Kontrolt eene onsechtboare Macht daut Läwen?
Väle jleewen, daut daut eene onsechtboare Macht jeft, waut äa Läwen kontrolt. Wäajen dit doonen dee dan veschiednet, waut see jleewen, waut äa Läwen woat bäta moaken.
WAUT VÄLE JLEEWEN
STIERNDIEDARIE: Eenje jleewen, doano woo de Stierns stonen, wan see jebuaren woaren, doano woat uk äa Läwen sennen. Soone seenen sikj daut dan no, waut daut fa an bediet, un proowen soo Jefoaren utem Stich to gonen un goode Entscheidungen to moaken.
FENG SHUI: Eenje jleewen, daut wan see biejlikj äa Hus opp eene jewesse Wajch buen un äare Sachen doano enriemen, paust daut met de onsechtboare Macht enne Natua toop un brinjt an Jlekj. Daut es Feng Shui. Een Maun en Hong-Kong sajcht: “Een Feng Shui-Liera rod mie too, een jewesset glausnet Dinkj opp eene paussende Städ en mien Stua opptostalen toom mea vedeenen.”
TO DE VESTORWNE BÄDEN: Aundre jleewen, wan see de Vestorwne ooda veschiedne Jetta veieren, woaren dee an Schutz jäwen un säajnen. Eene Fru en Vietnam sajcht: “Ekj docht, daut wan ekj mien vestorwnet Frintschoft wudd veieren, wudd ekj fa mie un miene Kjinja nu aul een bätret Läwen haben, un uk fa lota.”
EMMA WADA TO WELT KOMEN: Väle jleewen, wan wäa stoaft, kjemt dee wada to Welt, un daut eena nich opphieet met läwen un stoawen. Dee jleewen, daut goode ooda schlajchte, waut see nu beläwen, es wäajen daut, waut see en äa väajet Läwen jedonen haben.
Wan väle uk sajen, see jleewen nich aun dise Äwagloowes, wellen see oba doch weeten, waut met an passieren woat. Dee proowen daut met Henj läsen, Stierndiedunk, Jeista befroagen un met Koaten, wiels see doch jleewen, daut an daut waut halpen kunn.
WAUT KJEMT DOABIE RUT?
Kjennen soone, waut aun soone Sachen jleewen un uteewen, sikj secha sennen, daut see een scheenet Läwen haben woaren?
Besee wie ons mol, waut Hào, a een Maun en Vietnam, beläwd. Hee jeef sikj met dise Sachen auf, soo aus Stierndiedarie, Feng Shui un veieed uk de Vestorwne. Haft am daut jeholpen goode Entscheidungen to moaken? Hee sajcht: “Ekj jinkj met miene Oabeit kaputt, ekj dukt mie en Schult en, kjrieech Famieljentrubbels un kjeem met de Narfen rauf.”
Qiuming von Taiwan jleewd uk aun soont aus Stierndiedarie, daut eena emma wada jebuaren woat, Woasajarie, Feng Shui un de Vestorwne veieren. Aus hee sikj dise Sachen ieescht mol unjasocht haud, säd hee: “Ekj wort en, daut dise Lieren un Jewanheiten sikj wadaspräakjen un daut eenem daut bloos derchenaunda brinjt. Ekj funk ut, daut et met de Stierndiedarie lang nich soo utkjemt, aus se verutsajen. Un dit, daut eena emma wada jebuaren woat: Woo sull eena waut bäta moaken, wan eena nich mol weet, waut en eenem sien väajet Läwen wia?”
“Ekj wort en, daut dise Lieren un Jewanheiten sikj wadaspräakjen un daut eenem daut bloos derchenaunda brinjt.” (QIUMING, TAIWAN)
Hào un Qiuming un väl aundre sent enjeworden, daut dise Lieren un Jewanheiten kjeene Macht en ons Läwen haben un daut nich aules en ons Läwen soo haft sult. Meent daut dan, daut wie nuscht doonen kjennen, om een bätret Läwen to haben?
Väle jleewen, de eensja Wajch een scheenret Läwen to haben, es, sikj huach utlieren to loten un väl Jelt to haben. Oba woo es daut bie soone utjekomen, waut daut soo jedonen haben?
a En disen Artikjel un en de näakjste hab wie eenje Nomes jeendat.
b Dit es ut de Heilje Schreft jenomen ut Galata 6:7. Daut es krakjt soo aus een Sprechwuat sajcht: Plauntst du Meloonen, woascht du Meloonen arnten. Plauntst du Schaublen, woascht du Schaublen arnten.
Veleicht jleichst du uk dit
DE WOAKTORM
Stierns dieden un Woasajarie – kaun ons daut de Tookunft wiesen?
Kaust du die opp soone Sachen veloten?
