Genezesi 49:1-33
49 Patsogolo pake Yakobo adachemera wana wake nkuwauza kuti: “Sonkhanani pabodzi kuti nikuuzeni vomwe vidzakuchitikireni kutsogolo.
2 Bwerani mose imwepo wana wa Yakobo kuti mubvesere. Bwerani kuti mutetekere Izirayeli baba wanu.
3 Rubeni, iwepo ndiwe mwana wangu woyamba kubadwa, mphanvu yangu na poyambira mphanvu zangu zobereka. Umbafunika kukhala na ulemu ukulu na mphanvu zizinji.
4 Koma udzakhalelini wapadzulu kuposha azibale wako, ndawa ninge madzi yosefukira udakangira kudziphata, ndipo udapakira pogona pa ababa wako. Panthawe mwiyo udapsyipiza* m’bedi wangu. Shuwa adagonapo muyu!
5 Simiyoni na Levi m’paubale pawo. Vibemba vawo ni vitsulo vochitira nkhanza.
6 Iwe moyo wangu, ayi kukhala nawo pabodzi pagulu yawo. Iwe ntima wangu, ayi kubverana na mpingo wawo, ndawa padakalipa adapha wanthu, ndipo adapundula* ng’ombe zimuna pofuna kukondwa.
7 Ukali wawo ukhale wotembererewa ndawa ni wankhanza, ndipo kukalipa kwawo kukhale kotembererewa ndawa ni kwankhondo. Nidzawamwaze mwa Yakobo ndipo nidzawabalalise mwa Izirayeli.
8 Koma iwepo Yuda, azibale wako adzakutamande. Djanja yako idzakhale pakhosi ya azondi wako. Wana wa ababa wako adzakujolimire.
9 Yuda ni mwana wa mphondolo. Mwana wangu, ukadzadya nyama yomwe wapha udzachokepo. Iye wafunya nkhongono zake nkuzithamula ninge mphondolo yomwe yagona pasi. Ndipo molingana na mphondolo, ni mbani yemwe angamumuse?
10 Mpsimbo* yachifumu idzachokelini kwa Yuda, komasoti m’bonga wa wotonga udzachokelini pakati pa mapazi yake mpakana Silo* adzabwere. Ndipo mitundu ya wanthu yadzamubvere.
11 Ali mangirire bulu wake pamuti wa uva na kamwana ka bulu wake pamuti wa uva wabwino, adzawatche vovala vake mu vinyu komasoti malaya yake m’madzi yofuwira ya uva.
12 Maso yake ni yofuwira ndawa ya vinyu, ndipo manu yake ni yochena ndawa ya nkaka.
13 Zebuloni adzakhale m’mphepete mwa nyanja, adzakhale pafupi na poimisira mabarko. Malire yake yakutali yadzakhale chaku Sidoni.
14 Isakara ni bulu wa mabonzo yolimba. Agona pasi kuti apumule ali takule masakha yawiri ya vinthu.
15 Adzaone kuti malo mwayo yopumulira ni yabwino, nakuti dziko mwiyo ni yokomedza. Adzajolimise phikiti yake kuti anyamule ntolo, ndipo adzabvume kuphata basa mochichimiziwa.
16 Dani adzaweruze wanthu wa khaindi yake ninge m’bodzi wa madzinza ya Izirayeli.
17 Dani adzakhale nyoka yobishala m’mbalim’mbali mwa nsewu, nyoka yokhala na tuminyanga yobishala m’mphepete mwa njira, yomwe iluma tukatendeni twa kavalo ndipo yemwe wakwirapo akugwa chagada.
18 Nidzadikhire chipulumuso kuchokera kwa imwepo Yahova.
19 Pakunena va Gadi, gulu ya vigananga idzamuchite nkhondo, koma iye adzalimbane navo, ndipo vigananga mwivo pothawa adzavimenye maninge.
20 Chakudya cha Aseri chidzakhale chizinji, ndipo adzapereke chakudya chofunikira mpfumu.
21 Nafitali ni bawala ikazi yopepuka minyendo, ndipo ayankhula mawu yokomedza.
22 Yosefe ni mphukira ya muti wobala vipaso. Iye ni muti wobala vipaso pa ntsantsa, womwe nthawi zake zifika padzulu pa chipupa cha mpanda.
23 Koma othusa tumikondo na uta alibe kuleka kumudzudza, kumulasa na kumusungira chizondo.
24 Koma uta wake udapitiriza kukhala pamalo yake, ndipo manja yake yadapitiriza kukhala yamphanvu na yochenjera. Vimwivi vidachokera m’manja mwa wamphanvu wa Yakobo, vidachokera kwa nyakabusa, mwala wa Izirayeli.
25 Iye* ni wochokera kwa Mulungu wa ababa wako ndipo adzakuthandize. Iye ali pabodzi na Wamphanvu zose, ndipo Mulungu muyo adzakudalise pakukupasa madzi yochokera kudzulu na yochokera pantsi pa dothi. Adzakudalise pakukupasa wana na vipfuwo vizinji.*
26 Madaliso ya ababa wako yadzaposhe madaliso ya mapiri yazinji yomwe yadzakhalepo mpakana kalekale. Yadzaposhe pomwe vinthu vokhumbirika va mitunthu yosamala. Madaliso mwayo yadzapitirize kukhala pansolo pa Yosefe, pampsoma pa wosankhuliwa pakati pa azibale wake.
27 Benjamim adzapitirize kukhwadzula ninge mphumphi. Machibese adzadye nyama yomwe waphata, ndipo maulo adzagawe vinthu vomwe watenga pawawina azondi wake.”
28 Kwa mwawa ndiko kudachokera madzinza 12 ya Izirayeli, ndipo vimwevi ndivo vomwe ababa wawo adawauza pomwe ambawadalisa. Aliyese adamupasa madaliso yomuyenerera.
29 Padateno adawalamula kuti: “Ine uno ni ulendo woyenda komwe kudayenda azibereki wangu.* Mukaniikhe pabodzi na azibereki wangu, m’mphako yomwe iri m’munda wa Efuroni, Muhiti.
30 Shuwadi mukaniikhe m’mphako yomwe iri m’munda wa Makipela, womwe ni wonyang’anana na munda wa mamure mudziko ya Kanani. Munda muyo ni womwe Abulahamu adagula kwa Efuroni, Muhiti, kuti yakhale manda.
31 Kumuko ndiko kwadaikha Abulahamu na nkazi wake Sara. Ndiko kwadaikha Isaki na nkazi wake Rabeka, ndipo ndiko kwanidaikhambo Leya.
32 Munda muyo na mphako yomwe iri mumo, adagula kwa wana wa Heti.”
33 Yakobo padamaliza kupereka malangizo kwa wana wake mwawo, anabwezera pomwe minyendo yake pam’bedi, nkumwalira. Patsogolo pake adaikhiwa m’manda ninge momwe vidakhalira na azibereki wake.
Mawu ya m’nyantsi
^ Panango kuti: “udaipisa.”
^ Ambazipundula pakugwata uzingo wakuseri kwa mwendo wakumbuyo.
^ Panango kuti: “Ndodo.”
^ Kutanthauza kuti: “yemwe ni chake; munikachiro.”
^ Kutanthauza Yosefe.
^ Muchiyankhulo choyambirira adati: “madaliso ya masuku na mimba.”
^ Pamwapa akutanthauza kufa.
