Mbiri wachiwiri 13:1-22
13 Mugole yachi 18 ya Mpfumu Yerobowamu, Abiya adakhala mpfumu ya Yuda.
2 Iye adatonga ku Yerusalemu kwa magole yatatu. Amayi wake enze Mikaya mwana wa Uriyeli wa ku Gibeya. Ndipo pakati pa Abiya na Yerobowamu pambachitika nkhondo.
3 Pamwapo Abiya adayenda kunkhondo kumuko na gulu ya nkhondo yamphanvu na yopfunzisiwa bwino* yokwana 400 000. Nayembo Yerobowamu adayenda kukamenyana na Abiya ndipo adayenda na masocha yamphanvu 800 000 yopfunzisiwa bwino, ndipo yenze yokonzeka kumenya nkhondo.
4 Patsogolo pake Abiya adaimirira paphiri ya Zemaraimu yomwe iri m’dera ya mapiri ya Efuraimu nkunena kuti: “Bvesera iwepo Yerobowamu na mose imwepo Aizirayeli.
5 Ko munkudziwalini kuti Yahova Mulungu wa Aizirayeli adapereka ufumu kwa Davide kuti ambatonge Izirayeli mpakana kalekale? Ko munkudziwalini kuti adaupereka kwa iye na wana wake pakuchita naye pangano ya munyu?*
6 Koma Yerobowamu mwana wa Nebati, yemwe wenze ntumiki wa Solomo mwana wa Davide, adaphindukira abwana wake.
7 Ndipo wanthu osowa vochita na wachabechabe adakhala kumbali yake. Iwo adakhala wamphanvu kuposha Rehobowamu mwana wa Solomo ndawa Rehobowamu muyo wenze mng’ono na wamantha ndipo adakakwanisalini kulimbana nawo.
8 Manje mukuganiza vakuti mulimbane na ufumu wa Yahova womwe uli m’manja mwa Davide, ndawa yakuti ndimwe azinji komasoti munawana wa ng’ombe wagolide omwe Yerobowamu adakukonzerani kuti yakhale milungu yanu.
9 Ko mulibe kuthamangisa wantsembe wa Yahova, omwe ni mbadwa za Aroni, komasoti Alevi? Ndipo ko mulibe kudziikhira wantsembe ninge momwe achitira wanthu wam’madziko yanango? Aliyese yemwe abwera na ng’ombe imuna ing’ono na nkhosa zimuna 7, akhala wantsembe wa vinthu vomwe ni milungulini.
10 Koma isepano, Mulungu wathu ni Yahova ndipo tiribe kumusiya. Wantsembe wathu omwe ni mbadwa za Aroni, ankutumikira Yahova ndipo Alevi ankuthandiza pa basa mwiyi.
11 Iwo akupereka ntsembe zoshoka kwa Yahova machibese yaliyose na maulo yaliyose pabodzi na mafuta yonunkhira. Ndipo mikate yosanzikidza* yali pameza ya golide wokonzewa bwino. Komasoti maulo yaliyose agasa makandyero yomwe yali pa choikhapo makandyero chagolide. Tinkuchita vimwivi ndawa tikukwanirisa udindo wathu kwa Yahova Mulungu wathu, koma imwepo mwamusiya.
12 Manje bveserani! Mulungu chaiye ali nase ndipo ankutitsogolera na wantsembe wake komasoti malupenga yotichemerera kunkhondo yomenyana namwe. Imwepo Aizirayeli, ayi kumenyana na Yahova Mulungu wa azibereki wanu ndawa muwinelini.”
13 Koma Yerobowamu adatumiza masocha yakuti yakawabishalire kumbuyo, pamwapo Yerobowamu muyo na masocha yanango adakhala kutsogolo kwa Ayuda ndipo masocha yobishala mwayo yenze kumbuyo kwa Ayuda mwawo.
14 Ayuda mwawo padachungunuka, adandowona kuti azondi wawo ali kumbuyo na kutsogolo kwawo. Pamwapo adayamba kulirira Yahova uku wantsembe ankuliza malupenga mokuwa.
15 Patsogolo pake Ayuda adakuwa kuti nkhondo iyambike. Padateno, Mulungu chaiye adawina Yerobowamu na Aizirayeli wose pamaso pa Abiya na Ayuda.
16 Aizirayeli adayamba kuthawa Ayuda, koma Mulungu adawapereka m’manja mwa Ayuda mwawo.
17 Abiya na wanthu wake adapha Aizirayeli azinji maninge. Adapitiriza kupha Aizirayeli mwawo mwakuti masocha yopfunzisiwa bwino* yokwana 500 000, yadaphewa.
18 Manje panthawe mwiyo Aizirayeli adachitisiwa manyazi, koma Ayuda adawina ndawa adathemba Yahova Mulungu wa azibereki wawo.
19 Abiya adapitiriza kuthamangisa Yerobowamu ndipo adamutengera mathaundi yake. Adatenga Beteli na miyi yake yozungulira, Yesana na miyi yake yozungulira komasoti Efuraini na miyi yake yozungulira.
20 Yerobowamu alibe kukhala pomwe na mphanvu muntsiku za Abiya ndipo patsogolo pake Yahova adamupha.
21 Koma Abiya adapitiriza kukhala wamphanvu. Paidapita nthawe, adalowola akazi 14 ndipo adabereka wana amuna 22 na wana akazi 16.
22 Nkhani zinango zofotokoza va Abiya, vomwe adachita na mawu yake, vidanembewa mu vomwe mneneri Ido adanemba.
