Mbiri wachiwiri 21:1-20
21 Patsogolo pake Yehosafati, molingana na azibereki wake, adamwalira ndipo adaikhiwa m’manda ya azibereki wake mu Thaundi ya Davide. Pamwapo mwana wake Yehoramu adakhala mpfumu m’malo mwake.
2 Azibale wake wa Yehoramu, wana wa Yehosafati, enze Azariya, Yehiela, Zakariya, Azariya, Mikayeli na Sefatiya. Wose mwawa enze wana wa Yehosafati mpfumu ya Izirayeli.
3 Ababa wawo adawapasa mphaso zizinji zasiliva na zagolide, vinthu vinango vodula maninge na mathaundi ya ku Yuda yokhala na mipanda yolimba maninge. Koma ufumu adaupereka kwa Yehoramu ndawa ndiye wenze woyamba kubadwa.
4 Yehoramu padayamba kutonga mu ufumu wa ababa wake, adapha na chibemba abale wake wose komasoti onyang’anira anango wa Izirayeli. Iye adachita vimwivi kuti alimbise ufumu wake.
5 Yehoramu adakhala mpfumu anamagole 32 ndipo adatonga ku Yerusalemu kwa magole 8.
6 Iye adafamba munjira ya mafumu ya Izirayeli ninge momwe adachitira wanthu wa m’banja ya Ahabu, ndawa adalowola mwana wa Ahabu. Ndipo iye adapitiriza kuchita voipa pamaso pa Yahova.
7 Koma Yahova alibe kufuna kudzonga mzera wa ufumu wa Davide ndawa ya pangano yomwe adachita na Davide, pakuti adamupolomisa kuti m’banja mwake mudzashotelini mwana kuti ambatonge mu Yerusalemu.*
8 Muntsiku za Yehoramu, Aedomu adasatukira Yuda ndipo patsogolo pake adasalula mpfumu yakuti imbawatonge.
9 Pamwapo Yehoramu na akuluakulu wa masocha yake adayenda kumuko pabodzi na ngolo zake zose. Manje adanyamuka usiku nkukapha Aedomu omwe adamuzungulira komasoti atsogoleri wa masocha yopakira ngolo.
10 Koma Aedomu ankupitiriza kusatukira Yuda mpakana lero. Panthawe mwiyi pomwe, Libina adasatukira Yehoramu ndawa Yehoramu muyo wenze adasiya Yahova Mulungu wa azibereki wake.
11 Komasoti iye adamanga malo yokwizika m’mapiri ya ku Yuda vomwe vidachitisa kuti wanthu wa ku Yerusalemu achite uhule wauzimu ndipo iye adasokeresa Yuda.
12 Patsogolo pake adatambira kalata yochokera kwa mneneri Eliya yonena kuti: “Yahova Mulungu wa Davide m’bereki wanu wanena kuti: ‘Ulibe kufamba munjira ya Yehosafati ababa wako panango munjira ya Asa mpfumu ya Yuda.
13 Koma wafamba munjira ya mafumu ya Izirayeli nkuchitisa kuti Yuda na wanthu wa ku Yerusalemu achite uhule wauzimu ninge uhule wa wanthu wa m’banja ya Ahabu. Wapha pomwe olo azibale wako, wanthu wa m’nyumba ya ababa wako, omwe enze wabwino kuposha iwepo.
14 Manje Yahova adzalange maninge wanthu wako, wana wako na akazi wako, ndipo adzadzonge vinthu vako vose.
15 Iwepo udzadwale matenda yazinji kuphatanidzapo matenda ya m’matumbo, mpakana matumbo yako yambadzabule ntsiku zose ndawa ya matenda mwayo.’”
16 Patsogolo pake Yahova adachitisa kuti Afilisiti na Aluya, omwe enze pafupi na Aitiyopiya, aphindukire Yehoramu.
17 Pamwapo iwo adafika mwamphanvu mpakana adangena mu Yuda. Wanthu mwawo adatenga katundu wose womwe wenze m’nyumba ya mpfumu komasoti wana wake na akazi wake. Alibe kumusiyira mwana aliyese kupatulapo Yehoahazi,* mwana wake mng’ono.
18 Patsogolo pake Yahova adamudwalisa matenda yomwe yapolalini ya m’matumbo.
19 Payadamala magole yawiri yantero akudwala, matumbo yake yadabula ndawa ya matenda mwayo ndipo matenda payadafika poipa maninge, iye adamwalira. Wanthu wake alibe kushoka vonunkhirisa pa maliro yake ninge momwe adachitira pa maliro ya azibereki wake wakalekale.
20 Yehoramu adakhala mpfumu ali na magole 32 ndipo adatonga ku Yerusalemu kwa magole 8. Iye padafa, palibe yemwe adadandaula. Pamwapo adamuikha mu Thaundi ya Davide, koma osati m’manda ya mafumu.
