نوجواناں دے سوال
کیہہ ہمجنس پرستی غلط اے؟
ڈیوڈ ناں دا اِک نوجوان جدی عمر 23 سال اے دَسدا اے: ”جدوں میں جوانی چ پیر رکھیا تے مینوں دُوجے منڈُیاں وَل کشش محسوس ہوندی سی۔ مینوں لگدا سی کہ وقت دے نال نال ایہہ کشش ختم ہو جائے گی پر مینوں حالے وی ایس مسئلے دا سامنا کرنا پے رہیا اے۔“
ڈیوڈ اِک مسیحی اے جیہڑا خدا نُوں خوش کرنا چاہندا اے۔ پر کیہہ اوہ دُوجے مرداں وَل کشش محسوس کرن دے نال نال خدا نُوں وی خوش کر سکدا اے؟ ہمجنس پرستی بارے خدا کیہو جیہا محسوس کردا اے؟
بائبل چ ایہدے بارے کیہہ دَسیا گیا اے؟
ہمجنس پرستی بارے فرق فرق ثقافتاں دے لوکاں دے فرق فرق نظریے نیں۔ نالے وقت دے نال نال ایہدے بارے لوکاں دی سوچ بدلدی رہی اے۔ پر مسیحی دُوجے لوکاں دے نظریے توں متاثر نئیں ہوندے تے نہ ای فرق فرق تلیم دی وجہ توں ایدھر اودھر ڈولدے نیں۔ (افسیوں 4:14) ایہدی بجائے اوہ ہمجنس پرستی تے ایہو جہے دُوجے معاملیاں بارے بائبل دا نظریہ رکھدے نیں۔
بائبل چ صاف صاف دَسیا گیا اے کہ ہمجنس پرستی بارے خدا دا نظریہ کیہہ اے۔ ایہدے چ دَسیا گیا اے:
تُوں کسے مرد نال جنسی تعلق قائم نہ کریں جیویں عورت نال کرنا ایں۔—احبار 18:22۔
کیونکہ اوہ اپنے دل دِیاں خواہشاں نُوں پورا کرن تے تُلے سن ایس لئی خدا نے اوہناں نُوں . . . بے لگام جنسی خواہشاں دے حوالے کر دِتا کیونکہ اوہناں دِیاں عورتاں فطری جنسی تعلق چھڈ کے غیر فطری کم کرن لگ پئیاں سن۔—رومیوں 1:24، 26۔
دھوکھا نہ کھاؤ، نہ تے حرام کار، نہ بُتپرست، نہ زِنا کار، نہ اپنا جسم ویچن والے مرد، نہ ہمجنس پرستی کرن والے مرد، نہ چور، نہ لالچی، نہ شرابی، نہ اوہ لوک جیہڑے دُوجیاں نُوں ذلیل کردے نیں تے نہ ای لٹمار کرن والے خدا دی بادشاہی دے وارث ہون گے۔—1-کُرنتھیوں 6:9، 10۔
خدا دے ایہہ معیار سارے لوکاں اُتے لاگو ہوندے نیں بھانویں اوہ ہمجنس پرست ہون یاں نہ ہون۔ ہر انسان نُوں اپنے اُتے قابو رکھنا چاہی دا اے تاکہ اوہ کوئی وی ایہو جیہا کم نہ کرے جیہڑا خدا نُوں پسند نئیں۔—کلسیوں 3:5۔
کیہہ ایہدا مطلب ایہہ وے کہ . . . ؟
کیہہ ایہدا مطلب ایہہ وے کہ بائبل ہمجنس پرست لوکاں توں نفرت کرن لئی کہندی اے؟
نئیں۔ بائبل کسے وی بندے توں نفرت کرن لئی نئیں کہندی بھانویں اوہ ہمجنس پرست ہووے یاں نہ ہووے سگوں ایہدے چ دَسیا گیا اے کہ سارے لوکاں نال امن نال رہوو۔ فیر بھانویں اوہ جیہو جہی وی زندگی گزار رہے ہون۔ (عبرانیوں 12:14) ایس لئی ہمجنس پرست لوکاں دا مذاق اُڈانا، اوہناں نال کسے وی قسم دا بھیڑا سلوک کرنا یاں فیر اوہناں تے ظلم کرنا غلط اے۔
کیہہ ایہدا مطلب ایہہ وے کہ مسیحیاں نُوں ہمجنس پرست لوکاں نُوں شادی دی اجازت دین والے قانون دی مخالفت کرنی چاہی دی اے؟
بائبل چوں پتہ چلدا اے کہ شادی لئی خدا نے ایہہ معیار قائم کیتا اے کہ ایہہ صرف اِک مرد تے اِک عورت دے درمیان ہووے۔ (متی 19:4-6) ہمجنس پرست لوکاں دی شادی دے قانون بارے کوئی فیصلہ کرنا حکومت دا کم اے مسیحیاں دا نئیں۔ بائبل چ مسیحیاں نُوں نصیحت کیتی گئی اے کہ اوہ سیاسی معاملیاں چ کسے دی وی طرفداری نہ کرن۔ (یوحنا 18:36) ایس لئی مسیحی ہمجنس پرست لوکاں بارے یاں اوہناں دی شادی بارے حکومت دے قانون دی نہ تے حمایت کردے نیں تے نہ ای اوہدی مخالفت کردے نیں۔
پر جے . . . ؟
پر جے کوئی ہمجنس پرست اے تے کیہہ اوہ بدل سکدا اے؟
جی بالکل۔ پہلی صدی عیسوی چ وی کجھ ایہو جہے ہمجنس پرست لوک ہے سن جنہاں نے بعد چ اپنے چالچلن نُوں بدل لیا سی۔ بائبل چ دَسیا گیا اے کہ ہمجنس پرست لوک خدا دی بادشاہی دے وارث نئیں ہون گے۔ پر ایس گل دے بعد ایہہ وی دَسیا گیا اے کہ اوس ویلے کجھ ایہو جہے لوک ہے سن پر اوہ بدل گئے تے مسیحی کلیسیا دا حصہ بن گئے۔—1-کُرنتھیوں 6:11۔
کیہہ جیہڑے لوک ہمجنس پرستی کرنا چھڈ دیندے نیں اوہناں وچ ہمجنس پرستی دی خواہش ہمیشاں لئی ختم ہو جاندی اے؟ نئیں۔ بائبل چ دَسیا گیا اے: نوِیں شخصیت نُوں پا لوو تے ایہنوں صحی علم دے ذریعے ڈھالدے جاؤ۔ (کلسیوں 3:10) ایس ایت توں پتہ چلدا اے کہ اپنے چالچلن نُوں بدلن لئی اِک بندے نُوں لگاتار کوشش کرنی پیندی اے۔
پر جے کوئی خدا دے معیاراں تے چلنا چاہندا اے پر حالے وی اوہنوں اپنی جنس دے لوکاں وَل کشش محسوس ہوندی اے تے اوہ کیہہ کر سکدا اے؟
ایہہ اِک بندے دے اپنے ہتھ وچ اے کہ اوہ اپنیاں دُوجیاں خواہشاں وانگوں ایس خواہش نُوں وی قابو چ رکھے گا یاں نئیں۔ ایس بارے بائبل چ ایہہ مشورہ دِتا گیا اے: پاک روح دے مطابق چلدے رہوو۔ ایس طرحاں تُسی اپنے جسم دِیاں خواہشاں نُوں بالکل پورا نئیں کرو گے۔—گلتیوں 5:16۔
غور کرو ایت چ ایہہ نئیں کہیا گیا کہ تواڈے اندر جسم دِیاں خواہشاں نئیں ہون گیاں۔ سگوں ایہہ دَسیا گیا اے کہ اِک انسان چ ایہہ خواہشاں تے ہو سکدیاں نیں پر اوہ ہر روز بائبل دا مطالعیا کرن تے دُعا کرن نال ایہناں تے قابو پا سکدا اے۔
ڈیوڈ، جدا مضمون دے شروع چ ذکر ہویا اے اوہنوں ایس مشورے تے عمل کر کے بڑا فائدہ ہویا خاص کر جدوں اوہنے اپنے ماں پیو نُوں اپنے مسئلے بارے دَسیا۔ اوہنے کہیا: ”مینوں لگیا جیویں میرے موڈھیاں توں اِک بوہت وڈا بھار اُتر گیا اے۔ جے میں اپنے ماں پیو نُوں ایس بارے پہلاں دَس دِتا ہوندا تے میری نوجوانی دے سال زیادہ چنگے ہوندے۔“
جدوں اَسی یہوواہ دے معیاراں مطابق زندگی گزارنے آں تے اَسی زیادہ خوش رہنے آں۔ سانوں ایس گل تے پورا یقین اے کہ خدا دے معیار راست نیں تے دل نُوں خوش کردے نیں تے اوہناں نُوں منن دا بڑا اجر اے۔—زبور 19:8، 11۔
