Waut de Schreft doatoo sajcht

 De Bibel rät nich väl doavon, oba dee sajcht daut uk nich auf, sikj opptofiksen, Makeup ooda Straums to brucken. Enne Bibel jeit daut väl dolla doarom, daut ons “Straums saul eene stelle un ruje Enstalunk sennen”, aus woo ons butalich lat (1. Petrus 3:3-4).

De Schreft sajcht daut nich auf, sikj opptostraumen

•   True Frues von de Bibel straumden sikj opp. Rebecka, waut sikj met Abraham sienen Sän Isaak befried, brukt eenen goldnen Näsrinkj, goldne Oarmbenja un noch aundret dieret Straums. See haud daut von dän Maun jekjräajen, waut lota äa Schwieevoda wort (1. Mose 24:22, 30, 53). Een aundret Biespel es Ester, waut doa sull de Kjennijin woaren von daut persische Rikj. Toom ar doafäa reedmoaken, wia see doamet envestonen, “de Behaundlunk [to kjrieen] …, waut ar wudd halpen toom sea schmock loten” (Ester 2:7, 9, 12, PB). Bie dise Behaundlunk wia woomäajlich met en, soont to brucken toom “schmock moaken” ooda “veschiedne Sorten Makeup” (New International Version; Easy-to-Read Version; von ons schroz jemoakt).

•   Enne Bibel woat Straums jebrukt toom waut Goodet vejlikjen. Biejlikj woat doa jesajcht, daut eene Persoon sien gooda Rot soo es, aus een “goldna Rinkj ooda eene goldne Spald … fa däm, dee doa horcht” (Spricha 25:12, PB). Een aundret Biespel es Gott selfst. Hee vejlikjt daut, woo hee daut Volkj Israel behaundeld, met eenen Maun, waut siene Brut oppstraumd met Oarmbenja, Haulskjäden un Uarinj. Dit Straums muak daut Volkj “butajeweenlich schmock” (Hesekiel 16:11-13, PB).

Waut eenje orrajcht jleewen äwa Makeup un Straums

 Waut jesajcht woat: Wiels de schlajchte Kjennijin Isebel sikj de Uagen tuschen deed, bewiest daut, daut Makeup brucken schlajcht es (2. Kjennichs 9:30).

 Woo daut es: Isebel, waut Zaubarie dreef un aundre leet dootmoaken, wort wäajen äare schlajchte Woakjen jerecht un nich wäajen daut, woo ar von buten leet (2. Kjennichs 9:7, 22, 36-37).