Tiaikid a Blil a Omengull er Kid

“A bltkil a renguk el kirel a blim e Dios a ua ngau el kmard er a renguk.”​—JN. 2:17.

CHELITAKL: 13, 21

NGMEKERANG A OMONGER?

Ngmekerang a dolecholt a omengull er kid el mo er a miting er kid?

Te mekerang a rechedal a Dios e olengeseu el meleketek a Blil a Ongdibel?

Ngera me ngklou a ultutelel el dongetmokl a Blil a Ongdibel er kid?

1, 2. (a) A irechar e a remesiungel a Jehovah te milengull er ngii er ker? (b) Ngmle ua ngera uldesuel a Jesus el kirel a templo el mla er a Jerusalem? (c) Ngera kede mo mesaod er tia el suobel?

 A RECHEDAL a Dios er a irechar me chelechang a dul ngar er ngii a basio el lebo er ngii e mengull er a Dios. El ua tiang, sel taem er a lolenget a Abel el mo er a Jehovah e nglocha rirellii a olengetongel. (Gen. 4:3, 4) A Noah me a Abraham me a Isak me a Jakob me a Moses a dul riruul a olengetongel er tir. (Gen. 8:20; 12:7; 26:25; 35:1; Exo. 17:15) Me a Jehovah a dilu er a rechad er a Israel me te mekedecherur a chedaol Tento. (Exo. 25:8) E a uriul e te mlo omekedechor er a templo. (1 Ki. 8:27, 29) Me sel taem er a lemengubet er a klsibai er a Babilon, e te mle blechoel el kldibel er a blil a ongdibel. (Mk. 6:2; Jn. 18:20; Rel. 15:21) E tirke el kot el Kristiano a mle blechoel el kldibel er a blirir a rederta el chad. (Rel. 12:12; 1 Ko. 16:19) E chelechang e a rechedal a Jehovah a mesuub e mengull er ngii er a chelsel a betok el telael el Blil a Ongdibel er a beluulechad el rokir.

² A Jesus a uleba klou el omengull el kirel a templo er a Jehovah el ngar er a Jerusalem. Tia el bltkil a rengul a ulemeklatk er  a redisaiplo er ngii er a tekoi el medung er a psalm el kmo: “A blakerreng er ngak el kirel a Templo er kau a kmard er a chelsek el ua ngau.” (Psa. 69:9; Jn. 2:17) Me alta e a Blil a Ongdibel er kid a diak el ua templo el mle “blil a RUBAK,” engdi ngkmal kired el olecholt a omengull el mo er ngii. (2 Kr. 5:13; 33:4) Me ngar tia el suobel e kede mo mesaod a omellach er a Biblia el kirel a omerelled sel debo er a Blil a Ongdibel er kid me a rolel a dongetmokl er ngii e dolenget a udoud el kirel. *

DOLECHOLT A OMENGULL SEL DEBO ER A MITING

3-5. Ngerang a Blil a Ongdibel, e ngua ngera uldesued el kirel a miting er kid?

³ A Blil a Ongdibel a basio el lebo er ngii a rechad e dmak el mengull er a Jehovah. Me a bek el miting a sengk er a Dios el mei er kid el melisiich er a deleuill er kid el obengkel. Ngokiu aika el miting e a cheldebechelel a omeskid a omelisiich me a ulekrael el dousbech. Me tiang a kmal ileakl el techelled el mo sebechel a Jehovah me a Ngelekel el omekedong er kid el mo “omengur er a tebelel a Rubak” er a bek el sandei. (1 Ko. 10:21) Me ngkmal diak el kired el obes er a klungel a ultutelel tia el okedong.

⁴ A Jehovah a kmal soal a debo er a bek el miting el mo mengull er ngii e dekasisiich er a delongeled. (Monguiu er a Hebru 10:24, 25.) Me a omengull er kid el mo er ngii a uchul me ngdiak dongoit a miting el di diak a ungil el uchul. Kede dirrek el ochotii a omereng el saul er kid el mo er aika el miting sel dongetmokl er kid el kirel e bo donger er a miting.​—Psa. 22:22.

⁵ A omerelled me a omengetmekled er a Blil a Ongdibel er kid a ochotii a delechel a omengull er kid el mo er a Jehovah. Me ngkmal soad a omerelled a bo luchul a odanges el mo er a ngklel a Jehovah, el ngii a blechoel el llechukl er a medal a Blil a Ongdibel er kid.​—Momekesiu er a 2 Kronika 6:7.

6. Ngera te dmung a rechad el kirel a Blil a Ongdibel er kid me tirke el ngar er a miting? (Momes er a siasing er a uchelel a suobel.)

6 A rechad a sebechir el mtebengii a omengull er kid el kirel a Blil a Ongdibel er kid. A ta el chad er a Turkey a dilu el kmo: “Ngkmal mechas a renguk er a ungil el omengetmeklel a Blil a Ongdibel me a ungil el blekerdelir a rechad el mla er ngii. Te kmal ungil el oubail, e di klikmechur e kmal mle ungil el outkeu er ngak. Me tiang a kmal chilsir a renguk.” Ngika el chad a ulemuchel el mei er aike el rokui el miting e di mle mereched el mo metecholb. Kuk ngar er a ta el beluu er a Indonesia e a rudam a milengemedaol er a retonari er tir me a mayor er a beluu me a lmuut el bebil el ngarbab el chad el me omes er a beches el Blil a Ongdibel er tir. Me ngike el mayor a kmal mlo mechas a rengul er a klungiolel tia el blai me a klebekelel a mekesekesel. Me ngdilu el kmo: “A ungil el omengetmeklel tia el blai a olechotel a mera el omengull el mobang.”

7, 8. Kede mekerang e ochotii a omengull er kid el mo er a Jehovah sel dengar er a Blil a Ongdibel?

⁷ A Jehovah a ngike el omekedong er kid el mo er a miting, e dirrek el soal a dungil el kltmokl e lungil a omerelled. Me ngkirel el mo tabesul a tekoi el doruul, e diak deruul a llechul a miting el kmal mo meringel me a lechub e di dongebekakl a tekoi sel dengar er a Blil a Ongdibel. A Jehovah a soal a rokui el chad a bo lungil a rengrir el ngar er a miting el uldimukl er tirke el dongemedaol er tir el  mei. Engdi ngkmal diak el kired el mo meterekakl a tekoi el doruul sel dengar er a miting. Seikid a uchul me ngkirel el ungil kltmokl a biled e dirrek el diak doutext e dongedecheduch e donga kall me a lechub e kede melim er a temel a miting. Me a ruungalek a kmal kirir el olisechakl er a rengelekir me lak lerurt e loilil er a chelsel a Blil a Ongdibel.​—Oli. 5:1.

⁸ A Jesus a kmal ngilasech a rengul er a lesterir a rechad el olterau a oterullir er a chelsel a templo me nguluungeroel e oldik er tir. (Jn. 2:13-17) Me ngar er a Blil a Ongdibel er kid e kede mesuub e dirrek el mengull er a Jehovah. Me ngkmal diak lemelemalt el tekoi a lsekum kede mong e meruul a rolel a siobai er kid er a chelsel.​—Momekesiu er a Nehemia 13:7, 8.

KEDE OLENGESEU A OKEDECHERUL A BLIL A ONGDIBEL

9, 10. (a) Te mekerang a rechedal a Jehovah a loleketek a Blil a Ongdibel, e ngera mlo rsel? (b) Ngmekerang e mongeseu aike el ongdibel el ngar er a chebuul el beluu?

⁹ A rechedal a Jehovah a blak a rengrir el omekedechor a Blil a Ongdibel. Tirkang a oureor el design e meleketek e dirrek el omekbeches a Blil a Ongdibel el diak el uduudel. Me ngera mla meketmokl? Ngulemuchel er sera November 1, 1999, e te mla mekedechor a kuk betok er a 28,000 el Blil a Ongdibel el meliuekl er a beluulechad. Me ngbelkul a kmo te mekedechor a bekord el eim el Blil a Ongdibel er a bek el sils.

¹⁰ A cheldebechelel a Jehovah a ousbech er a rechad el tonget a temir el oureor, e dirrek el ousbech a tenget el lengai el olengeseu el omekedechor a Blil a Ongdibel er aike el beluu el ousbech a ngeso. Te oltaut er a omellach er a Biblia el kmo, tirke el sebechir el olengeseu a meruul a betok el ngosuterir tirke el ousbech a ngeso. (Monguiu er a 2 Korinth 8:13-15.) Me ngar er aika el mereko el betok el rak e te mla mekedechor a betok el klebokel el Blil a Ongdibel er a chelsel aike el beluu el ousbech a ngeso.

11. Ngera te melekoi a rebebil er a rudam el kirel a Blil a Ongdibel er tir? Me ngua ngera uldesuem el kirel tiang?

¹¹ A rudam er a ta el ongdibel er a Costa Rica a milluches el kmo: “Sel kim dechor er a medal a Blil a Ongdibel er kemam e ngua kim omerrous! Ngkmal diak el sebecham el oumerang el kmo tia el klebokel el basio a mlo dechor er a di chelsel a 8 el klebesei! Ngdi okiu a klengeltengat er a Jehovah me a ulekrael er a cheldebechelel me a ngelsurir a rudam e ngmlo sebechel el meketmokl tia el tekoi. Tia el blil a omengull a kmal mekreos el sengk er a Jehovah el me er kemam. Me ngkmal dmeu a rengmam el kirel.” Ngkmal mo dmeu a rengud sel derenges a ungil el tekingir a rudam me a rudos er kid el mereng a sulel a  Jehovah. Ngdirrek el kmal dmeu a rengud e le ngmo sebechir a rudam er kid er a beluulechad el rokir el ngar er ngii a Blil a Ongdibel er tir. Ngbleketakl el kmo a Jehovah a omekngeltengat a ureor er a okedecherul a Blil a Ongdibel, e le sel bo lemerek e a rebetok el beches el chad a merael el me soiseb er a chelsel e mesuub el kirel a Jehovah.​—Psa. 127:1.

12. Ngmekerang a dolengeseu a okedecherul a Blil a Ongdibel?

¹² Ngmekerang a dolengeseu a okedecherul a Blil a Ongdibel? Nglocha sebechem el olengeseu el oureor. E kid el rokui a sebeched el melenget a udoud el kirel tia el ureor. Ngkmal mo dmeu a rengud sel dolengeseu er tia el ureor, e sel kot el ngaruchei e kede mo odengesii a Jehovah. Me kede oukerebai er a rechedal a Dios er a irechar el mle semeriar el melenget el kirel a okedecherul a blil a omengull er tir.​—Exo. 25:2; 2 Ko. 9:7.

DONGETMOKL A BLIL A ONGDIBEL ER KID

13, 14. Ngera el omellach er a Biblia a ochotii el kmo ngkired el blechoel el mengetmokl a Blil a Ongdibel er kid?

¹³ Kid a mengull er a chedaol el Dios el ngii a soal a doruul a tekoi el ngar er a ungil el bldeklel. Sei a uchul me ngkirel a Blil a Ongdibel er kid el blechoel el kltmokl. (Monguiu er a 1 Korinth 14:33, 40.) Me ngsoad el mo ua Jehovah el klikiid e chedaol a uchul me ngkirel a omengull er kid me a uldesued me a omerelled me a dirrek el bedenged el mo klikiid.​—Och. 19:8.

¹⁴ Sel deblechoel el mengetmokl er a Blil a Ongdibel er kid e kede semeriar el mengemedaol er a rechad el mei er a miting. Seikid e te  mo mesang el kmo ngmera el soad a beluulechad a bo le baradis, el ngii a tekoi el kid a olisechakl er ngii. Te dirrek el mo mesang el kmo, kede mengull er a chedaol el Dios el ngii a mo rullii tia el chutem el mo klebokel el baradis.​—Isa. 6:1-3; Och. 11:18.

15, 16. (a) Ngera me ngdiak el beot el dongetmokl er a Blil a Ongdibel er kid? E ngera uchul me ngkired el blechoel el meruul er ngii? (b) Ngua ngerang a omengetmeklel a Blil a Ongdibel er kid, e ngera el techall a dobang el kirel tiang?

¹⁵ A rekakerous el chad a kakerous a rolel a longetmokl. E ngera uchul? Nglocha oltirakl er a rolel a omengetmokl el lemlukeroul er ngii. A rebebil a kiliei er a basio el kmal klou a hokori er ngii me a lechub e ngdechudech a rael er ngii. E a rebebil a olengesonges a ralm er a belurir me a lechub e ngdimlak a klekedellir er a omengetmokl. Me alta e kede kiei er chouaika el basio, engdi ngkired el blechoel el kerekikl el mengetmokl er a Blil a Ongdibel er kid, e le tiang a basio el debo er ngii e mengull er a Jehovah.​—Dut. 23:14.

¹⁶ Me ngkirel el ungil el chelderoder a tekoi el doruul a lsekum ngsoad a lungil el kltmokl a Blil a Ongdibel er kid. Me a remechuodel a oterekokl a temel a omengetmokl e dirrek el smiik aike el klekedall el dousbech el mengetmokl. Te dirrek el omes me ngsebechel el meketmokl a ureor. Ngar er ngii a bebil el tekoi el kirel el ketmekill er a uriul er a bek el miting e ngar er ngii aike el kuk diak. Me kid el rokui a oba ileakl el techall el mo mengetmokl er a Blil a Ongdibel er kid.

DEKETMOKL AIKE EL KIREL EL KETMEKILL

17, 18. (a) Ngera kede suubii er a rolel a omengetmokl el lurruul a rechedal a Jehovah er a irechar? (b) Ngera uchul me ngkired el mengetmokl a Blil a Ongdibel er kid?

¹⁷ Ngdirrek el kired el mengetmokl a Blil a Ongdibel er kid sel domtechei aike el mla mo kirel el utechioll. A rechedal a Jehovah er a irechar a mirruul el uaisei. Sel taem er a longedereder er a Juda a King el Joas, e a rechad a millenget a udoud el kirel a templo. Me a king a dilu er a reprist me lousbech ngii el udoud el meruul aike el telemall er a templo. (2 Ki. 12:4, 5) E ngar er betok er a 200 el rak er a uriul, e a King el Josia a dirrek el uluusbech a tenget el mengetmokl aike el kirel el ketmekill el tekoi er a templo.​—Monguiu er a 2 Kronika 34:9-11.

18 A bebil el Branch Committee a mla mtebengii el kmo a bebil el beluu a diak lsau el mengetmokl a blai me a klekedall. Te locha metitur el mengetmokl e lomekerreu a kloklir. Me a lechub e ngdiak a ududir el remuul aika el klalo. Engdi a lsekum ngdiak dongetmokl a Blil a Ongdibel er kid, e ngdi telkib e ngmo kikiongel er a osengir a rechad. E sel leblak a rengud el mengetmokl e kede odengesii a Jehovah, e tiang a dirrek el mo uchul e kede mengereomel a tengetengir a rudam er kid.

19. Ke mekerang e ochotii a omengull er kau el mo er a Blil a Ongdibel?

¹⁹ A Blil a Ongdibel a mla mechedaol el kloklel a Jehovah, me ngdiak el kloklel a ta el chad me a lechub a ongdibel. Me ngua dulsaod er tia el suobel, a omellach er a Biblia a ngosukid el mo melemalt a uldesued el kirel a basio el debo er ngii e mengull er a Dios. Me kid el mengull er a Jehovah a uchul me kede olecholt a omengull el mo er a miting er kid me a dirrek el Blil a Ongdibel er kid. Ngdirrek el dmeu a rengud el melenget el kirel a lmuut el betok el okedecherul a Blil a Ongdibel, e blak a rengud el omekerreu e mengetmokl aika el basio. Me kede ua Jesus el soad el ochotii a blakerreng el mo er a blil a omengull er kid el mo er a Jehovah.​—Jn. 2:17.

[Footnote]

[Aike el Ker er a Suobel]