Ocho hende so a sobrevivi Diluvio, pero cu tempo nan a aumenta na cantidad te bira hopi miles. Anto 352 aña despues di Diluvio, Abraham a nace. Nos lo siña con Dios a cumpli cu su promesa dunando Abraham un yiu cu a ser yama Isaak. Anto, di e dos yiunan di Isaak, Dios a scohe Jacob.

Jacob tabatin un famia grandi di 12 yiu homber y algun yiu muher. Dies yiu homber di Jacob a odia Jose, un ruman chikito di nan, y nan a bend’e pa e bira esclabo na Egipto. Despues, Jose a bira un gobernante importante di Egipto. Ora un hamber grandi a bini, Jose a pone su rumannan na prueba pa e mira si nan curason a cambia. Finalmente, tur e famia di Jacob, e Israelitanan, a bai biba na Egipto. Esei a sosode 290 aña despues di nacemento di Abraham.

Durante e siguiente 215 añanan e Israelitanan a biba na Egipto. Despues di morto di Jose, nan a bira esclabo ei. Cu tempo Moises a nace, y Dios a uz’e pa libera e Israelitanan for di Egipto. En total, Parti DOS ta cubri 857 aña di historia.