Ishima 21:1-31
21 Mutshima wa fumu udi gifua ito ya mita ha mago a Yehowa.
Wana guwutuameza fundo diagasue dia tshigina muene.
2 Njila jiagasue jia muthu jiana monega jiabonga gu meso enji,uvi Yehowa wana tala muabonga mutshima.*
3 Gutshita ndaga jiabonga nu jiataganaguana suanguluisa Yehowa muavula gubalega mulambu.
4 Meso a lulendo nu khadilo dia gudihala,idi gifua muenda udi mutuameza athu abola uvi muenda wene udi gubola.
5 Ndaga jidi mutshigina gutshita* muthu wana kalagala mudimo wakola mbajibinga,uvi athu agasue ana tshita ndaga phushi-phushi mbaabua mu uphutu.
6 Guheta umonyi mu ludimi lua mambogudi gifua gimbundu-mbundu gidi mutota, gifua muheto wana shiya.*
7 Umbundudi wa athu abola mbawaakulula,handaga adi mutuna gutshita ndaga jiabonga.
8 Njila ya muthu wakalagala gubola idi ya guhongomoga,uvi midimo ya muthu gashigo nu gubola idi yabonga.
9 Idi ndaga yabonga ha gukhala ha khomo ya yangiha fundo dia gukhala inzo imoshi nu mukhetu wabala nguma.*
10 Muthu wabola* wana khala nu nzala yakola ya ndaga jiabola;ganago guvuila muthu n’a muko khenda.
11 Gula muthu wana lela athu ako wahanewa ndola, athu aheya ana heta gutema,gula muthu watema waheta ndunge, wana heta nji ujiyi.*
12 Muthu wabonga* wana tala inzo ya muthu wabola;muene wana lutula athu abola hagula amone malamba.
13 Muthu wagasue udi mutuna gutegelela gudila gua phutu,lusugu mbalutamega muene mbaashigo nji gumuhana mvutu.
14 Kado gahanewa mu gisuegi gana tulula khabu,gabatshi’a kano* nji gahanewa mu gisuegi gana tulula khabu jiakola.
15 Muthu wabonga wana suanguluga gutshita ndaga jiabonga,uvi idi ndaga yabola diago mukunda nu athu adi mutshita ndaga jiabola.
16 Muthu udi mubemba njila ya ndunge jia gukotelesa ndaga,mbawukhala fundo dimoshi nu athu a gufua.
17 Muthu wana zumba muavula gubalegesa tangua diabonga* mbawubua phutu;muthu wana zumba matombe nu maji mbagashigo mukhala nu umonyi.
18 Muthu wabola udi gibawu mukunda nu muthu wabonga,muenya mambo nji mbawuzudiwa ha fundo dia muthu wabonga.
19 Idi ndaga yabonga ha gujinga mu mavu a luselenga,ha fundo dia gukhala nu mukhetu wabala nguma* nu wana vua khabu muphushi.
20 Ima ya ndando nu maji yana khala mu inzo ya muthu watema,uvi muthu waheya wana manesela* ima idi nayo muene mu ungubu.
21 Muthu wagasue udi mulandula ndaga jiabonga nu guzumba gua giamatshidia,mbawuheta monyo nu gubonga nu lutumbu.
22 Muthu watema wajiya gukanduga* ibayi ya dimbo didi nu masuta a ngolo,nu gubuisa ibayi yakola idi ene mushila mutshima.
23 Muthu udi mumonesa gutema mu ndaga jidi muzuela muene,udi gudibamba hagula malamba amubuilago.
24 Muthu wana tshita ndaga nu lulendo gutangiza ndo malamba ajiya gumubuila, wana tamegewa egi,muenya lulendo, muenya gitamu nu muthu wana gudihala.
25 Ndaga idi mutshigina gimonya muavula mbayimubata gu gufua,handaga wana tuna gutshita mudimo.
26 Lusugu lua mudidi gimonya giana khala nu nzala yakola ya ima yavula,uvi muthu wabonga wana hana nu mutshima wagasue.
27 Mulambu wa muthu wabola udi diago gima giabola,wana khala luko wabola gula wawuhana nu matangi abola.*
28 Muthu udi muta uthemua wa mambo mbawufua,uvi muthu udi muzuela ndaga jiavui muene mbawubinga.*
29 Muthu wabola wana tuma athu ako ha gutangiza egi gashigo muvua woma,uvi muthu wabonga wana wenda mu njila ya ubambi.*
30 Gushigo nu gutema nga ndunge nga ukoteleshi wa ndaga nga longogula ishigo gudivua nu gutshigina gua Yehowa.
31 Ana londega gabalu mukunda nu lusugu lua ita,uvi guhuluga guana katuga gudi Yehowa.
Mbimbi goshi'a diyiji
^ Nga “matangi.”
^ Nga “plan.”
^ Nga ndo yajiya gukhala egi, “mukunda nu athu adi mukamba gufua.”
^ Nga “wana nyema nga wana boguta tangua diagasue.”
^ Nga “Monyo wa muthu wabola.”
^ Nga “wana jiya ndaga ya gutshita.”
^ Muthu wabonga adi muzuelela haha idi Nzambi.
^ Mu Hebelu: “gabatshi’a kano mu thulo.”
^ Nga “muthu wana zumba ima yana suanguluisa.”
^ Nga “wana nyema nga wana boguta tangua diagasue.”
^ Mu Hebelu: “wana minya.”
^ Nga “gubinga.”
^ Nga “nu makalegelo a musonyi.”
^ Mu Hebelu: “mbawuzuela mayilago.”
^ Nga “wana tshita egi njila yenji ikhale diago yabonga.”
