A beluulechad a rruul el sebechel el oltekau a klengar. Ngbetok a ralm er ngii el klou a ultutelel el kirel a klengar. Tia el omerolel a beluulechad el ulitech e mengeterbis el merael el meliuekl er a melidiul a rullii me ngsebechel el ungil omekerreu er a daob me ngdiak bo el kori me a lechub e ngomrechorech el mo diak. A beluulechad a ua sisiak el obengkel a melidiul el meliuekl er ngii me a eltel a beluulechad a omekerreu er ngii me ngdiak lemetemall er a radiation. A klausisbech er a delongelel a dellomel me a charm er tia el chutem a mengasireng. Sei a uchul me a rebetok el chad a mla mo medengei el kmo a beluulechad a ulebeob el ngar er ngii a moktek er ngii.​—Monguiu er a Isaia 45:18.

Engdi ke locha mo melatk el kmo: ‘A ringel me a chelebirukel ngdirrek el uldimukl er tia el moktek?’​—Monguiu er a Duteronomi 32:4, 5.

Tia el chutem a ulebeob el kirir a rechad el kiei er ngii el ngar er a deurreng e mengull er a ta me a tang e betik a rengrir er a Omebelir. Sei a uchul me a klengar er a rechad a kuk ngarbab a moktek er ngii er a klengar er a dellomel me a charm. Ngsebeched el mo medengelii a Omebeled e mo soad el oukerebai a blekerdelel el bltikerreng me a llemalt.​—Monguiu er a Olisechakl 12:13; Mika 6:8.

A Omebeled a sebechel el otaut a rokui el moktek er ngii. Me ngsebechel el mo ulterekokl a rengud el kmo ngmo okngemed a ringel me a chelebirukel e rullii tia el beluulechad el mo ungil el basio el sebechir a rechad el kiei er ngii el ngar er a deurreng.​—Monguiu er a Psalm 37:11, 29; Isaia 55:11.