АЛКЕДӔР ни фӕндуй, цӕмӕй нӕ иннетӕ хуарз адӕймагбӕл нимайонцӕ. Фал аци дуйней цӕргӕй хуарздзийнадӕ кӕнун ӕнцон нӕй. Удта адӕнӕй дӕр беретӕ «хуарздзийнадӕ нӕ уарзунцӕ» (2 Тим. 3:3). Уонӕн сӕхе цӕстингас ес, раст ци ӕй ӕма ци нӕй, уомӕ. Етӕ «хуарз лӕгъуз... хонунцӕ, лӕгъуз ба – хуарз» (Ис. 5:20). Уомӕй уӕлдай ма нӕбӕл нӕ раздӕри цард ӕма не ’нӕнхӕстдзийнадӕ дӕр ӕнӕфӕззингӕ нӕ фӕуунцӕ. Йеговӕн дӕсгай ӕнзти дӕргъи ка лӕггадӕ кӕнуй, еу уӕхӕн хуӕрӕ Энн * зӕгъуй: «Уотӕ мӕмӕ кӕсуй, ӕма ӕз хуарз адӕймаг некӕд уодзӕн».

Фал ни уӕддӕр алке бон дӕр ӕй хуарздзийнадӕ ӕ уодигъӕди федар кӕнун. Хуарздзийнадӕ ӕй, Хуцауи сугъдӕг хъаурӕй ка цӕуй, еци менеуӕг. Ӕма нӕ цийфӕнди ма къулумпи кӕна,– фӕнди аци дуйней зундахаст, фӕнди не ’нӕнхӕстдзийнадӕ, фӕнди ӕндӕр ести,– уӕддӕр сугъдӕг хъаури фӕрци нӕ бон исуодзӕй еци менеуӕгбӕл архайун. Гъӕйдӕ мадта аци менеуӕгбӕл лӕмбунӕгдӕр радзорӕн ӕма базонӕн, никки хуӕздӕр ӕй нӕ бон куд ӕй ӕвдесун, уой.

Библийӕй куд зиннуй, уотемӕй хуарздзийнадӕ ӕй, хуӕрзӕгъдаудзийнадӕ, ӕнӕхӕран ӕма ӕнӕфаудзийнадӕ, удта хуарз цӕмӕй фӕззӕгъунцӕ, е. Уӕхӕн менеуӕг кӕмӕ ес, уомӕ лӕгъуздзийнадӕн ӕ кой дӕр нӕййес. Хуарз адӕймаг иннетӕн банхус кӕнунмӕ фадуӕттӕ фӕййагоруй ӕма син хуарздзийнадӕ фӕккӕнуй.

Ӕвӕдзи, фӕууинис, кадӕртӕ сӕ бийнонтӕн ӕма се ’мбӕлттӕн зӕрдиагӕй хуарздзийнадӕ куд фӕккӕнунцӕ, уой. Фал айдагъ е фагӕ нӕй, цӕмӕй Йегови цӕсти хуарз адӕймагбӕл нимад уӕн. Гъигагӕн, хуарздзийнадӕ кӕнун алли хатт ӕнцон нӕ фӕууй. Библий дӕр уотӕ финст ӕй: «Зӕнхӕбӕл нӕййес еу уӕхӕн раст адӕймаг дӕр, айдагъ хуарздзийнадӕ ка кӕнуй ӕма ка нӕ рӕдуйуй» (Еккл. 7:20). Апостол Павел дӕр ниффинста: «Ӕз ӕй зонун, мӕ медӕг, гъома мӕ бауӕри, хуарзӕй ке неци цӕруй» (Ром. 7:18). Мадта цӕмӕй аци менеуӕг нӕ уодигъӕди федар кӕнӕн, уой туххӕй нӕ гъӕуй, хуарздзийнадӕ кӕмӕй цӕуй, еци Хуцау Йегови ӕнхус.

Йеговӕ ӕрфедар кодта, хуарз ӕма лӕгъуз ци ӕй, уой фӕдбӕл уагӕвӕрдтӕ. Библий финст ӕй: «Йеговӕ ӕй хӕларзӕрдӕ [кенӕ «хуарз»] ӕма рӕстзӕрдӕ Хуцау» (Пс. 25:8, феп.). Ӕндӕр рауӕн ба финст ӕй: «Ду дӕ хӕларзӕрдӕ, ду кӕнис хуарздзийнадӕ. Амонӕ мин дӕ уагӕвӕрдтӕ» (Пс. 119:68). Аци стихти Йегови хуарздзийнади туххӕй ци дууӕ гъудий ес, уонӕмӕ лӕмбунӕгдӕр ӕркӕсӕн.

«Йеговӕ ӕй хуарз». Хуарздзийнадӕ ӕй Йегови менеугутӕй сӕ еу. Ӕркӕсӕн, Моисеййӕн уотӕ ку загъта, «ӕз дин мӕ хуарздзийнадӕ ӕгасӕйдӕр фӕууинун кӕндзӕн», зӕгъгӕ, уӕд ци ’рцудӕй, уомӕ. Йеговӕ Моисеййӕн ӕ кадӕ, удта ӕ хуарздзийнадӕ ку бавдиста, уӕд Моисей фегъуста уӕхӕн дзурдтӕ: «Йеговӕ, Йеговӕ ӕй фӕлмӕнзӕрдӕ ӕма тӕрегъӕдгӕнагӕ Хуцау, мӕстгун кӕнунмӕ тагъд ка нӕ кӕнуй, ӕнӕкӕрон ӕй е ’новуд уарзт ӕма алли гъуддаги дӕр ӕй раст. Е ’новуд уарзтӕй хай кӕнуй мингай фӕлтӕртӕн, хатир кӕнуй рӕдуд дӕр, фудракӕнд дӕр ӕма тӕрегъӕд дӕр, фал, фудгин ка ӕй, уой ӕнӕфхуӕрдӕй неци хузи ниууадздзӕй» (Рац. 33:19; 34:6, 7). Мадта Йегови хуарздзийнадӕ ӕнгом баст ӕй ӕ иннӕ менеугути хӕццӕ. Ӕма кӕд Киристе дӕр  алкӕддӕр, хуарз ци ӕй, уой кодта, уӕддӕр загъта: «Еунӕг Хуцауӕй уӕлдай хуарз неке ӕй» (Лук. 18:19).

Йеговӕ «кӕнуй хуарздзийнадӕ». Ӕма е бӕрӕг ӕй ӕ алли гъуддагӕй дӕр. Библий финст ӕй: «Йеговӕ хуарз ӕй алкӕмӕндӕр, е фӕлмӕнзӕрдӕдзийнадӕ ӕвдесуй, ке сфӕлдиста, уонӕмӕ се ’гасемӕдӕр» (Пс. 145:9). Йеговӕ неке хецӕн кӕнуй, е хуарздзийнадӕ кӕнуй ӕгас адӕнӕн дӕр – цард ӕма син цӕрунмӕ цидӕриддӕр гъӕуй, уой син дӕттуй (Гъуд. 14:17). Ӕ хуарздзийнадӕ ма бӕрӕг ӕй, нӕ рӕдудтитӕ нин ке хатир кӕнуй, уомӕй дӕр. Псаломзаргӕнӕг ниффинста: «О Йеговӕ, ду дӕ хӕларзӕрдӕ [кенӕ «хуарз»], ду дӕ цӕттӕ хатир кӕнунмӕ» (Пс. 86:5, феп.). Нӕ бон ӕй федарӕй ӕууӕндун, «ӕнаййепп ка ӕй, уонӕн Йеговӕ [ке] нӕ бавгъау кӕндзӕй хуарздзийнӕдтӕ» (Пс. 84:11).

Хуцау нӕ ӕхемӕ гӕсгӕ ке сфӕлдиста, уой фӕрци мах бон дӕр ӕй хуарздзийнадӕ кӕнун (Райд. 1:27). Фал Хуцауи Дзурди куд финст ӕй, уомӕ гӕсгӕ уобӕл ахур кӕнун гъӕуй (Ис. 1:17). Цума е нӕ къохи цӕй фӕрци бафтуйдзӕй? Ӕркӕсӕн ӕртӕ гъуддагемӕ.

Фиццаг: Хуцауӕй сугъдӕг хъаурӕ корӕ, цӕмӕй дин хуарздзийнадӕ дӕ уодигъӕди федар кӕнунмӕ ӕнхус кӕна (Гал. 5:22). Сугъдӕг хъаури фӕрци хуарздзийнадӕ уарздзӕнӕ, лӕгъуздзийнадӕй ба дӕхе еуварс дардзӕнӕ (Ром. 12:9). Библийӕй бӕрӕг ӕй, Йегови бон ке ӕй махӕн банхус кӕнун, цӕмӕй нӕ федар фӕндӕ уа, хуарз ци ӕй, уой дзорун ӕма хуарздзийнадӕ кӕнун (2 Фес. 2:16, 17).

Дуккаг: Хуцауи Дзурд кӕсӕ. Уотемӕй дин Йеговӕ амондзӕй, «хуарз ци ӕй, уомӕ цидӕриддӕр хауй, уой» ӕма «алли хуарз гъуддагмӕ дӕр алцӕмӕйдӕр цӕттӕ уодзӕнӕ» (Ӕмб. 2:9; 2 Тим. 3:17). Библи ку фӕккӕсӕн ӕма ибӕл ку фӕссагъӕс кӕнӕн, уӕд нӕ зонундзийнӕдти къӕбец идзаг кӕнӕн, Йегови ӕма ӕ фӕндони туххӕй ци базонӕн, уомӕй (Лук. 6:45; Еф. 5:9).

Ӕртиккаг: «хуарз адӕни фӕнзӕ» (3 Иоан. 11). Библий финст ес, фӕнзуйнаг нин ка ӕй, уони цӕветтонтӕ. Ке зӕгъун ӕй гъӕуй, Йеговӕ ӕма Киристейӕй хуӕздӕр цӕветтон нин нӕййес. Фал ма нӕ бон ӕй расагъӕс кӕнун, хуарздзийнадӕ ка кодта, уӕхӕн адӕни цӕветтонтӕбӕл дӕр. Зӕгъӕн, Тавифӕ ӕма Варнавӕ (Гъуд. 9:36; 11:22–24). Библий уони туххӕй ку кӕсай, уӕд дӕ гъос ӕрдарӕ, иннетӕн куд ӕнхус кодтонцӕ, уомӕ. Расагъӕс кӕнӕ, дӕ бийнонтӕн кенӕ ӕмбурди хуӕртӕ ӕма ӕнсувӕртӕн дӕ бон цӕмӕй ӕй банхус кӕнун. Уомӕй уӕлдай ма дӕ гъос ӕрдарӕ, Тавифӕ ӕма Варнавӕ иннетӕн хуарздзийнадӕ ке кодтонцӕ, е син цӕхуӕн пайда ӕрхаста, уомӕ. Ду дӕр уотӕ ку кӕнай, уӕд дин е устур пайда ӕрхӕсдзӕй.

Мах рӕстӕги дӕр хуарздзийнадӕ ка кӕнуй, уӕхӕн адӕн берӕ ес. Расагъӕс кӕнӕ хестӕр нӕлгоймӕгтӕбӕл. Етӕ ӕмбурди туххӕй берӕ хъиамӕт кӕнунцӕ, ӕма уотемӕй ӕвдесунцӕ, хуарздзийнадӕ  ке уарзунцӕ. Удта ма расагъӕс кӕнӕ нӕ еузӕрдон хуӕртӕбӕл дӕр. Етӕ дзурдӕй дӕр ӕма гъуддагӕй дӕр «иннети ахур кӕнунцӕ, хуарз ци ӕй, уобӕл» (Тит. 1:8; 2:3). Еу хуӕрӕ Розлин загъта: «Ме ’мбал алкӕддӕр ӕмбурди хуӕртӕ ӕма ӕнсувӕртӕн фенхус кӕнуй ӕма син сӕ нифс бафедар кӕнуй. Е син сӕ уавӕртӕбӕл фӕссагъӕс кӕнуй, удта син арӕх ести минкъий лӕвӕрттӕ искӕнуй ӕма сӕмӕ, ӕ бон цӕмӕй фӕууй, уомӕй фӕккӕсуй. Ӕцӕгӕйдӕр хъӕбӕр дзӕбӕх адӕймаг ӕй».

Йеговӕ ӕ адӕни разӕнгард кӕнуй, цӕмӕй «хуарздзийнадӕмӕ тундзонцӕ» (Амос 5:14). Уотӕ ку кӕнӕн, уӕд Йегови уагӕвӕрдтӕ уарздзиан ӕма хуарз ци ӕй, уой никки зӕрдиагдӕрӕй кӕндзиан.

Хуарздзийнадӕмӕ, ести хъазар кенӕ иннети деси ка бафтаудзӕй, уӕхӕн лӕвар искӕнун нӕ хауй. Зӕгъӕн, цӕмӕй дидинӕг исирӕза, уой туххӕй ибӕл дон еу хатт нӕ никкӕнӕн, фал берӕ хӕттити ӕма минкъийгай. Уотӕ нӕ хуарздзийнадӕ дӕр бӕрӕг уодзӕй берӕ минкъий гъуддӕгтӕй.

Библи нӕ разӕнгард кӕнуй, цӕмӕй «алли хуарз гъуддагмӕ дӕр» цӕттӕ уӕн (2 Тим. 2:21; Тит. 3:1). Иннетӕ цӕхуӕн уавӕрти ’нцӕ, уомӕ нӕ цӕстӕ ку дарӕн, уӕд ӕй лӕдӕрдзиан, уонӕн «хуӕздӕр ци уодзӕй... ӕма [сӕ] федардӕр ци фӕккӕндзӕй», уой, ӕма син уӕд нӕ бон уодзӕй банхус кӕнун (Ром. 15:2). Зӕгъӕн, ци нӕмӕ ес, уой син гъӕуама ма ’вгъау кӕнӕн (Ӕмб. 3:27). Нӕ бон сӕ ӕй рӕфтад искӕнунмӕ ӕрбахонун кенӕ ба, нифс кӕмӕй бафедар уа, уӕхӕн естӕбӕлти радзорун. Еске сӕйгӕ ку кӕна, уӕдта ’й нӕ бон ӕй бабӕрӕг кӕнун кенӕ ба имӕ телефонӕй бадзорун. Ӕцӕгӕйдӕр, «гъӕугӕ сахат адӕймаги ка бафедар кӕндзӕй... уӕхӕн хуарз дзурдтӕ» дзорунмӕ берӕ фадуӕттӕ ес (Еф. 4:29).

Мах дӕр фӕндуй Йегови хузӕн хуарздзийнадӕ алкӕмӕндӕр кӕнун, ӕма уомӕ гӕсгӕ неке хецӕн кӕнӕн. Ӕма е бӕрӕг фӕууй, Хуцауи Паддзахади туххӕй хуарз хабар алкӕмӕндӕр ке игъосун кӕнӕн, уомӕй. Киристе нин бафӕдзахста, цӕмӕй хуарздзийнадӕ кӕнӕн, е ’сӕфт ни ка уинуй, сауӕнгӕ ма уонӕн дӕр (Лук. 6:27). Хӕларзӕрдӕдзийнадӕ ӕвдесун ӕма хуарздзийнадӕ кӕнун кӕдфӕнди дӕр ӕнгъезуй, уомӕн ӕма «уӕхӕн менеугути нихмӕ закъон нӕййес» (Гал. 5:22, 23). Ӕфхуӕрд ку ӕййафӕн кенӕ зиндзийнӕдтӕбӕл ку исӕмбӕлӕн, уӕд дӕр ӕхсидзгӕ ’й иннетӕн хуарздзийнадӕ кӕнун. Цума цӕмӕн? Уомӕн ӕма махмӕ кӕсгӕй, ка ’й зонуй, уони дӕр бафӕндӕуа рӕстдзийнадӕ базонун, удта ма уотемӕй Хуцауӕн дӕр кадӕ хӕссӕн (1 Пет. 3:16, 17).

Ӕмбесӕндти 14:14 финст ӕй: «Хуарз адӕймаг... ӕ гъуддӕгтӕ ци тиллӕг хӕссунцӕ, уомӕй бафсӕддзӕй». Еци тиллӕг ци ӕй? Иннетӕн хуарздзийнадӕ ку кӕнӕн, уӕд нин етӕ дӕр хуарз уодзӕнцӕ (Ӕмб. 14:22). Уотӕ ку нӕ уа, уӕддӕр нӕ хуарз гъуддӕгти фӕрци, ка ’й зонуй, сӕ маст батайа, содзгӕ цӕхӕртӕй ӕфсӕйнаг куд батайуй, уотӕ (Ром. 12:20, феп.).

Хуӕртӕ ӕма ӕнсувӕртӕй беретӕ сӕхецӕй зонунцӕ, хуарздзийнадӕ ка фӕккӕнуй, лӕгъуздзийнадӕй ба ӕхе еуварс ка даруй, уонӕн е цӕхуӕн устур пайда ӕрхӕссуй, уой. Еу хуӕрӕ Ненси загъта: «Ӕригон ма ку адтӕн, уӕд мӕ ӕппундӕр нецӕй мӕтӕ адтӕй, ӕнӕгъдау миутӕ кодтон ӕма хъӕбӕр ӕнӕдӕнд адтӕн. Фал Хуцауи уагӕвӕрдтӕ ку базудтон ӕма мӕ цард уонӕмӕ гӕсгӕ аразун ку райдӕдтон, уӕд амондгундӕр исдӕн. Удта мӕхецӕн дӕр аргъ кӕнун райдӕдтон».

Сӕйрагидӕр ба хуарздзийнадӕ нӕ уодигъӕди уой туххӕй федар кӕнӕн, ӕма уотемӕй Йегови зӕрдӕ рохс кӕнӕн. Иннетӕ нин нӕ хуарз гъуддӕгтӕ ку нӕ уинонцӕ, уӕддӕр сӕ Йеговӕ ба ӕнӕ ’ргъудийӕй нӕ ниууадздзӕй. Хуарзӕй ести ку искӕнӕн кенӕ ба, хуарз ци ӕй, уобӕл ку фӕгъгъуди кӕнӕн, уӕд ӕй Йеговӕ алли хатт дӕр фӕууинуй (Еф. 6:7, 8). Цума нин уой туххӕй куд райарфӕ кӕнуй? Ӕмбесӕндти 12:2 финст ӕй: «Хуарз адӕймаг иссеруй Йегови хуарзӕнхӕ». Гъӕйдӕ мадта аци менеуӕг идарддӕр дӕр нӕ уодигъӕди федар кӕнӕн. Йеговӕ зӕрдӕ ӕвӕруй: «Хуарз гъуддӕгтӕ ка кӕнуй, уонӕй ба алкӕмӕдӕр ӕнгъӕлмӕ кӕсуй кадӕ, намус ӕма фарнӕ» (Ром. 2:10).