Зын уавӕрты Финеесы бафӕзмдзынӕ?

ӔМБЫРДЫ хистӕр нӕлгоймагӕй лӕггад кӕнай, уый стыр кад у. Фӕлӕ Хуыцауы Ныхасы куыд фыст ис, афтӕмӕй хистӕр нӕлгоймӕгтӕ алыхуызон зындзинӕдтыл ӕмбӕлынц. Зӕгъӕм, хатт сӕ фӕхъӕуы, тӕригъӕд чи ракодта, уыцы адӕймагӕн Йегъовӕйы номӕй тӕрхон кӕнын (2 Аз. 19:6). Кӕнӕ та хистӕр нӕлгоймӕгтӕй иуӕй-иутӕ Моисейау сӕ ныфс нӕ фӕхӕссынц, цы хъуыддаг сын бахӕс кӕнынц, уымӕ. Йегъовӕ Моисейы израилӕгты Египетӕй ракӕнынмӕ куы ’рвыста, уӕд Моисей сӕрныллӕгӕй загъта: «Ӕз чи дӕн, цӕмӕй фараонмӕ ацӕуон?» (Рац. 3:11).

Хистӕр нӕлгоймӕгтӕ нысангонд ӕрцӕуынц Хуыцауы сыгъдӕг тыхӕй, ӕмӕ кӕддӕр Хуыцауы Ныхас дӕр уыцы сыгъдӕг тыхӕй ӕрцыд фыст. Уым фыст ис, зын уавӕрты дӕр-иу, Йегъовӕйы цӕсты раст куыд у, афтӕ чи бакодта, ахӕм цӕстдарджыты тыххӕй. Зӕгъӕм, Финеес уыди хистӕр сауджын Ааронӕн йӕ фырт Елеазары фырт, ӕмӕ уый дӕр хъуамӕ хистӕр сауджын суыдаид. Йӕ цардӕй йын ӕркӕсдзыстӕм ӕртӕ хабармӕ ӕмӕ фендзыстӕм, абон хистӕр нӕлгоймӕгтӕн дӕр сӕ бон куыд у зын уавӕрты хъӕбатырӕй ӕмӕ ӕмбаргӕйӕ архайын ӕмӕ сӕ зӕрдӕ Йегъовӕйыл дарын.

Архайдта ӕвӕстиатӕй

Израилӕгтӕ сӕ цатыртӕ Моавы быдырты куы ’рӕвӕрдтой, уӕд Финеес нырма ӕрыгон лӕппу уыди. Библийы фыст ис: «Израилӕгтӕ райдыдтой Моавы чызджытимӕ хӕтын. [...] Ӕмӕ сын израилӕгтӕ райдыдтой сӕ нывӕндтӕй хӕрын ӕмӕ сӕ хуыцӕуттӕн кувын» (Ным. 25:1, 2). Ӕмӕ сӕ уый тыххӕй Йегъовӕ цӕгъдын райдыдта. Дӕ цӕстытыл-ма ауайын кӕн, уыдӕттӕ уынгӕйӕ Финеес куыд фӕуыдаид?

Библийы дарддӕр кӕсӕм: «Уыцы рӕстӕг дын Израилы фырттӕй иу йе ’фсымӕрты ’хсӕнмӕ, Моисейы ӕмӕ ӕппӕт Израилы адӕмы раз, мадиамаг сылгоймаджы куы ’рбакӕнид. Адӕм та лӕууыдысты ӕмбырды цатыры раз ӕмӕ ӕрдиаг кодтой» (Ным. 25:6). Куыд бакодта сауджын Финеес? Уый йӕ лӕджы кары дӕр нӕма уыди, уыцы фидиссаг израилаг та уыд мыггаджы хистӕр ӕмӕ адӕмӕн Хуыцауӕн кувыны хъуыддаджы разамынд лӕвӕрдта (Ным. 25:14).

Фӕлӕ Финеес адӕмӕй нӕ тарст – уый тарсти Йегъовӕйӕ. Уыцы нӕлгоймаджы ӕмӕ сылгоймаджы куы федта, уӕд уайтагъд арц фелвӕста, сӕ фӕдыл цатырмӕ бахызт ӕмӕ сӕ дыууӕйы дӕр барӕхуыста. Цымӕ Финеес уыцы уавӕры ахӕм хъӕбатырдзинад кӕй равдыста ӕмӕ ӕвӕстиатӕй кӕй архайдта, уымӕ Йегъовӕ цы цӕстӕй ракаст? Уайтагъд израилӕгтӕм йӕ маст ӕрсабыр, ӕмӕ нал цагъды кодтой. Финеесӕн та Йегъовӕ раарфӕ кодта – йемӕ скодта бадзырд, йӕ байзӕддӕгтӕ «ӕнустӕм» сауджынтӕ кӕй уыдзысты, уый фӕдыл (Ным. 25:7–13).

Кӕй зӕгъын ӕй хъӕуы, абон хистӕр нӕлгоймӕгтӕ, тӕригъӕд чи ракӕна, уый маргӕ нӕ акӕндзысты. Фӕлӕ уӕддӕр Финеесау уыдон дӕр хъуамӕ фидарӕй ӕмӕ ныфсджынӕй архайой. Зӕгъӕм, Гильермо хистӕр нӕлгоймагӕй цалдӕр мӕйы йеддӕмӕ нӕма лӕггад кодта, афтӕмӕй йын загътой, цӕмӕй, тӕригъӕд чи ракодта, иу ахӕм хистӕр нӕлгоймаджы хъуыддаг ӕфсымӕртимӕ равзӕрстаид. Гильермо ма ӕрыгондӕр куы уыди, уӕд ын уыцы хистӕр нӕлгоймаг тынг баххуыс кодта. «Ахӕм зын уавӕры никуыма уыдтӕн,– зӕгъы Гильермо.– Ӕхсӕв фынӕй нал зыдтон. Мӕ хъуыдытӕ иууылдӕр уыдысты, куыд бакӕнон, ууыл. Зондӕй йӕ ӕмбӕрстон, Йегъовӕйы уагӕвӕрдтӕм гӕсгӕ мӕ кӕй хъӕуы архайын, фӕлӕ мӕ зӕрдӕ та иннӕрдӕм дзырдта. Цалдӕр боны Йегъовӕмӕ фӕкуывтон ӕмӕ нӕ литературӕйы уый фӕдыл ӕрмӕг  фӕагуырдтон». Уый фӕрцы Гильермо йӕхимӕ уыйбӕрц ныфс ссардта, цӕмӕй ахӕм зын уавӕры, раст куыд у, афтӕ бакодтаид ӕмӕ уыцы ӕфсымӕрӕн йӕ рӕдыд бамбарынӕн ӕмӕ та ногӕй Йегъовӕйы хорзӕх ссарынӕн баххуыс кодтаид (1 Тим. 4:11, 12).

Ахӕм уавӕрты хистӕр нӕлгоймӕгтӕ фидарӕй ӕмӕ ныфсджынӕй куы архайой, уӕд сӕ уырнындзинад ӕмӕ сӕ иузӕрдиондзинадӕй ӕмбырды иннӕтӕн уыдзысты фӕзминаг. Фӕлӕ хъӕбатырдзинад хъӕуы не ’ппӕты дӕр. Зӕгъӕм, ӕмбырды чидӕр уӕззау тӕригъӕд кӕй сарӕзта, уый куы базонӕм, уӕд ӕй хъуамӕ ма басусӕг кӕнӕм. Нӕ бинонтӕй йе та не ’мбӕлттӕй искӕй ӕмбырдӕй куы ацух кӕной, уӕд та хъуамӕ йемӕ мауал дзурӕм ӕмӕ афтӕмӕй равдисӕм, Йегъовӕйыл иузӕрдион кӕй стӕм, уый (1 Кор. 5:11–13).

Ӕмбаргӕдзинад фыдбылызы зынг ахуыссын кӕны

Финеес ахӕм хъӕбатыр кӕй разынд, уый ууыл дзурӕг нӕу, ӕмӕ йе уӕнгты нырма йе ’рыгон туг кӕй фыхти, уый тыххӕй бакодта афтӕ. Ӕркӕс-ма, ӕндӕр хабары тыххӕй куы фехъуыста, уӕд куыд равдыста, ӕмбаргӕ, кӕнӕ арфуынӕг, кӕй уыд, уый. Рувимы мыггаг, Гады мыггаг ӕмӕ Манассийы мыггаджы ӕмбис Иорданы цӕугӕдонмӕ хӕстӕг нывондхӕссӕн куы сарӕзтой, уӕд иннӕ израилӕгтӕ загътой, зӕгъгӕ, адон мӕнгхуыцӕуттӕн кувынц, ӕмӕ сӕхи ӕрцӕттӕ кодтой, цӕмӕй семӕ схӕцыдаиккой (Йес. Н. 22:11, 12).

Ацы уавӕры та Финеес куыд бакодта? Израилы мыггӕгты хистӕр лӕгтимӕ ацыд, нывондхӕссӕн чи сарӕзта, уыдонмӕ ӕмӕ хъуыддагыл семӕ сабырӕй аныхас кодта. Ӕмӕ сын уӕд уыдон хабар бамбарын кодтой, зӕгъгӕ, уыцы нывондхӕссӕн уый тыххӕй сарӕзтам, цӕмӕй ӕвдисӕн уа, мах дӕр «Йегъовӕйӕн кӕй лӕггад кӕндзыстӕм», уымӕн. Афтӕмӕй Финеес фыдбылызы зынг ахуыссын кодта (Йес. Н. 22:13–34).

Исчи нын не ’фсымӕр кӕнӕ нӕ хойы тыххӕй ӕвзӕрӕй исты куы дзура йе та йӕ цавӕрдӕр хъуыддаджы куы аххосджын кӕна, уӕд цымӕ хорз нӕ уаид Финеесы бафӕзмын? Ӕмбаргӕ куы уӕм, уӕд искӕй ныхӕсты тыххӕй не ’фсымӕрмӕ нӕ мӕсты кӕндзыстӕм ӕмӕ нӕхӕдӕг дӕр йӕ фыдкой кӕнын нӕ райдайдзыстӕм (Ӕмб. 19:11).

Ӕмбаргӕдзинад хистӕр нӕлгоймӕгтӕн куыд баххуыс кӕндзӕн, цӕмӕй уыдон дӕр Финеесау архайой? Дӕс азӕй фылдӕр хистӕр нӕлгоймагӕй чи лӕггад кӕны, иу ахӕм ӕфсымӕр, Хайме, зӕгъы: «Хо кӕнӕ ӕфсымӕр ӕмбырды искӕимӕ кӕрӕдзи куы нӕ бамбарынц ӕмӕ мын уый тыххӕй куы радзуры, уӕд уайтагъд Йегъовӕмӕ скувын ӕмӕ дзы ӕххуыс ракурын, цӕмӕй сӕ макӕй фарс рахӕцон, фӕлӕ йын Библимӕ гӕсгӕ уынаффӕ раттон. Иухатт мын иу хо загъта, ӕндӕр ӕмбырдӕй йӕ иу бӕрнон ӕфсымӕр кӕй фӕхъыг кодта. Уыцы ӕфсымӕр ме ’мбал уыди ӕмӕ мӕ бон уыди йемӕ аныхас кӕнын. Фӕлӕ уый бӕсты хоимӕ иумӕ Библийӕ цалдӕр уагӕвӕрдмӕ ӕркастыстӕм, ӕмӕ сразы, цӕмӕй уал фыццаг йӕхӕдӕг уыцы ӕфсымӕрмӕ бацыдаид ӕмӕ йемӕ аныхас кодтаид (Матф. 5:23, 24). Хо йемӕ аныхас кодта, фӕлӕ уӕддӕр нӕ бафидыдтой. Ӕмӕ йӕ уӕд баразӕнгард кодтон, цӕмӕй Библийӕ ӕндӕр уагӕвӕрдтыл дӕр лӕмбынӕг ахъуыды кодтаид. Гъемӕ хо загъта, дарддӕр дӕр уый тыххӕй кӕй кувдзӕн ӕмӕ кӕй бацархайдзӕн, цӕмӕй йын ныххатыр кӕна».

Ӕмӕ хабар дарддӕр куыд рауад? Хайме зӕгъы: «Цалдӕр мӕйы фӕстӕ мӕм уыцы хо ӕрбацыд ӕмӕ мын загъта, фӕстӕдӕр уыцы ӕфсымӕр йӕ ныхӕстыл кӕй фӕфӕсмон кодта. Ӕфсымӕр йемӕ уацамындмӕ баныхас кодта ӕмӕ  иумӕ куы хъусын кодтой, уӕд дзы раппӕлыд, ахӕм хорз миниуджытӕ кӕй равдыста, уый тыххӕй. Уыйадыл хъуыддаг банывыл. Сӕ хъуыддаджы мӕхи куы фӕтъыстаин, уӕд афтӕ рауадаид, цыма сӕ кӕйдӕр фарс хӕцын. Ӕмӕ уӕд хъуыддаг, ӕвӕццӕгӕн, афтӕ хорз нӕ аскъуыддзаг уыдаид». Библийы ахӕм уынаффӕ ис: «Адӕймагыл бахъаст кӕныныл тагъд ма кӕн» (Ӕмб. 25:8). Ӕмбаргӕ хистӕр нӕлгоймӕгтӕ се ’мчырыстӕтты разӕнгард кӕнынц, цӕмӕй ахӕм уавӕрты Библийы уагӕвӕрдтӕм гӕсгӕ архайой ӕмӕ фарнмӕ тырной.

Йегъовӕйы бафарста

Финеесмӕ ахӕм стыр кад ӕрхауд, ӕмӕ Хуыцауы ӕвзӕрст адӕмӕн сауджынӕй лӕггад кодта. Уӕлдӕр куыд загътам, афтӕмӕй ӕрыгонӕй дӕр уыди тынг хъӕбатыр ӕмӕ ӕмбаргӕ. Фӕлӕ-иу цӕмӕй зын уавӕрты, раст куыд у, афтӕ бакодтаид, уый тыххӕй йӕ хъуыди йӕ зӕрдӕ ӕгасӕй дӕр Йегъовӕйыл дарын.

Иухатт Гивӕйы цӕрджытӕ иу левиты номылусӕн тыхми бакодтой ӕмӕ йӕ амардтой. Гивӕйы цӕрджытӕ уыдысты Вениамины мыггагӕй. Ӕмӕ уыцы ӕвирхъау хабары тыххӕй Израилы иннӕ мыггӕгтӕ куы фехъуыстой, уӕд сфӕнд кодтой сӕ ныхмӕ схӕцын ӕмӕ сӕ ныццӕгъдын (Тӕрх. 20:1–11). Ӕмӕ кӕд уый размӕ Йегъовӕмӕ скуывтой, уӕддӕр сӕ Вениамины мыггаг фӕд-фӕдыл дыууӕ хатты ныддӕрӕн кодта, ӕмӕ сӕ дзӕвгар фӕцагъды (Тӕрх. 20:14–25). Чи зоны, израилӕгтӕ афтӕ хъуыды кодтой, зӕгъгӕ нын Йегъовӕ нӕ куывдтытӕ нӕ хъусы ӕмӕ, ахӕм фыдхъуыддаг чи сарӕзта, уыдоны ныхмӕ кӕй рацыдыстӕм, уый йӕм нымады дӕр нӕу.

Финеес уӕд уыди Израилы хистӕр сауджын. Уый раздӕрау йӕ зӕрдӕ ӕгасӕй дӕр дардта Йегъовӕйыл ӕмӕ та ацы хъуыддаджы дӕр фӕстӕ нӕ фӕкодта. Финеес Йегъовӕмӕ скуывта ӕмӕ йӕ бафарста: «Ацӕуон ма ме ’фсымӕр Вениамины фырттимӕ хӕцынмӕ, ӕви мауал ацӕуон?» Йегъовӕ йын йӕ куывд фехъуыста ӕмӕ йын Вениамины мыггаг йӕ къухмӕ радта, ӕмӕ израилӕгтӕ Гивӕ арты хай бакодтой (Тӕрх. 20:27–48).

Ацы хабарӕй мах цӕуыл ахуыр кӕнӕм? Ӕмбырды цавӕрдӕр зындзинӕдтӕ куы фӕзыны, уӕд хистӕр нӕлгоймӕгтӕ ӕппӕт тыхтӕй фӕархайынц ӕмӕ Хуыцауӕй ӕххуыс фӕкурынц. Фӕлӕ хатт хъуыддаг уайтагъд нӕ аскъуыддзаг вӕййы. Ахӕм уавӕры хистӕр нӕлгоймӕгты сӕ зӕрдыл дарын хъӕуы Йесойы ныхӕстӕ: «Курут [кӕнӕ кувут], ӕмӕ уын ратдзысты, агурут, ӕмӕ ссардзыстут, хойут, ӕмӕ уын бакӕндзысты» (Лук. 11:9). Хистӕр нӕлгоймӕгтӕм афтӕ куы кӕса, ӕмӕ сын Йегъовӕ сӕ куывдӕн дзуапп ӕрӕгмӕ дӕтты, уӕд дӕр сӕ бон у фидарӕй ӕууӕндын, Йегъовӕ хъуыддагмӕ йӕ афоныл кӕй ӕркӕсдзӕн.

Зӕгъӕм, Ирландийы иу ӕмбырдӕн, кӕм ӕмбырд кодтаиккой, уый нӕ уыд, ӕмӕ сӕ тынг хъуыди Паддзахады зал. Фӕлӕ сын бынӕттон архитектор сӕ къух нӕ арӕзта. Ӕфсымӕртӕ зал саразын кӕм фӕнд кодтой, уыцы бынаты тыххӕй-иу ӕм куы бацыдысты ӕмӕ-иу ын проект куы равдыстой, уӕд та-иу сӕ рарвыста. Кӕд ма уыцы облӕсты сӕйраг архитектормӕ бацыдаиккой, ӕндӕр сӕ сӕрӕн ницыуал зыдтой. Цымӕ Йегъовӕ кӕддӕр Финеесы куывд куыд фехъуыста, афтӕ уыцы ӕфсымӕрты куывд дӕр фехъуыста?

Мӕнӕ цы загъта уыцы ӕмбырды хистӕр нӕлгоймӕгтӕй сӕ иу: «Хуыцаумӕ бирӕ фӕкуывтам ӕмӕ йын фӕлӕгъстӕ кодтам, ӕмӕ уый фӕстӕ ацыдыстӕм, сӕйраг архитектор кӕм куыста, уырдӕм. Немӕ ахастам нӕ проект дӕр, цыдӕртӕ дзы фӕивтам, афтӕмӕй. Уым мын загътой, цалдӕр къуырийӕ раздӕр ӕм кӕй нӕ бахаудзыстӕм. Фӕлӕ куыддӕр ӕгъдауӕй нӕ къухы бафтыд йемӕ фондз минуты бӕрц аныхас кӕнын. Нӕ проектмӕ нын куы ’ркаст, уӕд нын уайтагъд бар радта, уӕ хъуыддаг дарддӕр кӕнут, зӕгъгӕ. Ӕмӕ нын уӕдӕй фӕстӕмӕ бынӕттон архитектор дӕр, йӕ бон цӕмӕй уыд, уымӕй ӕххуыс кӕнын райдыдта. Уыцы хабар нӕ стыр ныфс бауагъта, уымӕн ӕмӕ, куывдӕн цӕй стыр тых ис, уый нӕхи цӕстӕй федтам». Ӕцӕгдӕр, Йегъовӕ дзуапп дӕтдзӕн, йӕ зӕрдӕ йыл чи дары, уыцы хистӕр нӕлгоймӕгты зӕрдиаг куывдтытӕн.

Финеесӕн рагон Израилы адӕмы ’хсӕн ӕнцон хӕстӕ нӕ уыд. Фӕлӕ ахӕм хъӕбатыр ӕмӕ ӕмбаргӕ кӕй уыди, стӕй йӕ зӕрдӕ ӕгасӕй дӕр Хуыцауыл кӕй дардта, уый фӕрцы цыфӕнды зын уавӕрты дӕр йӕ бон уыди раст архайын. Ӕмӕ Хуыцауы адӕмыл афтӕ зӕрдиагӕй кӕй тыхсти, уый тыххӕй дзы Йегъовӕ тынг райгонд уыди. Ӕнустӕ фӕстӕдӕр Хуыцау Ездрӕйӕн ахӕм ныхӕстӕ ныффыссын кодта: «Раздӕр сӕ хистӕр уыд Елеазары фырт Финеес. Йегъовӕ уыди йемӕ» (1 Аз. 9:20). Цӕй уӕдӕ Йегъовӕ Финеесимӕ куыд уыди, афтӕ уӕд, абон йӕ адӕмы ’хсӕн йӕхимӕ разамынд чи исы, уыдонимӕ дӕр ӕмӕ иннӕ иузӕрдион чырыстӕттимӕ дӕр.