1. Не Сфӕлдесӕги туххӕй ци базудтай?

КӔД Йегови Ӕвдесӕнти бийнонти исгъомбӕл дӕ, уӕд, ӕвӕдзи, дӕ минкъийӕй нурмӕ Хуцауи туххӕй берӕ цидӕртӕ базудтай. Дӕ ниййергутӕ дин, ӕвӕдзи, дзурдтонцӕ, алцидӕр Йеговӕ ке сфӕлдиста, удта имӕ берӕ хуарз менеугутӕ ке ес ӕма ’й зӕнхӕй дзенет рауайун кӕнун ке фӕндуй (Райд. 1:1; Гъуд. 17:24–27).

2. Сфӕлдесӕгбӕл ка ӕууӕндуй, уони туххӕй беретӕ ци гъуди кӕнунцӕ?

² Абони беретӕ Хуцаубӕл не ’ууӕндунцӕ ӕма фӕззӕгъунцӕ, Хуцау, дан, нӕййес. Сӕ гъудимӕ гӕсгӕ зӕнхӕбӕл цард фӕззиндтӕй эволюций фӕрци, гъома ӕхегъӕди. Уобӕл ка ӕууӕндуй, уонӕй кадӕртӕ ахургӕндтӕ дӕр ӕнцӕ. Арӕх фӕззӕгъунцӕ, зӕгъгӕ, Библи наукӕмӕ гӕсгӕ раст нӕй ӕма, дан, Сфӕлдесӕгбӕл ӕрмӕстдӕр ӕнцонсайӕн адӕн ӕууӕндунцӕ.

3. Сфӕлдесӕг ке ес, еци гъудимӕ нӕхуӕдтӕ цӕмӕн гъӕуама ӕрцӕуӕн?

³ Цума уомӕн ес гӕнӕн, цӕмӕй, кӕцидӕр ахургонд адӕн ци гъуди кӕнунцӕ, уой туххӕй Сфӕлдесӕгбӕл мабал ӕууӕндӕн? Цӕмӕй уотӕ ма рауайа, уой туххӕй гъӕуама нӕхе бафӕрсӕн: Йеговӕ Сфӕлдесӕг ке ӕй, уобӕл цӕмӕн ӕууӕндӕн? Кадӕр нин ӕй ке загъта, уой туххӕй ӕви уомӕн бӕлвурдгӕнӕнтӕ нӕхуӕдтӕ ке иссирдтан, уой туххӕй? (1 Кор. 3:12–15). Кӕд Йеговӕн рагӕй лӕггадӕ кӕнӕн, уӕддӕр нӕ не ’ууӕндундзийнадӕ федар кӕнун гъӕуй. Ӕма нӕ гъе уӕд Библий нихмӕ ка дзоруй, уони «зундгин дзубандитӕ» некӕд фӕкъкъулумпи кӕндзӕнцӕ (Кол. 2:8; Дзиуит. 11:6). Аци статьяй базондзиан: 1) Беретӕ Сфӕлдесӕгбӕл цӕмӕннӕ ӕууӕндунцӕ? 2) Ци нин банхус кӕндзӕй, Сфӕлдесӕг ке ес,  уобӕл федарӕй ӕууӕндун? 3) Нӕ бон ци ӕй кӕнун, цӕмӕй не ’ууӕндундзийнадӕ федардӕр кӕна?

4. Дзиуиттӕгтӕмӕ 11:1 куд финст ӕй, уомӕ гӕсгӕ ӕцӕг ӕууӕндундзийнадӕ цӕхуӕн фӕууй?

⁴ Еуӕй-еуети гъудимӕ гӕсгӕ ӕууӕндундзийнадӕ ӕй, адӕймаг ӕнӕ бӕлвурдгӕнӕнтӕй естӕбӕл ку ’ууӕнда. Фал Библимӕ гӕсгӕ ӕцӕг ӕууӕндундзийнадӕ уӕхӕн нӕ фӕууй. (Бакӕсӕ Дзиуиттӕгтӕмӕ 11:1.) Хуцауи Дзурдти финст ӕй, ӕцӕг ӕууӕндундзийнадӕн федар бӕлвурдгӕнӕнтӕ ке фӕууй. Кӕд Йегови, Йесой ӕма уӕларвон паддзахадӕ уинун нӕ бон нӕй, уӕддӕр берӕ бӕлвурдгӕнӕнтӕ ес, ӕцӕгӕйдӕр ке ’нцӕ, уомӕн (Дзиуит. 11:3). Биохимиккӕй ка косуй, еу уӕхӕн ӕнсувӕр уотӕ загъта: «Мах цъундӕ цӕститӕй не ’ууӕндӕн ӕма цӕбӕл ӕууӕндӕн, е науки нихмӕ нӕй».

5. Беретӕ цӕмӕн ӕууӕндунцӕ, цард ӕхегъӕди ке фӕззиндтӕй, уобӕл?

⁵ Фал кӕд Сфӕлдесӕг ке ес, уомӕн берӕ бӕлвурдгӕнӕнтӕ ес, уӕд ибӕл беретӕ цӕмӕннӕ ӕууӕндунцӕ? Уомӕн ӕма еци фарста некӕд рартастонцӕ. Еу Йегови Ӕвдесӕн Роберт зӕгъуй: «Сфӕлдесӕг ке ес, уобӕл скъолай некӕд дзурдтонцӕ, ӕма ибӕл ӕз дӕр не ’ууӕндтӕн. 22 анзи мӕбӕл ку цудӕй, уӕд Йегови Ӕвдесӕнтӕбӕл рамбалдтӕн, ӕма мин уӕд фиццаг хатт Библийӕй бӕлвурдгӕнӕнтӕ бавдистонцӕ, Сфӕлдесӕг ке ес, уомӕн» *. (Кӕсӕ рамкӕ « Ниййергутӕн».)

6. Беретӕ Сфӕлдесӕгбӕл цӕмӕннӕ ӕууӕндунцӕ?

⁶ Еуӕй-еуетӕ Сфӕлдесӕгбӕл не ’ууӕндунцӕ, уомӕн ӕма, дан, ӕй некӕд фӕууидтан. Фал ӕндӕр ӕнӕуингӕ гъуддӕгтӕбӕл ба ӕууӕндунцӕ, зӕгъӕн, гравитацибӕл,  уомӕн ӕма ин федар бӕлвурдгӕнӕнтӕ ес. Библий ци ӕууӕндундзийнади кой цӕуй, е ӕй, адӕймаг «бӕлвурдгӕнӕнти фӕрци ку зона, цӕстӕй ци нӕ уинуй, етӕ ӕцӕгӕйдӕр ке ’нцӕ» (Дзиуит. 11:1). Еци бӕлвурдгӕнӕнтӕ ӕртасунмӕ рӕстӕг ӕма хъауритӕ гъӕуй, ӕма уомӕ гӕсгӕ берети нӕ фӕффӕндуй сӕхецӕн зин кӕнун. Ӕма удта фӕззӕгъунцӕ: «Хуцау нӕййес».

7. Цума ахургӕндтӕй Хуцаубӕл неке ӕууӕндуй? Ба ’й лӕдӕрун кӕнӕ.

⁷ Бӕлвурдгӕнӕнтӕ ка рартаста, еци ахургӕндтӕй беретӕ баууӕндтӕнцӕ, Дун-дуйне Хуцау ке искодта, уобӕл *. Уӕлдӕр ке кой кодта, еци Роберти хузӕн си кадӕртӕ фиццаг не ’ууӕндтӕнцӕ, уомӕн ӕма сӕ уобӕл некӕд некӕми ахур кодтонцӕ. Фал си уӕддӕр беретӕ Йегови базудтонцӕ ӕма ’й бауарзтонцӕ. Мах дӕр гъӕуама нӕхуӕдтӕ архайӕн,  цӕмӕй Йеговӕбӕл федарӕй ӕууӕндӕн. Еци гъуддаг нӕ бӕсти неке бакӕндзӕй.

8, 9. а) Идарддӕр цӕхуӕн фарстатӕбӕл радзубанди кӕндзиан? б) Нӕ алливарс ци уинӕн, уобӕл ку сагъӕс кӕнӕн, уӕд нин е ци пайда ӕрхӕсдзӕй?

⁸ Ци нин банхус кӕндзӕй, Сфӕлдесӕг ке ес, уобӕл федарӕй ӕууӕндун? Ӕркӕсӕн цалдӕр гъуддагемӕ.

⁹ Хуцау ци сфӕлдиста, уой туххӕй фулдӕр базонӕ. Зӕнхӕбӕл цидӕриддӕр ирӕзуй ӕма цӕруй, уони туххӕй, удта стъалути туххӕй фулдӕр ку базонай, уӕд ӕй дӕхуӕдӕг балӕдӕрдзӕнӕ, Сфӕлдесӕг син ке ес (Пс. 19:1; Ис. 40:26). Куд фулдӕр ӕртасай, уотӕ де ’ууӕндундзийнадӕ дӕр федардӕр кӕндзӕй. Йегови Ӕвдесӕнтӕ берӕ статьятӕ рауагътонцӕ, Хуцау ци сфӕлдиста, етӕ еугурӕйдӕр куд дессаги конд ӕнцӕ, уой фӕдбӕл. Кӕд дин еци статьятӕ ӕнцонлӕдӕрӕн нӕ ’нцӕ, уӕддӕр архайӕ, цӕмӕй сӕ балӕдӕрай. Уомӕй уӕлдай ма Хуцауи сфӕлдистади туххӕй фӕстаг ӕнзти Регионалон конгрессти дӕр берӕ рӕсугъд видеороликтӕ уагъд ӕрцудӕй. Дӕ бон сӕмӕ ӕй нӕуӕгӕй бакӕсун сайти jw.org.

10. Сфӕлдесӕг ке ес, е цӕмӕй бӕрӕг ӕй? Ӕрхӕссӕ цӕветтон (Ромӕгтӕмӕ 1:20).

¹⁰ Дун-дуйней цитӕ ес, уони туххӕй ести ку базонис, уӕд расагъс кӕнисӕ, Сфӕлдесӕги туххӕй ци ӕргом кӕнунцӕ, уобӕл. (Бакӕсӕ Ромӕгтӕмӕ 1:20.) Зӕгъӕн, хор зӕнхӕ тавуй ӕма дӕттуй рохс. Уой фӕрци зӕнхӕбӕл ес цард. Фал хори тунтӕй кӕцидӕртӕ адӕймагӕн тӕссаг ӕнцӕ. Еци тунтӕй нӕ ци гъӕуай кӕнуй? Зӕнхи алливарс ес озони цъарӕ, ӕма нӕмӕ еци тунтӕ нӕ уадзуй. Еци тунтӕ куд карздӕр фӕуунцӕ, уотӕ озон дӕр фулдӕр фӕккӕнуй. Мадта цума е уобӕл дзорӕг нӕй, ӕма нӕ берӕ ка уарзуй, уӕхӕн зундгин Сфӕлдесӕг нин ес?

11. Сфӕлдесӕг ке ес, уомӕн ма бӕлвурдгӕнӕнтӕ кӕми ес иссерӕн? (Кӕсӕ рамкӕ « Сфӕлдесӕг ке ес, уобӕл баууӕндунмӕ ма нин ци банхус кӕндзӕй?».)

¹¹ Дӕ бон ӕй фулдӕр бӕлвурдгӕнӕнтӕ иссерун «Индекс публикаций Сторожевой башни» ӕма сайти jw.org. Дӕ бон ӕй ӕркӕсун, хаййи «Случайность или замысел?» ци статьятӕ ӕма видеотӕ ес, уонӕмӕ. Цубур ӕнцӕ ӕма си дзурд цӕуй, цӕрӕгойтӕ ӕма зайӕгойти туххӕй. Удта ма си дзурд цӕуй, ахургӕндтӕ сфӕлдистадӕмӕ кӕсгӕй цитӕ ӕргъуди кодтонцӕ, уобӕл.

12. Библи ӕртасгӕй нӕ гъос цӕмӕ гъӕуама дарӕн?

¹² Библи ӕртасӕ. Уӕлдӕр ке кой кодтан, еци биохимик фиццӕгти не ’ууӕндтӕй Сфӕлдесӕг ке ес, уобӕл, фал фӕстӕдӕр ба баууӕндтӕй. Ӕхуӕдӕг куд зӕгъуй, уомӕ гӕсгӕ ин айдагъ наукон гъуддӕгтӕ ке ӕртаста, е нӕ банхус кодта, фал ма Библи лӕмбунӕг ке ӕртаста, е дӕр. Ка ’й зонуй, Библий ахурӕдтӕ хуарз зонис. Фал цӕмӕй Сфӕлдесӕг ке ес, уобӕл никки хъӕбӕрдӕр ӕууӕндай, уой туххӕй ба дӕ гъӕуй идарддӕр дӕр ӕртасун Библи (Йес. Н. 1:8; Пс. 119:97). Библи ӕртасгӕй дӕ гъос дарӕ рагон хабӕрттӕ си куд финст ӕнцӕ, уомӕ, удта си ци пахампарӕдтӕ ес, етӕ куд исӕнхӕст ӕнцӕ ӕма ӕнӕгъӕнӕ Библий дӕр еу гъуди куд цӕуй, уомӕ. Гъе уотӕ ку ’ртасай уӕд ди бонӕй-бонмӕ никки хъӕбӕрдӕр ӕруагӕс кӕндзӕй, махӕн дӕр ӕма нӕ алливарс ци ес, уонӕн дӕр зундгин Сфӕлдесӕг ке ес ӕма Библи дӕр ӕ сугъдӕг хъаури фӕрци финст ке ’рцудӕй * (2 Тим. 3:14; 2 Пет. 1:21).

13. Хуцауи Дзурди зундгин унаффитӕ ке ес, е цӕмӕй бӕрӕг ӕй?

¹³ Библи ӕртасгӕй ма дӕ гъос дарӕ, цӕхуӕн унаффитӕ си ес, уонӕмӕ дӕр. Зӕгъӕн, цалдӕр мин анзей размӕ си финст ӕрцудӕй,  ӕхца ка уарзуй, еци адӕймаг ӕхе «берӕ мӕстити хай» ке бакӕнуй (1 Тим. 6:9, 10; Ӕмб. 28:20; Матф. 6:24). Цума еци фӕдзӕхст абони махмӕ дӕр хауй? Еу киунуги финст ӕй: «Гъӕздуг цард ка уарзуй, уӕхӕн адӕн ӕнамонд арӕхдӕр фӕуунцӕ, удта сӕмӕ депресси дӕр арӕхдӕр фӕууй. Уотид фулдӕр ӕхца бакосунмӕ ка фӕббӕллуй, етӕ дӕр ӕнамонд фӕуунцӕ, удта сӕ незтӕ дӕр арӕх фӕттухсун кӕнунцӕ». Мадта нӕ Библи ӕхца уарзунӕй дзӕгъӕли нӕ фӕдзӕхсуй! Дӕ бон ма ӕй расагъӕс кӕнун, дӕ цард дин ка фӕххуӕздӕр кодта, ӕндӕр уӕхӕн уагӕвӕрдтӕбӕл дӕр. Уой фӕрци ’й никки хуӕздӕр уиндзӕнӕ, не Сфӕлдесӕг нӕ куд уарзуй, уой ӕма ибӕл дӕ зӕрдӕ дардзӕнӕ (Иак. 1:5). Ӕ унаффитӕ зӕронд нӕ кӕнунцӕ, ӕма си ку пайда кӕнӕн, уӕд амондгундӕр уодзиан (Ис. 48:17, 18).

14. Библи ӕртасгӕй Йегови туххӕй ци базондзиан?

¹⁴ Йегови хуӕздӕр базонунбӕл архайӕ (Иоан. 17:3). Библи ӕртасгӕй Йегови менеугутӕ хуӕздӕр базондзӕнӕ, удта ’й фӕууиндзӕнӕ, еци менеугутӕ е сфӕлдистади дӕр ке зиннунцӕ. Йеговӕ цӕхуӕн Хуцау ӕй, уой Библи уотӕ дзӕбӕх лӕдӕрун кӕнуй, ӕма адӕймагӕй байрагӕс уй, Хуцау ӕцӕгӕйдӕр ке ес (Рац. 34:6, 7; Пс. 145:8, 9). Йегови куд хуӕздӕр зонгӕ цӕуӕн, уотӕ не ’ууӕндундзийнадӕ федардӕр кӕндзӕй, хъӕбӕрдӕр ӕй бауарздзиан, удта имӕ никки хӕстӕгдӕр исуодзиан.

15. Хуцауи туххӕй иннетӕн ке дзорӕн, е нӕхецӕн ци пайда хӕссуй?

¹⁵ Хуцауи туххӕй иннетӕн дзорӕ. Уой фӕрци дӕхе ӕууӕндундзийнадӕ дӕр бафедар уодзӕй. Зӕгъӕн, кӕмӕн игъосун кӕнис, еци адӕймаг Сфӕлдесӕг ке ес, уобӕл ку не ’ууӕнда, ду ба ин ци зӕгъай, уо ку нӕ зонай, уӕд дӕ бон ци ӕй бакӕнун? Ӕркӕсӕ, нӕ литератури уой туххӕй ци финст ес ӕма си цӕхуӕн стихтӕ ес, уомӕ. Ӕма иннӕ хатт адӕймаги хӕццӕ ку фембӕлай, уӕд ин еци гъудитӕ радзорӕ (1 Пет. 3:15). Дӕ бон ма ӕй, фулдӕр ка зонуй, уӕхӕн хуӕртӕ ӕма ӕнсувӕртӕй дӕр ӕнхус ракорун. Адӕймаг ку нӕ арази кӕна, Сфӕлдесӕг ке ес, уобӕл, уӕддӕр дӕхе ӕууӕндундзийнадӕ ба бафедар уодзӕй, ци бӕлвурдгӕнӕнтӕ ин агурдтай, уони фӕрци. Ӕма уӕд Сфӕлдесӕгбӕл ка не ’ууӕндуй, етӕ цийфӕнди зундгин дзубандитӕ ма кӕнонцӕ, уӕддӕр дӕ нӕ бакъулумпи кӕндзӕнцӕ.

16. Не ’ууӕндундзийнадӕ ку нӕ федар кӕнӕн, уӕд нӕ е цӕмӕ ӕркӕндзӕй?

¹⁶ Йеговӕн цӕйбӕрцӕфӕнди ма лӕггадӕ кӕнӕн, уӕддӕр гъӕуама не ’ууӕндундзийнадӕ федар кӕнӕн. Цӕмӕн? Уомӕн ӕма уотӕ ку нӕ кӕнӕн, уӕд нин ӕрлӕмӕгъ уодзӕй. Куд загътан, уотемӕй адӕймаг бӕлвурдгӕнӕнти фӕрци феууӕндуй, «цӕстӕй ци нӕ уинуй, етӕ ӕцӕгӕйдӕр ке ’нцӕ». Фал адӕн ба, цӕстӕй ци нӕ уинонцӕ, уой иронх фӕккӕнунцӕ. Мадта Павел лӕмӕгъ ӕууӕндундзийнадӕ дзӕгъӕли не ’схудта, «ӕнцонтӕй ка ӕрахӕссуй, еци тӕрегъӕд» (Дзиуит. 12:1). Нӕ бон куд ӕй еци тӕрегъӕдӕй нӕхе багъӕуай кӕнун? (2 Фес. 1:3).

17. Не ’ууӕндундзийнадӕ федар кӕнунмӕ нӕ ӕнӕмӕнгӕй ци гъӕуй?

¹⁷ Фиццаг: Йеговӕй сугъдӕг хъаурӕ корӕ, ӕма куд арӕхдӕр, уотӕ хуӕздӕр. Е ӕхсидзгӕ цӕмӕн ӕй? Уомӕн ӕма ӕууӕндундзийнадӕ ӕй, сугъдӕг хъаурӕй ка цӕуй еци менеуӕг (Гал. 5:22, 23). Ӕма ӕнӕ сугъдӕг хъаурӕй нӕ бон не ’суодзӕй не ’ууӕндундзийнадӕ федар кӕнун. Йеговӕй сугъдӕг хъаурӕ ку корӕн, уӕд нин ӕй ӕнӕмӕнгӕй ратдзӕй (Лук. 11:13). Нӕ бон ма ин ӕй ӕргом дзорун: «Раттӕ нин фулдӕр ӕууӕндундзийнадӕ» (Лук. 17:5).

18. Псаломи 1:2, 3 цӕхуӕн лӕвари кой цӕуй?

 ¹⁸ Дуккаг: Библи ӕртасунмӕ дӕхецӕн график искӕнӕ. (Бакӕсӕ Псалом 1:2, 3.) Фиццаг Псалом финст ку ’рцудӕй, уӕд Хуцауи Закъони тухтӕнттӕ ӕрмӕстдӕр цалдӕр адӕймагемӕ адтӕнцӕ – паддзах ӕма саугинтӕмӕ. Иннетӕн ба авд анземӕ еунӕг хатт фӕууидӕ фадуат Закъони ци финст ес, уомӕ байгъосун (Дук. з. 31:10–12). Киристей рӕстӕги дӕр Закъони тухтӕнттӕ ефстаг адӕнмӕ адтӕнцӕ, удта сӕ даргӕ дӕр ӕмбурдгӕнӕнти кодтонцӕ. Абони ба уавӕр бустӕги ӕндӕрхузи ӕй. Библи кенӕ ӕ кӕцидӕр хӕйттӕ хъӕбӕр берӕ адӕнмӕ ес. Мингай ӕнзти дӕргъи адӕнӕн уӕхӕн фадуат н’ адтӕй, махӕн ба ес. Нӕ бон куд ӕй Йеговӕн бавдесун, еци лӕвари туххӕй си боз ке ан, уой?

19. Цӕмӕй не ’ууӕндундзийнадӕ ма ’рлӕмӕгъ уа, уой туххӕй нӕ ци кӕнун гъӕуй?

¹⁹ Библи нин ке ес, уой туххӕй Йеговӕй боз ке ан, уой бавдесдзиан, алли бон дӕр ӕй ку кӕсӕн, уӕд. Уомӕн ба рӕстӕг хецӕн кӕнун гъӕуй. Еци рӕстӕг ӕхегъӕди нӕ фӕззиндзӕй. Библи кӕсунмӕ ӕма ӕртасунмӕ нин график ку уа, уӕд не ’ууӕндундзийнадӕ лӕмӕгъ кӕнун нӕ бауадздзиан.

20. Идарддӕр цӕбӕл гъӕуама архайӕн?

²⁰ Аци дуйней зундгинтӕбӕл нимад ка ӕй, етӕ цийфӕнди ма дзоронцӕ, уӕддӕр махӕн не ’ууӕндундзийнадӕн ес федар бӕлвурдгӕнӕнтӕ Хуцауи Дзурди (Матф. 11:25, 26). Хуцауи Дзурд ке ’ртасӕн, уой фӕрци ӕй зонӕн, дуйней уавӕртӕ фуддӕрӕй-фуддӕр цӕмӕн кӕнунцӕ ӕма Йеговӕмӕ цӕхуӕн фӕндӕ ес, уой. Гъӕйдӕ мадта не ’ууӕндундзийнадӕ федар кӕнӕн ӕма фулдӕр адӕнӕн ӕнхус кӕнӕн, Сфӕлдесӕг ке ес, уобӕл баууӕндун (1 Тим. 2:3, 4). Гъе уӕд ӕй нӕхе цӕститӕй фӕууиндзиан, ӕгас адӕн дӕр Йегови куд кадгин кӕндзӕнцӕ: «О Йеговӕ, нӕ Хуцау, ду дӕ кадӕ ӕма намуси аккаг, уомӕн ӕма... алцидӕр ду сфӕлдистай» (Рарг. 4:11).