Nomata olketa flying fox savve lukluk lo dark, for mekem olketa savve feelim surrounding blo olketa, staka species blo flying fox savve iusim echolocation, wea helpem olketa for savve hao far nao wanfala object thru lo reflection blo saond. For example, samfala flying fox bae savve lo difference blo wanfala insect if hem wanfala moskito or hem wanfala beetle bikos lo saond lo speed blo wing blo datfala insect.

 Tingim: Staka flying fox savve producem saond lo larynx blo olketa and kam thru lo mouth or nostril blo olketa. Olketa iusim big ear blo olketa for detectim echo wea produce taem saond wave hem bounce kam bak from datfala object. Olketa echo hia helpem datfala flying fox for creatim wanfala 3D image for visualizem surrounding blo hem. Olketa flying fox able for faendem location, height, and distance blo wanfala object, even if staka nara flying fox mek noes tu lo semtaem.

 Echolocation blo wanfala flying fox need for barava accurate bikos if hem error even for just wan millisecond (mek-wan-thousand blo wanfala second) hem bae kosim datfala flying fox for misstim target blo hem lo abaot 17 centimeter (6.7 in). According lo samfala researcher, datfala accurate level wea no greater than wan millisecond “bae impossible.” Bat, experiment showim olketa flying fox savve detectim echo insaed 10 nanoseconds (mek-100,000,000 blo wan second), wea datwan mekem hem able for measurem distance wea hem accurate lo wan millimeter or even les than datwan!

 Olketa researcher wakem wanfala electronic cane wea iusim echolocation for helpem olketa blind pipol for visualizem surrounding blo olketa and avoidim object wea blokem olketa, includim tu eniting wea savve bangam hed olsem branch blo tree. Brian Hoyle and Dean Waters, tufala lo olketa designer blo datfala batcane sei: “Mifala barava sapraes and laek designim disfala cane followim ability blo olketa flying fox for iusim echolocation.”

 Wat nao tingting blo iu? Hao, ability blo echolocation wea flying fox garem hem kamap seleva nomoa? Or samwan nao designim?