Tingim disfala example, if wanfala bon hem brek, iu mas go fixim datwan kwiktaem, mekem bon hia savve gud bak and pain hem stop. Bat pain bae no stop if iu no kwiktaem duim samting for fixim. And worse go moa, datfala bon maet no savve stret bak, and no waka gud olsem bifor.

Olsem datfala bon wea brek and man need for kwiktaem fixim, tufala Christian wea garem problem between each other shud kwiktaem stretem datwan. Sapos nomoa, wei wea tufala feel nogud lo each other bae gohed. And datwan savve mekem tufala for no fren bak moa. Jesus sei: “Kwiktaem stretem eni problem.” (Matt. 5:25) So go lo fren blo iu and story kaen lo hem abaotem wat nao mekem iu feel nogud. Why nao maet hem no isi for duim datwan? Bae iumi storyim tufala reason.

Firstwan, maet iu just laek for leavim go datfala problem and no stretem bikos iu no feel free for story abaotem datwan. b Tingim tufala Christian sista hia Euodia and Syntyche, wea feel nogud lo each other gogo tufala no stretem datwan. Luk olsem problem hia gohed for longtaem, dastawe even aposol Paul wea stap farawe lo Rome tu savve abaotem datwan. Paul encouragem tufala for mas duim samting for stretem datwan mekem tufala stap gud moa. (Phil. 4:2) Tufala savve fren bak moa if tufala hambol, story gud abaotem datfala problem, and forgivim each other.

Mek-tu, maet iu expectim nara person nao shud kam lo iu and talem dat hem rong. Bat, important samting hem for iutufala fren bak and no for pruvim hu nao stret or hu nao rong. Wanfala doctor wea fixim bon bae focus lo hao for joinim bak datfala bon, and no for faendaot lo evri detail abaotem why bon hia brek. Taem iu story witim fren blo iu, no focus lo hu nao kosim datfala problem. Instead, story lo wei wea showim iu tinghae lo frenship blo iutufala, and focus lo wat iu savve duim for fren bak moa witim hem.

Hao sapos iu go story witim brata or sista blo iu tuday, and goal blo iu hem for stretem bak datfala problem for iutufala savve fren bak moa. “No letem sun hem go daon and iu still kros yet.” (Eph. 4:26) Taem iu kwiktaem duim samting for iutufala fren bak moa, iu help for protectim wei wea iumi “stap gud tugeta.”—Eph. 4:​1-3.