Ishima 13:1-25
13 Mona watema wana tshigina malongo* a sh’enji,uvi muthu wana lela athu ako ganago gutshigina lubelo.
2 Mbimbi jiabonga jiana zuela muthu mbajimukuatesa ha gudia ima yabonga,uvi muthu wabola wana zumba umbundudi.
3 Muthu udi mumonesa gutema mu ndaga jidi muzuela muene, udi mubamba monyo wenji.
Uvi muthu udi mulaba guzuela izuele-zuele mbawutagana nu malamba.
4 Gimonya giana khala nu nzala ya ima yavula, muene gima ndo.
Uvi muthu wana tshita mudimo wakola mbawuheta ima idi nayo muene funu.*
5 Muthu wabonga wana tuna mambo,uvi ndaga jiana tshita athu abola jiana bata musonyi.
6 Gutshita ndaga jiabonga guana bamba muthu gashigo nu gubola,uvi gutshita ndaga jiabola guana batela muenya gubola malamba.
7 Gudi nu muthu udi mumonesa egi udi nu umonyi, uvi gashigo nu gima;muthu muko udi mumonesa egi udi phutu, uvi muene nu umonyi wavula.
8 Umonyi wa muthu wana khala gibawu mukunda nu monyo wenji,uvi phutu ganago gusagesewa.*
9 Muanya wa athu abonga udi muhenya mangololo,*uvi muenda wa athu abola mbawujima.
10 Lulendo luana bata phamba gumana,uvi athu ana toga malongo ana khala nu gutema.*
11 Umonyi wana hetewa mu phushi wana tota.
uvi umonyi wa muthu wana kamba mage-mage* mbawuvula.
12 Felela dishigo mutagana mu phushi diana katesa mutshima,uvi gula ndaga muthu wakhalele gudifelela yatagana, yana khala gifua mutshi wa monyo.
13 Muthu wagasue udi mu segulula malongo* mbawutagana nu malamba,uvi muthu udi mutumagela mukhuala mbawuheta gishimbigo.
14 Malongo* a muthu watema adi gito gia monyo,ana bamba muthu hagula gabuigo mu muheto wa gufua.
15 Muthu udi nu ndunge jiavula jia gukotelesa ndaga wana tshiginyiwa,uvi ndaga jiana tshita enya mambo jiana bata malamba.
16 Muthu watema wana tshita ndaga nu ujiyi,uvi muthu waheya wana monesa guheya guenji.
17 Mutumiwi wabola wana bata malamba,uvi mutumiwi wa gujinginyina wana hana gikhesa.
18 Muthu udi mutuna malongo mbawubua mu uphutu nu mbawuvua musonyi,uvi muthu udi mutshigina lubelo* mbawutumbuishiwa.
19 Muthu wana suanguluga gula waheta ima yakhalele mutshigina muene,uvi muthu wabola gana tshigina ndo gubemba ndaga jiabola.
20 Muthu udi muwenda nu athu atema mbawubua watema,uvi muthu udi mukuata ufuta nu athu aheya mbawutagana nu malamba.
21 Malamba ana landula athu ana tshita ndaga jiabola,uvi athu abonga ana heta ima yavula.
22 Muthu wabonga wana bembela ajigulu enji khapho dia ima,uvi umonyi wa muthu wabola mbawubambewa mukunda nu athu abonga.
23 Mavu a phutu adi a gudima ana zola mbuto jiavula,uvi mbuto jiene jiajiya* gutota mukunda nu ndaga jiabola.
24 Muthu udi mutuna gukalegela fimbo,* gana zumba ndo mun’enji nga hazonda,uvi muthu wana zumba mun’enji wana tshita yagasue* ha gumuhana ndola.
25 Muthu wabonga wana dia nu wana kuta,uvi muthu wabola wana khala nu nzala.
Mbimbi goshi'a diyiji
^ Mbimbi ya gishina yana kotelesa ndaga jiavula. Ha gutadila ndaga adi muzuelela yajiya gubalumuiwa egi: longo, gutemesa, gubalela, ndola, gulongesa.
^ Mu Hebelu: “mbawubua maji-maji.”
^ Mu Hebelu: “ganago guwambewa.”
^ Mu Hebelu: “musuanguluga.”
^ Nga “athu ana hula matangi gudi athu ako.”
^ Mu Hebelu: “nu koko.”
^ Nga “mbimbi.”
^ Nga “mukhuala.”
^ Nga “guwambewa.”
^ Nga “muene wajiya.”
^ Nga “malongo; ndola.”
^ Nga ndo yajiya gukhala egi, “muphushi.”
