Ora Supersticion Ta Controla Bo Bida

BO TA cana dal den un hende ora bo ta sali cas. Bo ta dal bo dede di pia contra un piedra. Un cierto tipo di parha ta canta den anochi. Bo ta soña e mesun soño cada bes. Pa hopi hende, e susesonan aki ta cos simpel cu no ta duna ningun motibo pa precupa. Pero pa cierto pueblonan na West Africa, nan por ta señal, aviso of mensahe di spirito. Nan ta kere cu tin sea bon suerte of problema na caminda; depende kico e señal tawata, y con nan a interpret’e.

Claro cu no ta na Africa so tin supersticion. Na China y na e republicanan cu tawata forma parti di anterior Union Sovietico, apesar cu e pueblo tin hopi aña ta biba cu ateismo como nan creencia oficial, toch lo bo keda straña cuanto hende ainda a keda cu nan supersticionnan. Den mundo Occidental hopi hende ta lesa nan horoscop, tin miedo ora dia 13 cai riba un diabierna, y ta evita pushi preto. Algun pueblo cu ta biba serca di Polo Norte ta kere cu aurora borealis (un fenomeno di lus den shelo cu ta sosode principalmente rond di Polo Norte) ta un señal di guera y pest. Na India, AIDS ta ser plama door di coredonan di truck cu ta kere cu nan tin cu tene relacion sexual riba dianan di hopi calor pa tene nan curpa fresco. Na Hapon, cobadonan di tunnel ta kere cu si un hende mohe drenta un tunnel prome cu e ta cla, e ta trece mala suerte. Den deporte profesional tambe tin hopi supersticion. Un hungado di volley asta a kere cu ta door cu el a bisti meña preto na luga di meña blanco, su team a gana varios wega tras di otro. Asina nos lo por sigui.

Kico di abo? Bo tin un miedo secreto cu bo no por splica? Tin un ‘creencia, pensamento of custumber cu ta afecta bo, maske no ta parce di tin ningun splicacion logico p’e’? Ta asina un cierto enciclopedia ta defini e palabra “supersticion.” Pues, bo contesta por ta significativo.

Un hende cu ta laga supersticion afecta su decisionnan y su rutina di tur dia ta laga algo cu e no ta comprende mucho bon controla su bida. Ta sabi pa laga esei sosode? Nos mester laga algo incomprendibel y kisas asta malbado asina controla nos? Kico supersticion ta: Djis un co’i kens, of un posibel peliger?