4 СӔРГОНД
Йесо Киристе ка ӕй?
1. Киристе кӕцӕй ӕрцудӕй?
Адӕмӕн Киристей хӕццӕ ӕнцон цӕмӕн адтӕй? (МАТФЕЙЙИ 11:29; МАРКИ 10:13–16)
Йесо зӕнхӕбӕл ку нӕма райгурдӕй, уӕд уой разӕй цардӕй уӕлӕрвти ӕма адтӕй изӕд (Иоанни 8:23). Хуцау тӕккӕ фиццаг Йесой сфӕлдиста, уой фӕсте ба алцидӕр еумӕ кодтонцӕ. Йеговӕ ӕхуӕдӕг ӕрмӕстдӕр Киристей сфӕлдиста, ӕма ’й уомӕ гӕсгӕ Библи хонуй «еунӕг фурт» (Иоанни 1:14). Удта ма ’й хонуй «Дзурд» дӕр, уомӕн ӕма Хуцауи номӕй дзурдта. Бакӕсӕ Ӕмбесӕндтӕ 8:22, 23, 30; Колоссӕгтӕмӕ 1:15, 16.
2. Йесо зӕнхӕмӕ цӕмӕн ӕрцудӕй?
Хуцау ӕ Фурти цард рахаста дзиуиттаг кизги, Марийи, хурфӕмӕ. Марийӕ адтӕй ӕнӕвнӕлд кизгӕ. Е уобӕл дзорӕг ӕй, ӕма Йесойӕн зӕнхон фидӕ нӕ адтӕй (Лукай 1:30–35). Киристе зӕнхӕмӕ уой туххӕй ӕрцудӕй, 1) цӕмӕй адӕмӕн Хуцауи туххӕй дзурдтайдӕ, 2) ӕ фӕндон ӕнхӕст кӕнун ин куд гъӕуй, сауӕнгӕ ма зин уавӕрти дӕр, уомӕн цӕветтон ниууагътайдӕ ӕма 3) цӕмӕй е ’нхӕст цардӕй адӕми тӕрегъӕдтӕбӕл бафистайдӕ. Бакӕсӕ Матфеййи 20:28.
3. Адӕми тӕрегъӕдтӕбӕл федун цӕмӕн багъудӕй?
Цӕмӕй ахӕст адӕймаги исуӕгъдӕ кӕнонцӕ, уой туххӕй ибӕл ахӕсти аргъ бафедун фӕгъгъӕуй (Рацуд 21:29, 30). Хуцауи нӕ фӕндадтӕй, цӕмӕй адӕм зӕронд кодтайуонцӕ ӕма мардайуонцӕ. Цӕмӕн ес уотӕ зӕгъӕн? Хуцау фиццаг адӕймагӕн, Адамӕн, загъта, зӕгъгӕ, тӕрегъӕд ку искӕнай, уӕд рамӕлдзӕнӕ. Е уобӕл дзорӕг ӕй, ӕма Адам тӕрегъӕд ку не ’скодтайдӕ, уӕд ӕностӕмӕ цардайдӕ (Райдайӕн 2:16, 17; 5:5). Библи куд зӕгъуй, уомӕ гӕсгӕ дуйнемӕ мӕлӕт «ӕрцудӕй» Адами фудӕй. Адамӕн ба ӕ байзӕдтӕгтӕ сӕ тоги рахастонцӕ тӕрегъӕд, тӕрегъӕд ба кӕнуй мӕлӕтмӕ. Мадта цӕмӕй мӕлӕтӕй исуӕгъдӕ уӕн, уой туххӕй нин гъудӕй нӕ тӕрегъӕдтӕбӕл устур аргъ бафедун. Бакӕсӕ Ромӕгтӕмӕ 5:12; 6:23.
Ке бон адтӕй еци устур аргъ бафедун ӕма нӕ мӕлӕтӕй исуӕгъдӕ кӕнун? Адӕймаг ку рамӕлуй, уӕд ӕрмӕстдӕр ӕхе тӕрегъӕдтӕбӕл бафедуй. Еунӕг ӕнӕнхӕст адӕймаги бон дӕр нӕй еске тӕрегъӕдтӕбӕл бафедун. Бакӕсӕ Псалом 49:7–9.
4. Йесо цӕмӕн рамардӕй?
Иннӕ адӕмӕй уӕлдай Йесо адтӕй ӕнхӕст адӕймаг. Ӕма ’й ӕхе тӕрегъӕдти туххӕй мӕлун нӕ гъудӕй, уомӕн ӕма рӕдуйгӕ некӕд нецӕми фӕккодта. Киристе рамардӕй адӕми тӕрегъӕдти туххӕй. Хуцау ӕ Фурти цард мах туххӕй ке равардта, уомӕй бӕрӕг ӕй, куд хъӕбӕр нӕ уарзуй, е. Еци гъуддагӕй айдагъ Хуцауи уарзондзийнадӕ не ’сбӕрӕг ӕй, фал Йесой уарзондзийнадӕ дӕр, уомӕн ӕма ӕ Фидӕмӕ байгъуста ӕма адӕми туххӕй ӕ цард нӕ бавгъау кодта. Бакӕсӕ Иоанни 3:16; Ромӕгтӕмӕ 5:18, 19.
Бакӕсӕ видеороликмӕ «Киристе цӕмӕн рамардӕй?»
5. Абони Киристе ци куст кӕнуй?
Киристе зӕнхӕбӕл ку цардӕй, уӕд сӕйгити дзӕбӕх кодта, мӕрдти игас кодта ӕма тухст уавӕри ка бахауидӕ, уонӕн дӕр ӕнхус кодта. Еци гъуддӕгтӕй бавдиста, коммӕгӕс адӕмӕн федӕни цӕхуӕн хуарздзийнӕдтӕ искӕндзӕй, уой (Матфеййи 15:30, 31; Иоанни 5:28). Киристе ку рамардӕй, уӕд ӕй Хуцау райгас кодта изӕди бауӕри (1 Петури 3:18). Уой фӕсте Йесо Хуцауи рахес фарс исбадтӕй ӕма ӕнгъӕлмӕ кастӕй, цалинмӕ ин Хуцау паддзахи бартӕ ӕ къохмӕ нӕ ратта, уӕдмӕ (Дзиуиттӕгтӕмӕ 10:12, 13). Нур Киристе уӕлӕрвти ӕй Паддзах, ӕ фӕдбӕлдзӕугутӕ ба еци хуарз хабар игъосун кӕнунцӕ ӕгас зӕнхӕбӕл дӕр. Бакӕсӕ Данел 7:13, 14; Матфеййи 24:14.
Тагъд рӕстӕги Йесо ӕ паддзахи бартӕй испайда кӕндзӕй. Зӕнхӕ лӕгъуз адӕмӕй искӕдзос кӕндзӕй ӕма гъезӕмӕрттӕн кӕрон искӕндзӕй. Киристебӕл ка ӕууӕндуй ӕма имӕ ка игъосуй, етӕ еугурӕйдӕр амондгун цард кӕндзӕнцӕ дзенети зӕнхӕбӕл. Бакӕсӕ Псалом 37:9–11.
