طاقتور اے، میکائیل تے اوہدے فرشتے یاں شیطان تے اوہدے فرشتے؟
-
تواڈے خیال چ کیہہ یسوع مسیح دے پیروکاراں نُوں بُرے فرشتیاں توں ڈرنا چاہی دا اے؟
تُسی شیطان تے بُرے فرشتیاں دے خلاف جنگ جت سکدے او۔ یعقوب 4:7 نُوں پڑھو تے فیر ایس سوال تے گل بات کرو:
-
تُسی اپنے آپ نُوں شیطان تے بُرے فرشتیاں توں کیویں بچا سکدے او؟
کجھ لوکاں دی رائے: ”جادوٹونے یاں بدروحواں والی گیماں کھیڈنا غلط نئیں اے۔ ایہناں نُوں کھیڈن چ تے سگوں بڑا مزہ آندا اے۔“
-
ایہو جہی سوچ خطرناک کیوں اے؟
خلاصہ
خدا دے وفادار فرشتے ساڈی مدد کردے نیں۔ شیطان تے بُرے فرشتے یہوواہ خدا دے دُشمن نیں ایس لئی اوہ لوکاں نُوں گمراہ کردے نیں تے اوہناں کولوں ایہو جہے کم کراندے نیں جنہاں دا تعلق جادوگری تے کالے علم نال ہوندا اے۔
دہرائی
-
یہوواہ دے فرشتے اوہناں لوکاں دی مدد کیویں کر دے نیں جیہڑے اوہدے بارے سکھنا چاہندے نیں؟
-
شیطان تے بُرے فرشتے کون نیں؟
-
تُسی ایہو جہے کماں توں دُور کیوں رہنا چاہندے او جنہاں دا تعلق بُرے فرشتیاں نال اے؟
ہور جانن لئی
ایس مضمون چ کجھ ایہو جہے ثبوتاں تے غور کرو جنہاں توں پتہ چلدا اے کہ یسوع فرشتیاں دا سردار میکائیل اے۔
ایس مضمون چ پڑھو کہ شیطان ساڈے اندر موجود بُرائی نئیں سگوں اِک حقیقی ہستی اے۔
ایس مضمون چ پڑھو کہ اِک عورت بُرے فرشتیاں دے اثر توں باہر کیویں نکلی۔
اسے زندگی میں ایک مقصد حاصل ہو گیا (مینارِنگہبانی، 1 نومبر 1993)
ایس مضمون چ پڑھو کہ شیطان لوکاں نُوں ایہو جہے کماں نال کیویں گمراہ کردا اے جنہاں دا تعلق بُرے فرشتیاں نال اے۔
جادوٹونے کے بارے میں سچائی (کیا آپ کو ہمیشہ کی زندگی تک لے جانے والا راستہ مِل گیا ہے؟، حصہ 5)
a اِستثنا 18:10-12 (ترجمہ نئی دُنیا): تواڈے وچوں کوئی وی اپنے پُتر یاں دھی نُوں اَگ چ قربان نہ کرے، غیبدانی نہ کرے، جادوٹونا نہ کرے، فال نہ کڈھے، عامل نہ ہووے، کسے نُوں منتر پڑھ کے وَس چ نہ کرے، مُردیاں نال رابطہ کرن دی کوشش نہ کرے یاں ایہو جہے لوکاں نال رُجوع نہ کرے جیہڑے مُردیاں نال رابطہ کردے نیں یاں مستقبل دا حال دَسدے نیں کیونکہ جیہڑا وی ایہو جہے کم کردا اے، یہوواہ اوہدے توں نفرت کردا اے تے ایہو جہے گھٹیا کماں دی وجہ توں ای یہوواہ تیرا خدا اوہناں قوماں نُوں تیرے اَگوں کڈھن والا اے۔
ایہہ وی ویکھو
اوہ سوال جیہڑے لوک اکثر ساڈے بارے پچھدے نیں
یہوواہ دے گواہ بائبل کورس کیویں کراندے نیں؟
یہوواہ دے گواہواں نال بائبل کورس کردے ویلے تُسی جیہڑا وی بائبل ترجمہ چاہوو استمال کر سکدے او۔ نالے تُسی اپنے سارے گھر والیاں یاں اپنے دوستاں نُوں وی ایہدے چ شامل ہون لئی کہہ سکدے او۔
