Samueli wachiwiri 4:1-12
4 Isi-boseti mwana wa Sauli, padabva kuti Abineri wafa ku Heburoni, adazizira m’nkhongono* ndipo Aizirayeli wose adasokonezeka.
2 Penze amuna awiri omwe enze atsogoleri wa magulu ya vigananga ya mwana wa Sauli. Munango dzina yake wenze Bana ndipo munango wenze Rekabu. Wose mwawa enze wana wa Rimoni wa ku Beeroti wa dzinza ya Benjamim. (Ndawa dera ya Beeroti imbawonewa pomwe kuti ni malo ya dzinza ya Benjamim.
3 Wanthu wa ku Beeroti adathawira ku Gitaimu, ndipo akhala kumuko ninge alendo mpakana lero.)
4 Yonatani mwana wa Sauli wenze na mwana mwamuna wopunduka mapazi. Mwana muyu wenze na magole 5 pomwe kudabwera mawu kuchokera ku Yezereeli yakuti Sauli na Yonatani afa. Mawu mwaya payadafika, mayi yemwe ambamusamalira adamunyamula nkuyamba kuthawa. Pomwe ambathawa mwamantha, mayi muyo adagwesa mwana ndipo mwana muyo adapunduka. Mwana muyo dzina yake yenze Mefiboseti.
5 Rekabu na Bana, wana amuna wa Rimoni wa ku Beeroti, adayenda kumuyi kwa Isi-boseti masikati kunkutentha, ndipo adamugumana wagona kuti apumule.
6 Iwo adangena m’nyumba mumo ninge ankufuna kukatenga tirigu, patsogolo pake adalasa Isi-boseti pamimba. Padateno, Rekabu na m’bale wake Bana adathawa.
7 Iwo padangena m’nyumba mumo, adagumana Isi-boseti ali gone pa m’bedi kuchipinda kwake ndipo adamulasa nkumupha. Patsogolo pake adamugwata nsolo nkuutenga ndipo adafamba usiku wose munsewu woyenda ku Araba.
8 Nsolo wa Isi-boseti muyo adafika nawo kwa Davide ku Heburoni ndipo adauza mpfumu mwiyo kuti: “Takubwereserani nsolo wa Isi-boseti mwana wa mzondi wanu Sauli, yemwe ambafuna kukuphani. Lero Yahova wabwezera Sauli na mbadwa zake pa vomwe adakuchitirani imwepo mpfumu yangu.”
9 Koma Davide adadawira Rekabu na m’bale wake Bana, wana wa Rimoni wa ku Beeroti kuti: “Ninkulumbira mudzina ya Yahova Mulungu wamoyo, yemwe adanipulumusa m’masautso yangu yose,
10 munthu munango padanibweresera mawu yakuti: ‘Sauli wafa,’ poganiza kuti wabweresa mawu yabwino, inepano nidamuphata nkumupha ku Zikilaga. Malipiro ya mawu yomwe adabweresa yenze mwayo.
11 Manje ko tani pomwe wanthu oipa apha munthu wolungama pa m’bedi m’nyumba yake? Ko ninkufunikalini kukuphani pakubwezera magazi yake kwa imwepo na kukuchosani padziko iyi?”
12 Pamwapo Davide adalamula alumbwana wake kuti aphe Rekabu na Bana. Patsogolo pake adawagwata manja na minyendo nkuwamanika pafupi na damu ya ku Heburoni. Koma adatenga nsolo wa Isi-boseti nkuuikha m’manda ya Abineri ku Heburoni.
Mawu ya m’nyantsi
^ Panango kuti: “adamala mphanvu.”
