Ekisodo 13:1-22
13 Yahova adayankhula pomwe na Mose kuti:
2 “Nipatulireni* mwana aliyese mwamuna woyamba kubadwa,* wa munthu na wachipfuwo pakati pa Aizirayeli. Muyu ni wangu.”
3 Patsogolo pake Mose adauza wanthu mwawo kuti: “Mumbakumbukire ntsiku ya lero yomwe mwabula mu Iguputo, m’nyumba ya ukapolo ndawa Yahova wakubulisani mudziko mweyi na djanja yake yamphanvu. Ndipomwapa ayi kumbadya chirichose chokhala na vofufumisa.
4 Lero munkubula mudziko ya Iguputo m’mwezi wa Abibu.*
5 Yahova akadzakungenesani mudziko ya Akanani, Ahiti, Aamori, Ahivi na Ayebusi, dziko yomwe iyerera nkaka na uchi yomwe adalumbira kwa azibereki wanu kuti adzakupaseni, mumbadzachite mwambo muyu m’mwezi mwauno.
6 Mumbadzadye mikate yalibe vofufumisa kwa masiku 7 ndipo pa ntsiku yachi 7 mumbadzachite chikondwerero kwa Yahova.
7 Mumbadzadye mikate yalibe vofufumisa kwa ntsiku 7 osati mumbadzagumanike na chirichose chokhala na vofufumisa. Ufa wokanya okhala na vofufumisa osati umbadzagumanike palipose mudziko yanu.
8 Manje pantsiku mwiyo mumbadzauze wana wanu kuti: ‘Tinkuchita vimwevi ndawa ya vomwe Yahova adatichitira pakutibulisa mu Iguputo.’
9 Mwambo muyu ukhale ninge chizindikiro chonembewa padjanja yanu na pankuma panu.* Umbakukumbuseni kuti mumbayankhule va chilamulo cha Yahova. Umbakukumbuseni pomwe kuti Yahova ndiye adakubulisani mudziko ya Iguputo na djanja yake yamphanvu.
10 Mumbatewedze lamulo mweyi panthawe yake yoikhiwiratu gole iriyose.
11 Yahova akadzakungenesani mudziko ya Akanani, yomwe adalumbira kuti adzaipereke kwa imwepo na kwa azibereki wanu,
12 Mumbadzapereke kwa Yahova mwana aliyese mwamuna woyamba kubadwa,* wa munthu komasoti wa chipfuwo. Chimuna chirichose ni cha Yahova.
13 Mwana aliyese woyamba kubadwa wa bulu mumbamuwombole na nkhosa, koma peno mungamuwombolelini mumbamuthyole khosi. Ndipo mwana wanu aliyese mwamuna woyamba kubadwa mumbamuwombole.
14 Manje kutsogolo wana wanu akambadzakubvunzani kuti: ‘Ko vimwevi vinkutanthauza chani?’ Mumbadzawadawire kuti: ‘Yahova adatibulisa na djanja yake yamphanvu mu Iguputo m’nyumba ya ukapolo.
15 Farao padalamba mouma ntima kuti tichoke, Yahova adapha mwana woyamba kubadwa mudziko yose ya Iguputo kuyambira mwana woyamba kubadwa wa munthu mpakana mwana woyamba kubadwa wa nyama. Ndipomwapa tinkupereka ntsembe kwa Yahova wana wose wa nyama oyamba kubadwa* komasoti tinkuwombola mwana wathu mwamuna aliyese woyamba kubadwa.’
16 Mwambo muyu ukhale ninge chizindikiro chonembewa padjanja yanu komasoti pankuma panu,* ndawa Yahova adatibulisa mu Iguputo na djanja yake yamphanvu.”
17 Farao padabvumiza kuti Aizirayeli ayende, Mulungu alibe kuwapitisa na mudziko ya Afilisiti olo kuti yenze njira yachigwato, ndawa Mulungu adati: “Wanthu angayambe kuchinja maganizo akagumana na nkhondo ndipo angabwerere ku Iguputo.”
18 Pamwapo Mulungu adachitisa kuti Aizirayeli apite na njira itali yopita na kuchipululu chapafupi na Nyanja Ifuwira. Koma pakubula mu dziko ya Iguputo, Aizirayeli adafamba mwadongosolo ninge magulu yamasocha.
19 Mose adanyamula pomwe mabonzo ya Yosefe ndawa Yosefe adalumbirisa wana wa Izirayeli kuti: “Shuwadi, Mulungu adzakukumbukireni, ndipo pochoka kuno mudzanyamule mabonzo yangu.”
20 Iwo adanyamuka ku Sukoti nkukamanga msasa ku Etamu m’malire yachipululu.
21 Pakufuna kuwatsogolera, Yahova ambafamba patsogolo pawo. Masikati ambawatsogolera pakuphatisa basa chipilala cha ntambo. Ndipo usiku ambawatsogolera pakuphatisa basa chipilala cha moto kuti chimbawavunikire. Ndipomwapa ambakwanisa kufamba masikati na usiku.
22 Chipilala cha ntambo chimbachokalini patsogolo pa wanthu mwawo masikati, komasoti chipilala cha moto chimbachokalini patsogolo pawo usiku.
Mawu ya m’nyantsi
^ Panango kuti: “Muchenese.”
^ Muchiyankhulo choyambirira adati: “mwana aliyese woyamba kubadwa, wofungula mimba ya mayi aliyese.”
^ Onani vakumapeto B15.
^ Muchiyankhulo choyambirira adati: “pakati pa maso yanu.”
^ Muchiyankhulo choyambirira adati: “aliyese wofungula mimba ya amayi wake.”
^ Muchiyankhulo choyambirira adati: “iriyose yofungula mimba ya mayi wake.”
^ Muchiyankhulo choyambirira adati: “pakati pa maso yanu.”
