Genezesi 39:1-23
39 Patsogolo pake Aisimaeli wale adayenda naye Yosefe ku Iguputo ndipo adamugulisa kwa munthu munango wa ku Iguputo dzina yake Potifara. Potifara wenze nkulu wapanyumba ya Farao, komasoti nkulu wa masocha yoteteza mpfumu.
2 Koma Yahova wenze na Yosefe, mwakuti chirichose chomwe ambachita chimbamufambira bwino. Ndipo adaikhiwa kuti ambanyang’anire nyumba ya munthu wa ku Iguputo ule, yemwe wenze bwana wake.
3 Bwana wake muyo adawona kuti Yahova wenze na mulumbwana muyo nakuti Yahova ambathandiza mulumbwana muyo kuti chirichose chomwe ambachite chimbafambe bwino.
4 Potifara adapitiriza kumukonda Yosefe ndipo adakhala ntumiki yemwe ambamuthemba. Pamwapo adamusankhula kuti akhale wonyang’anira nyumba yake na vinthu vose vomwe wenze navo.
5 Kundoyambira pomwe Potifara adasankhula Yosefe kukhala wonyang’anira nyumba yake na vinthu vake vose, Yahova adapitiriza kudalisa nyumba ya munthu wa ku Iguputo muyo ndawa ya Yosefe. Yahova adadalisa vose vam’nyumba ya Potifara komasoti vakumunda.
6 Patsogolo pake Potifara adasiya vinthu vake vose m’manja mwa Yosefe, mwakuti ambakhalalini na nkhawa na chirichose kuchosapo kusankhula chakudya chakuti adye. Komasoti Yosefe wenze wowoneka bwino komasoti wathupi yokonzewa bwino.
7 Patsogolo pake, nkazi wa bwana wake adayamba kukhumbira Yosefe, mwakuti ambamuuza kuti: “Ugone nane.”
8 Koma Yosefe ambalamba ndipo ambauza nkazi wa bwana wake muyo kuti: “Abwana wangu akhalalini na nkhawa na chirichose m’nyumba muno ndawa ya inepano, ndipo chirichose chomwe iwo ali nacho achisiya m’manja mwangu.
9 M’nyumba muno mulibe wonyang’anira woposha inepano, ndipo abwana wangu adaikha chirichose m’manja mwangu kuchosapo imwepo, ndawa ndimwe akazi wawo. Manje ningachitirenyi choipa chikulu tene nkuchimwira Mulungu?”
10 Nkazi muyo ambayankhula na Yosefe ntsiku na ntsiku, koma iye alibe kubvera vakuti agone pambali pake panango kuti agone naye.
11 Ntsiku inango Yosefe adangena m’nyumba kuti aphate basa yake, ndipo m’nyumba mumo mwenze mulibe anyabasa anango.
12 Pamwapo nkazi muyo adaphata malaya ya mulumbwana muyo nkumuuza kuti: “Ugone nane basi!” Koma mulumbwana muyo adandovula malaya mwayo nkuyasiya m’manja mwa nkazi muyo nkuthawira panja.
13 Nkazi muyo padawona kuti mulumbwana muyo wasiya malaya yake m’manja mwake nkuthawira panja,
14 adayamba kukuwirira anyabasa anango wa m’nyumba mumo, kuti: “Onani! Adatibweresera mwamuna wa Chiheberi uyu kuti adzatichitire vinthu vapezipezi kuti tisekewe na wanthu. Iye wenze wabwera kwa inepano kuti aniponderere nani, koma nakuwa maninge.
15 Manje pawawona kuti nayamba kukuwa, wasiya malaya yake pambali pangu apa nkuthawira panja.”
16 Padateno, adasunga malaya ya mulumbwana muyo pambali pake mpakana nthawe yomwe mwamuna wake adabwera kunyumba muko.
17 Mwamuna wake padafika, nkazi muyo adamuuza pomwe mawu yabodzibodzi yale yakuti: “Nyabasa wa Chiheberi yemwe mudatibweresera ule, wenze wabwera kwa inepano kuti anichite vinthu vapezipezi.
18 Koma pawawona kuti nayamba kukuwa, wasiya malaya yake pambali pangu apa nkuthawira panja.”
19 Bwana wa mulumbwana muyo padabva vomwe nkazi wake adamuuza vakuti: “Nyabasa wanu wachita vakutivakuti,” adakalipa maninge.
20 Pavidateno, bwana wake wa Yosefe adamutenga nkukamusiya kudjeri ya wanthu wadjeri wa mpfumu kuti akamufungire, ndipo Yosefe adakhala kumuko.
21 Koma Yahova adapitiriza kukhala na Yosefe nkumbamuwonesa chikondi chokhulupirika ndipo adachitisa kuti nkulu wonyang’anira djeri ambamukonde.
22 Pamwapo, nkulu wonyang’anira djeri muyo adasankhula Yosefe kuti ambanyang’anire wadjeri wose mudjeri mumo na chirichose chomwe chimbachitika mumo.
23 Nkulu wonyang’anira djeri muyo ambanyang’aniralini pomwe chirichose chomwe chenze m’manja mwa Yosefe. Venze teno ndawa Yahova wenze na Yosefe, ndipo Yahova ambamuthandiza kuti chirichose chomwe iye ambachite chimbafambe bwino.
