Yoweli 3:1-21
3 Muntsiku mwizo komasoti panthawe mwiyo,Nikadzabwezeresa wanthu wa ku Yuda na wa ku Yerusalemu omwe adaphatiwa nkuyendesewa ku ukapolo,
2 Nidzasonkhanise pomwe wanthu wa makhaindi yose,Nkuwabweresa muchigwa cha Yehosafati.*
Ndipo nidzawaweruze kumuko,M’malo mwa wanthu wangu komasoti chuma changu, Izirayeli.
Ndawa adamwaza Aizirayeli pakati pa wanthu wa makhaindi yanango,Komasoti adagawana dziko yangu.
3 Ambachitira maere wanthu wangu.
Ambagulisa mulumbwana kuti alipire hule,Ndipo ambagulisa mtsikana kuti agule vinyu kuti amwe.
4 Komasoti, ko nakuphonyera chaniIwepo Turo na Sidoni komasoti mose wa mu chigawo cha Filisitiya?
Ko munkunichitira vimwevi pakunibwezera vomwe nidachita?
Peno munkunibwezera,Inepano nidzakubwezereni mwakankulumize komasoti mokulumiza maninge vomwe mwanichitira ivo.
5 Ndawa yakuti mwatenga Siliva na golide wangu,Ndipo mwabweresa vinthu vabwino maninge mu kachisi wanu,
6 Komasoti mwagulisa wanthu wa ku Yuda na wa ku Yerusalemu kwa Agiriki,Kuti muwayendese kutali na dziko yawo,
7 Ndipomwapa niwatenge kuti achoke kumalo yomwe mudawagulisa,Ndipo nikubwezereni vomwe mudachita.
8 Nidzagulise wana wanu amuna na akazi kwa wanthu wa ku Yuda.
Iwo adzawagulise kwa wanthu wa ku Sheba, khaindi ya wanthu wa kutali.
Inepano Yahova nanena vimwevi.
9 Lengezani kwa wanthu wa makhaindi yanango kuti:
‘Konzekerani nkhondo! Konzekeresani amuna wamphanvu!
Masocha yose yabwere nkumenya nkhondo!
10 Phulani* maphaza yanu ya magedjo kuti yakhale vibemba komasoti vitsulo vanu votemera miti kuti vikhale mikondo.
Munthu wofoka anene kuti: “Ndine wamphanvu.”
11 Imwepo wanthu wa makhaindi yotizungulira, bwerani mudzathandize ndipo mose musonkhane.’”
Imwepo Yahova bweresani masocha yanu kumalo mwayo.
12 “Makhaindi ya wanthu yanyamuke nkubwera ku chigwa cha Yehosafati,Ndawa nidzakhale kumuko kuti niweruze wanthu wa makhaindi yozungulira.
13 Yambani kumweta na djeko ndawa vokolola vakhuma.
Bwerani nkuyamba kuponda, ndawa moponderamo uva mwadzala.
Malo yochuchiramo vinyu yankutaikira, ndawa voipa vawo vawanda maninge.
14 Wanthu azinji ali muchigwa choweruzira milandu,Ndawa ntsiku ya Yahova yafendera muchigwa choweruzira milandu.
15 Dzuwa na mwezi vidzachite mdima,Ndipo nyenyezi zidzasiye kugaka.
16 Yahova adzabangule kuchokera ku Ziyoni,Ndipo adzayankhule mokuwa ali ku Yerusalemu.
Kudzulu na dziko yapasi vidzagunduzike.
Koma Yahova adzakhale malo yothawirako wanthu wake,Malo ya chitetezo champhanvu kwa Aizirayeli.
17 Ndipo mudzadziwe kuti inepano ndine Yahova Mulungu wanu yemwe nikhala mu Ziyoni, phiri yangu yopatulika.
Yerusalemu adzakhale malo yopatulika,Ndipo wanthu wachilendo* adzapitirelini pomwe mumo.
18 Nthawe mwiyo m’mapiri yakuluyakulu mudzabule vinyu wonzuna.
M’mapiri yang’onoyang’ono mudzayerere nkaka.
Ndipo mu tukamadzi tose twa Ayuda mudzayerere madzi.
M’nyumba ya Yahova mudzakhale ntsantsa,Ndipo adzathirize chigwa cha Miti ya Ntuwetuwe.
19 Koma Iguputo adzakhale matongwe,Ndipo Edomu adzakhale chipululu chiribe kanthu.
Ndawa ya nkhanza zomwe adachitira wanthu wa ku Yuda,Komasoti ndawa ya kupha wanthu wosaphonya mudziko ya Yuda mwiyo.
20 Koma ku Yuda kumbadzakhale wanthu nthawe zose,Ndipo ku Yerusalemu kudzakhale wanthu mibadwomibadwo.
21 Wanthu omwe enze na mulandu* adzakhale alibe mulandu,Ndipo inepano Yahova nimbadzakhale ku Ziyoni.”
