Samueli wachiwiri 13:1-39
13 Abisalomu mwana wa Davide, wenze na mulongosi wake wokhuza maninge dzina yake Tamara. Ndipo mwana munango wa Davide dzina yake Aminoni, adayamba kukonda maninge Tamara.
2 Vimwivi vidashupisa maninge maganizo ya Aminoni, mwakuti adadwala ndawa ya mulongosi wake Tamara. Pakuti Tamara wenze namwali, vimbawoneka kuti palibe chomwe Aminoni angachite.
3 Aminoni wenze na munzake dzina yake Yehonadabu, mwana wa Simeya, m’bale wake wa Davide. Yehonadabu wenze munthu wochenjera maninge.
4 Manje Yehonadabu adabvunza Aminoni kuti: “Ndawa chani iwepo mwana wa mpfumu ntsiku iriyose uwoneka wosakondwa? Niuze.” Aminoni adadawira kuti: “Inepano ninkumufuna maninge Tamara, mulongosi wake wa m’bale wangu Abisalomu.”
5 Padateno, Yehonadabu adamuuza kuti: “Ugone pa m’bedi pako ndipo unamizire kudwala. Ababa wako akabwera kudzakuwona udzawauze kuti: ‘Ninkukumbira kuti mulongosi wangu Tamara abwere kudzanipasa chakudya. Akadzaniphikira chakudya,* inepano ninkuwona, nidzadye chiri m’manja mwake.’”
6 Pamwapo Aminoni adagona nkunamizira kudwala. Pavidateno mpfumu idabwera kudzamuwona ndipo Aminoni adauza mpfumu mwiyo kuti: “Ninkukumbira mulongosi wangu Tamara abwere kudzaniphikira makeke* ine ninkuwona kuti nidye chakudya kuchokera m’manja mwake.”
7 Pavidateno, Davide adatumiza mawu kwa Tamara yakuti: “Pulizi, yenda kumuyi kwa m’bale wako Aminoni ukamuphikire chakudya.”*
8 Pamwapo, Tamara adayenda kumuyi kwa m’bale wake Aminoni, ndipo adamugumana ali gone. Pamwapo adamunya ufa, nkukonza makeke Aminoni uyo ankuona, patsogolo pake adayaphika.
9 Padamaliza, adatenga makeke mwayo nkupasa Aminoni. Koma Aminoni adalamba kudya ndipo adati: “Aliyese abule muno!” Pamwapo aliyese adabula.
10 Pamwapo Aminoni adauza Tamara kuti: “Bweresa chakudya* kuchipinda kuno kuti nidye chiri m’manja mwako.” Pamwapo Tamara adatenga makeke yomwe adaphika ayo, nkuyenda nayo kwa m’bale wake Aminoni ku chipinda.
11 Ankumupasa kuti adye, Aminoni adamuphata nkumuuza kuti: “Bwera ugone nane mulongosi wangu.”
12 Koma Tamara adamuuza kuti: “Neye, m’bale wangu! Ayi kunichitisa manyazi, ndawa vimwivi vikalibe vachitikako mu Izirayeli. Ayi kuchita vinthu vochitisa manyazi ninge vimwivi.
13 Ko inepano nimbakhale tani vimwivi vikachitika? Komasoti Aizirayeli ambakuwoneni ninge munthu woipa komasoti wochitisa manyazi. Yankhulani na mpfumu ndawa angakulambizelini kuti munitenge.”
14 Koma Aminoni alibe kumubvera ndipo pakuti wenze na mphanvu kuposha Tamara, adamuponderera.
15 Aminoni padachita vimwivo, adayamba kumuzonda maninge. Adamuzonda maninge kuposha momwe ambamukondera, mwakuti adamuuza kuti: “Nyamuka umbayende!”
16 Koma Tamara adamudawira kuti: “Neye m’bale wangu, ayi kuchita teno. Kunithamangisa komwe munkuchita uku ni koipa maninge kuposha vomwe mwachita ivi!” Koma Aminoni alibe kumubvera.
17 Patsogolo pake Aminoni adauza ntumiki wake kuti: “Mubulise uyu muno. Ukamubulisa, ukhiye nsuwo.”
18 (Tamara wenze adavala nkhanjo wapadera womwe ambavala wana akazi wa mpfumu omwe enze anamwali.) Pamwapo ntumiki wake ule adamubulisa nkukhiya nsuwo.
19 Patsogolo pake Tamara adadziyikha dotha munsolo komasoti adang’amba nkhanjo wake womwe wenze adavala ule. Ndipo adaikha manja yake pansolo nkunyamuka nkumbayenda achilira.
20 Pavidateno, m’bale wake Abisalomu adamubvunza kuti: “Ko wenze na m’bale wako Aminoni? Undokhala chete mulongosi wangu. Muyu ni m’bale wako. Ayi kudandaula navo maninge, ndovisiya.” Pamwapo Tamara ambandokhala kumuyi kwa m’bale wake Abisalomu ndipo ambachezalini na aliyese.
21 Mpfumu Davide padabva vomwe vidachitika ivo, adakalipa maninge. Koma alibe kufuna kumukalipisa mwana wake Aminoni ndawa ambamukonda maninge pakuti wenze mwana wake woyamba kubadwa.
22 Abisalomu alibe kuyankhula chabwino panango choipa chirichose kwa Aminoni. Abisalomu adazonda Aminoni ndawa yoponderera mulongosi wake Tamara.
23 Payadapita magole yawiri, anyabasa wa Abisalomu ambagera ukuse wa nkhosa ku Baala-hazori pafupi na Efuraimu. Ndipo Abisalomu adachemera wana amuna wose wa mpfumu.
24 Abisalomu adayenda kwa mpfumu nkunena kuti: “Inepano ntumiki wanu, anyabasa wangu ankugera ukuse wa nkhosa. Ninkukumbira kuti imwepo mpfumu na atumiki wanu muyende nane pabodzi.”
25 Koma mpfumu idadawira Abisalomu kuti: “Neye mwana wangu. Tikayenda tose, tikakupase basa.” Podiya kuti Abisalomu adapitiriza kugwigwirira, mpfumu mwiyo iribe kubvuma kuyenda koma idamudalisa.
26 Patsogolo pake Abisalomu adati: “Pakuti imwepo muyendelini, ninkukumbira kuti m’bale wangu Aminoni ayende nase.” Mpfumu idamubvunza kuti: “Ndawa chani unkufuna kuti ayende nawe?”
27 Koma Abisalomu adagwigwirira, pamwapo mpfumu idabvuma kuti Aminoni na wana wose wa mpfumu ayende naye.
28 Patsogolo pake Abisalomu adalamula atumiki wake kuti: “Mukhale tcheru ndipo Aminoni akandoyamba kukondwa na vinyu, inepano nikuuzeni kuti: ‘Mupheni Aminoni!’ Vikateno mumuphe. Ayi kugopa. Inepano ndine nakulamulani. Muchite vinthu mwamphanvu komasoti molimba ntima.”
29 Pamwapo atumiki wa Abisalomu adapha Aminoni mobverana na vomwe Abisalomu muyo adalamula. Pavidateno, wana wose wa mpfumu adanyamuka ndipo aliyese adakwira nyulu* yake nkuthawa.
30 Wana mwawo ali munjira, mawu yadafika kwa Davide yakuti: “Abisalomu wapha wana wose wa mpfumu ndipo palibe yemwe wapulumuka.”
31 Mpfumu paidabva vimwivi, idaimirira nkung’amba vovala vake ndipo idagona pasi. Atumiki wake wose omwe enze imirire pafupi na mpfumu mwiyo nawombo adang’amba vovala vawo.
32 Koma Yehonadabu mwana wa Simeya, m’bale wake wa Davide adati: “Mpfumu yangu, ayi kuganiza kuti wana wose wa mpfumu aphewa, Aminoni ndiye wafa ndipo walamula vimwivi ni Abisalomu. Iye adaganiza vochita vimwivi kundoyambira ntsiku yomwe Aminoni muyo adaponderera mulongosi wake Tamara.
33 Mpfumu yangu, ayi kubvera vomwe ankunena ivi vakuti: ‘Wana wose wa mpfumu afa.’ Yemwe wafa ni Aminoni yekha.”
34 Panthawe mwiyi nkuti Abisalomu wathawa. Patsogolo pake gwarda munango padakwiza maso adawona wanthu azinji ankubwera kumbuyo kwake munsewu womwe wenze pafupi na phiri.
35 Pamwapo Yehonadabu adauza mpfumu kuti: “Mwaona, wana wa mpfumu ankubwera. Vanimbanena vire n’vimwivi.”
36 Padandomaliza kuyankhula, wana wa mpfumu wale adafika ankulira mokuwa. Mpfumumbo na atumiki wake wose adalira maninge.
37 Koma Abisalomu adathawa nkuyenda kwa Talimai, mwana mwamuna wa Amihudi mpfumu ya ku Gesuri. Davide adalira mwana wake kwa ntsiku zizinji.
38 Abisalomu padathawira ku Gesuri, adakhalako magole yatatu.
39 Patsogolo pake, mpfumu Davide imbafunisisa kuyenda kwa Abisalomu, ndawa Davide muyo wenze adayamba kuyebwa va impfa ya Aminoni.
