Yoweli 2:1-32
2 “Lizani lupenga mu Ziyoni.
Lengezani mu phiri yangu yochena kuti kunkubwera nkhondo.
Wanthu wose wokhala mudziko mweyi* anjenjemere,Ndawa ntsiku ya Yahova inkubwera ndipo iri pafupi.
2 Mweyi ni ntsiku ya mdima na yobvesa ntsisi,Ntsiku ya mitambo na ya mdima ukulu.
Ntsiku mweyi iri ninge momwe kugwerewera kwa m’madandakucha kuwonekera padzulu pa mapiri.
Pali khaindi ya wanthu azinji komasoti yamphanvu.
Kuyambira kalekale palibe pomwe khaindi inango yomwe ingalingane nayo,Ndipo kudzakhalelini pomwe khaindi inango yolingana nayo,Kumibadwomibadwo.
3 Kutsogolo kwawo moto unkudzonga,Ndipo kumbuyo kwawo moto wawiriwiri unkudzonga.
Dziko yomwe ili patsogolo pawo iri ninge munda wa Edeni,Koma kumbuyo kwawo kuli chipululu,Ndipo palibe chirichose chingapulumuke.
4 Khayindi ya wanthu mwawo iwoneka ninge makavalo,Ndipo athamanga ninge makavalo yankhondo.
5 Amogamoga ndipo achita zungo ninge ngolo zofamba padzulu pa mapiri,Komasoti ninge moto wawiriwiri womwe ukushoka mapesi.
Ali ninge wanthu wamphanvu omwe afola kukonzekera kumenya nkhondo.
6 Wanthu adzakhale na nkhawa ndawa ya khaindi mwiyo.
Nkhope zawo zose zidzakhale zamantha.
7 Athamanga ninge masocha.
Akwira chipupa ninge masocha.
Aliyese afamba mu njira yake.
Ndipo aphonyalini njira zawo.
8 Iwo agwinyanagwinyanalini.
Aliyese afamba mu njira yake.
Munango akalasiwa nkugwa,Anango abwereralini m’mbuyo.
9 Iwo athamangira m’mathaundi ndipo athamanga pa chipupa cha mpanda.
Apakira nyumba ndipo angena na pajanela ninge mbava.
10 Dzombe mwiyo ikambafamba, dziko injenjemera ndipo kudzulu kugunduzika.
Dzuwa na mwezi vapsyipa,Ndipo nyenyezi zaleka kugaka.
11 Yahova adzayankhule na masocha yake mokuwa ndawa wanthu wa mu nsasa mwake ni azinji.
Yemwe ankukwanirisa mawu yake ni wamphanvu.
Ntsiku ya Yahova ni ikulu komasoti yochitisa mantha.
Ko ni mbani angalimbe pa ntsiku mweyi?”
12 Yahova wanena pomwe kuti: “Manje bwererani kwa inepano na ntima wose.
Dzimaneni kudya, lirani mobvesa ntsisi komasoti mokuwa.
13 Ng’ambani mitima yanu, osati vovala vanu,Ndipo bwererani kwa Yahova Mulungu wanu,Ndawa iye ni wachifundo, wabwino ntima, wosakalipa kamangu komasoti wachikondi chokhulupirika chikulu.
Iye adzachinje maganizo yokubwereserani tsoka.
14 Ko ni mbani akudziwa kuti panango adzachinje maganizo,Ndipo adzakusiireni madaliso,Ntsembe ya mbewu na ntsembe yachakumwa kuti mupereke kwa Yahova Mulungu wanu?
15 Lizani lupenga mu Ziyoni.
Lengezani* va nthawe yodzimana kudya. Chitisani nsonkhano wapadera.
16 Sonkhanisani wanthu ndipo muchenese mpingo.
Sonkhanisani amuna wachikulire,* wana komasoti akacheche.
Mwamuna yemwe ankulowola abule m’chipinda chake ndipo nayembo nkazi yemwe ankulowodwa abule m’chipinda chake.
17 Pakati pa khonde na guwa ya ntsembe,Antsembe omwe ni atumiki wa Yahova alire nkumbanena kuti:
‘Imwepo Yahova, bverani ntsisi wanthu wanu,Ndipo ayi kuchitisa manyazi chuma chanu,Kuti wanthu wa makhaindi yanango awatonge.
Wanthu wa makhaindi yanango aleke kunena kuti: “Ko Mulungu wawo ali kuponi?”’
18 Manje Yahova adzachitire ntsanje dziko yake,Ndipo adzachitire chifundo wanthu wake.
19 Yahova adzadawire wanthu wake kuti:
‘Ninkukutumizirani mbewu, vinyu unyowani na mafuta.
Wanthu imwe mudzakhute.
Nidzachitiselini pomwe kuti mumbanyozewe pakati pa wanthu wa makhaindi yanango.
20 Mzondi wa ku norte nidzamuthamangisire kutali na imwepo.
Nidzamuthamangisire kudziko youma komasoti ilibe wanthu,Nkhope yake ilinyang’ane kunyanja* yakumachibese,Ngoto yake iri late kunyanja* yakumaulo.
Pfungo yake yonunkha idzabveke,Ndipo pfungo yake yoipa mwiyo idzafalikire mudziko yose mwiyo,Ndawa Mulungu adzachite vinthu vikulu.’
21 Ayi kuchita mantha iwepo dziko.
Kondwa ndawa Yahova adzachite vinthu vikulu.
22 Imwepo vilombo vakuthengo ayi kuchita mantha,Ndawa malo yodyeserako vipfuwo kuthengo yadzamere msipu wopsyipirira.
Nayombo miti yadzabereke vipaso.
Muti wa nkuyu na muti wa uva udzabereke vipaso vizinji.
23 Imwepo wana amuna wa Ziyoni kondwani ndawa ya Yahova Mulungu wanu.
Iye adzakupaseni nvula yoyambirira pa mpimo wabwino,Ndipo adzakugwesereni nvula ya mbvumbi,Nvula yoyambirira na nvula yomalizira, ninge momwe venzere pakuyamba.
24 Malo yopulira mbewu yadzadzale na mbewu,Ndipo malo yokonzera vinyu komasoti mafuta yadzataikire.
25 Nidzakubwezereni mbewu za magole yoseZomwe dzombe, wana wa dzombe alibe matengera komasoti dzombe yodzonga idadya.
Imweyi ni gulu yangu yankhondo yomwe nidakutumizirani.
26 Mudzadye nkukhuta,Ndipo mudzatamande dzina ya Yahova Mulungu wanu,Yemwe wakuchitirani vodabwisa.
Wanthu wangu adzachitelini pomwe manyazi mpakana kalekale.
27 Mudzadziwe kuti inepano nili pakati pa Izirayeli,Komasoti kuti inepano ndine Yahova Mulungu wanu ndipo palibe pomwe munango.
Wanthu wangu adzachitelini pomwe manyazi mpakana kalekale.
28 Vimwevi vikadzachitika nidzapereke* mzimu wangu kwa chamoyo chirichose,Ndipo wana wanu amuna na wana wanu akazi adzanene vakutsogolo.
Amuna wachikulire adzalotere,Ndipo alumbwana adzawone masomphenya.
29 Olo akapolo wangu amuna na akazi,Nidzawapase mzimu wangu muntsiku mwezo.
30 Nidzachite vodabwisa kudzulu na padziko yapasi.
Padzakhale magazi, moto na utsi uzinji wokwira m’dzulu.
31 Dzuwa idzachite mdima ndipo mwezi udzachite magazi,Ntsiku ikulu na yochitisa mantha ya Yahova ikanati yafika.
32 Ndipo aliyese wochemera pa dzina ya Yahova adzapulumuke,Ndawa m’phiri ya Ziyoni komasoti mu Yerusalemu mudzakhale wanthu opulumuka ninge momwe Yahova adanenera.
Wanthu opulumuka omwe Yahova ankuwachemera.”
