Lo May 21, 2025, Supreme Court blo Sri Lanka mekem wanfala very important disison wea helpem evri pipol for free for worship lo datfala kantri. Afta 11 years court hem disaed dat olketa police olketa rong taem olketa arrestim olketa brata and sista for expressim faith blo olketa lo peaceful wei. Disfala ruling hem wanfala important legal victory for pipol blo Jehovah lo Sri Lanka for samfala reason. Wanfala samting nao, hem sapotim constitutional right blo Olketa Jehovah’s Witness for sharem biliv blo olketa witim olketa narawan lo peaceful wei. And tu, hem wanfala example for respectim religious freedom lo olketa kantri lo full South Asia region.

Lo October 2014, fofala sista olketa duim preaching waka lo vilij blo Kirama, lo south Sri Lanka. Seknomoa, staka pipol wea kros tumas kam trae for stopem olketa Witness. Taem olketa police arrive, olketa no talem olketa pipol hia for go, bat instead olketa arrestim fofala sista blo iumi. Olketa authorities keepim olketa sista blo iumi ovanaet lo prison without filem eni charges againstim olketa, and putim olketa lo separate cell witim olketa violent criminal. Nomata olsem, olketa sista stay calm and showim olketa trustim Jehovah lo olketa hard taem hia. Lo next day, olketa releasem olketa sista.

Wan month later, lo November 2014, lokol magistrate court dismisim case blo olketa. Bat, from fofala sista hia convince dat authorities violatim human rights blo olketa, olketa filem wanfala complaint lo Human Rights Commission and Supreme Court blo Sri Lanka. Gogo, lo May 2025, Court givim ruling dat authorities violatim rights blo olketa sista during datfala incident, and olketa talem lokol police chief and State for givim selen lo olketa sista hia olsem compensation. Afta disfala ruling blo Supreme Court, Sista Malkanthi sei olsem: “Disfala ruling hem no just wanfala victory for mifala fofala nomoa. Really, disfala victory bae givim evri brata and sista blo iumi lo Sri Lanka right for worship lo peaceful wei. Promis blo God lo Isaiah 54:17 wea ‘no eni weapon wea olketa wakem for againstim iu bae no savve win’ hem barava real lo mi winim enitaem bifor!”

Iumi hapi witim olketa brata and sista blo iumi lo Sri Lanka, for disfala positive ruling wea givim olketa brata and sista right for ‘garem peace and kwaet laef wea diswan bae mekem olketa for faithful lo God.’—1 Timothy 2:2.