A Alberto a mle soldau el bekord el 10 el rak. Ngmelekoi el kmo: “Ngike el prist er kemam a ulemekngeltengat er kemam er sera lolekoi el kmo, ‘A Dios a obengkemiu.’ Engdi ak kora millatk el kmo, ‘Ngak a mo omekoad er a rechad, engdi a Biblia a kmo, “Lak bo momekoad.”’”

A Ray a dirrek el mle soldau er sel taem er a Ongeru el Mekemedil a Beluulechad. A ta el taem e nguleker er a prist el kmo: “Kau a mei er a diall e meluluuch el kirir a resoldau e dirrek el meluluuch me bo demesisiich er a mekemad. Tirke el cherroued te dirrek el meruul er a osisiu el tekoi?” Ngika el prist a ulenger el kmo a Rubak a oureor el ngar er a mengasireng el rolel.

A lsekum e ngdiak el mesubed a rengum er sel nger, e ngdiak di el kau el tang a uaisei a uldesuem.

A Jesus a dilu el kmo a ta er a kot el klou el llechul a Dios a kmo “bo le betik a rengum er a ngar bita er kau el ua le betik a rengum er kau.” (Markus 12:31) A Jesus nglilia telkelel a bltkil a rengud el mo er a retonari er kid el kmo ngultuil er a basio el lekiei er ngii me a lechub e ngchad er ker el beluu? Ngdiak. Ngdilu er a redisaiplo er ngii el kmo: “Cho bo mkaubltikerreng, e a rokui el chad a mo medengei el kmo kom obengkek.” (Johanes 13:​34, 35) Sel bltkil a rengrir el kirir a derta me a derta er tir a kmal mo mengasireng me ngmo bleketakl el olangch. Te bai kongei el mo mad el kirel a derta me a derta er a tir er a bai bo lolai a klengar er a rechad.

A Rekristiano er a irechar a kiliei el oltirakl a tekingel a Jesus. A The Encyclopedia of Religion a kmo: “Tirke el mle chedam er a ikelesia er a irechar, el uldimukl er a Tertullian me a Origen, a millekoi el kmo a Rekristiano a lulerrob er tir me ngdiak lolai a klengar er a rechad, e tia el omellach a uchul me ngdimlak bo leteloi er a klsoldau er a Rom.”

A Resioning er a Jehovah a kiei er a kakerous el beluu, e a derta er tir a metik er tir el kiei er a chelsel a kautok el beluu. Me nguaisei, engdi te meruul aike el sebechir el melemolem el olecholt er sel olengchelir el bltikerreng.

El uai tiang, sel rak er a 1994 er sera lengar er ngii a mekemad er a delongelir a rechad er a Hutu me a Tutsi el ngar er a Rwanda, e a Resioning er a Jehovah a dimlak loba bitang me a ka lebitang. Alta ngmle sebechel el mo uchul a kodellir, engdi a Resioning el chad er a ta er a kebliil a ulemart er a Resioning el chad er a kuk ta er a kebliil. Sel taem er a lobdechem a reteru el Sioning el chad er a Hutu el tir a ulemart er a rudam er tir el chad er a Tutsi, e tirke el soldau er a Hutu Interahamwe a dilu el kmo: “Ngkiriu el mad e le ko mle olengeseu er a rechad er a Tutsi el chemiis.” Ngklengiterreng e le tirka el teru el Sioning el chad er a Hutu a lulekodeterir.​—Johanes 15:13.

Ngera uldesuem: A omerellir a Resioning er a Jehovah ngoltirakl a tekingel a Jesus el kirel a diak lemekimd el bltikerreng?