Ekisodo 2:1-25
2 Panthawe mwiyo, mwamuna munango wadzinza ya Levi adalowola nkazi yemwe wenze pomwe wadzinza ya Levi.
2 Nkazi muyo adakhala na mimba nkubereka mwana mwamuna. Padaona kuti mwana muyo ni wokhuza, adamubisa kwa minyezi yatatu.
3 Mwana muyo padafika pakuti angakwaniselini pomwe kumubisa, adatenga kasesto* kokonzewa na malulu* nkukamata na phula. Patsogolo pake adaikhamo mwana muyo nkukakasiya pakati pa ntsanga* mphepete mwa kamadzi ka Nilo.
4 Koma mulongosi wake adaima patali kuti awone vomwe vingachitikire mwana muyo.
5 Mwana nkazi wa Farao adayenda kukasamba mu kamadzi ka Nilo, atsikana wake omutumikira ambafamba mphepete mwa kamadzi mwako. Patsogolo pake iye adaona kasesto kale kali pakati pa ntsanga. Nthawe mwiyoletu adatuma kapolo wake nkazi kuti akakatenge.
6 Padakafungula adaona kuti muli mwana mwamuna, ndipo ambalira. Iye adamubvera chifundo, ndipo adanena kuti: “Muyu ni m’bodzi mwa wana wa Chiheberi.”
7 Pavidateno, mulongosi wake ule adauza mwana nkazi wa Farao kuti: “Ko mungakonde kuti nikakuchemerereni mayi woyamwisa wa Chiheberi kuti akakulerereni mwana muyu?”
8 Mwana wa Farao muyo adamudawira kuti: “Inde yenda!” Nthawe mwiyoletu ntsikana muyo adayenda kukachemera amayi wake wa mwana muyo.
9 Pamwapo mwana wa Farao adauza mayi muyo kuti: “Tenga mwana moyu ukanilerere ndipo inepano nimbakulipire.” Pamwapo mayi muyo adatenga mwana muyo ndipo adamulera.
10 Mwana ule padakula, adayenda naye kwa mwana wa Farao, ndipo adakhala mwana wake. Pavidateno, adamupasa dzina yakuti Mose,* nkunena kuti: “Ndawa yakuti nidamuvuula m’madzi.”
11 Manje muntsiku mwizo, Mose padakula* adayenda kwa azibale wake kuti akaone momwe ambabonerera na basa ya ukapolo yomwe ambaphata. Kumuko adaona m’bale wake wa Chiheberi ankumenyewa na nzika inango ya ku Iguputo.
12 Pamwapo adanyang’ana uku na uku ndipo padaona kuti palibe yemwe ankumuona, adapha munthu wa ku Iguputo muyo nkumubisa munchenga.
13 Koma mangwana yake padayenda pomwe, adagumana amuna awiri wa Chiheberi akumenyana. Pamwapo adabvunza wophonya ule kuti: “Ukumumenyera chani munzako?”
14 Pakudawira iye adati: “Ni mbani yemwe adakupasa udindo wakuti umbatitonge na kutiweruza? Ko ukufuna kunipha ninge momwe udaphera nzika ya ku Iguputo ire?” Pavidateno Mose adachita mantha ndipo mu ntima mwake adati: “Apa nkhani ire yadziwika basi!”
15 Patsogolo pake Farao adabva va nkhani mwiyi ndipo ambafuna kupha Mose. Koma Mose adathawa Farao nkuyenda kukakhala kudziko ya Midiyani. Padafika kumuko, adakhala pafupi na chitsime.
16 Manje wantsembe wa ku Midiyani wenze na wana akazi 7. Iwo adafika pachitsime mwapo kuti atunge madzi na kuyathira momweramo vipfuwo kuti vipfuwo va ababa wawo vimwe.
17 Koma ninge mwavingakhalira ntsiku zose, kudafika anyakabusa nkuthamangisa atsikana mwawo. Pavidateno Mose adanyamuka nkuthandiza* atsikana mwawo, ndipo iye adamwesa vipfuwo vawo.
18 Manje atsikana mwawo padafika kumuyi, ababa wawo a Reueli* adadabwa ndipo adati: “Mwakwanisa tani kubwera mwakankulumize lero?”
19 Iwo adadawira kuti: “Munthu munango wa ku Iguputo watiletserera kwa anyakabusa, komasoti watitungira madzi nkutimwesera vipfuwo.”
20 Iye adabvunza wana wake mwawo kuti: “Manje iye ali kuponi? Mwamusiira chani? Yendani mukamuchemere kuti tidzadye naye chakudya.”
21 Pavidateno Mose adabvuma kukhala na Reueli, ndipo iye adapereka Zipora mwana wake nkazi kwa Mose kuti akhale nkazi wake.
22 Patsogolo pake Zipora adabereka mwana mwamuna ndipo Mose adamupasa dzina yakuti Gerisomu,* ndawa adati: “Nakhala mulendo mudziko yachirendo.”
23 Paidapita nthawe itali mpfumu ya Iguputo idamwalira. Koma Aizirayeli adapitiriza kubonera ndawa ya ukapolo ndipo ambalira modandaula. Iwo adapitiriza kulirira Mulungu chaiye kuti awathandize ndawa ya ukapolo muyo.
24 Paidapita nthawe, Mulungu adabva kubuula kwawo ndipo adakumbukira pangano yake na Abulahamu, Isaki na Yakobo.
25 Pamwapo Mulungu adanyang’ana Aizirayeli ndipo adaona momwe ambabonerera.
Mawu ya m’nyantsi
^ Panango kuti: “kabokosi.”
^ Panango kuti: “nthokwe.”
^ Panango kuti: “mitete.”
^ Kutanthauza kuti: “wovuuliwa” panango kuti, wopulumusiwa m’madzi.
^ Panango kuti: “padayamba kukhala wamphanvu.”
^ Panango kuti: “nkuteteza.”
^ Reueli ambadziwika pomwe kuti Yetero.
^ Kutanthauza kuti: “mulendo kumuko.”
