Diandamuna dia mu Bible

 Mulambu wa Yezu ke mushindu udi Nzambi upandisha, anyi usungila bantu ku mpekatu ne ku lufu. Bible udi wakula bua mashi a Yezu avua medibue panshi ne: mmushinga wa tshia kupikulangana natshi. (Efeso 1:7; 1 Petelo 1:18, 19) Nunku Yezu wakamba ne: uvua mulue bua “kufila muoyo wende bua kupikula bantu ba bungi.”​​—Matayi 20:28, Mukanda wa Mvidi Mukulu wa bena Katolike.

Bua tshinyi ‘tshia kupikula natshi bantu ba bungi’ tshivua ne mushinga?

 Bavua bafuke Adama muntu wa kumpala mupuangane, anyi kayi ne mpekatu to. Uvua ne diakalenga dia kuikala ne muoyo wa kashidi, kadi wakadipangila pavuaye musungule bua kubenga kutumikila Nzambi. (Genese 3:17-19) Pakalelaye bana, wakabasambulujila mpekatu. (Lomo 5:12) Kebualu kayi Bible udi uleja ne: Adama ‘wakadisumbisha’ yeye ne bana bende mu bupika bua mpekatu ne lufu. (Lomo 7:14) Bua dipanga bupuangane, kakuena muanende nansha umue uvua mua kukuula tshivua Adama mujimije atshi to.​​—Misambu 49:7, 8.

 Nzambi wakumvuila ndelanganyi ya Adama luse mu nsombelu uvuabu nende wa kabayi ne ditekemena. (Yone 3:16) Kadi mikenji miakane ya Nzambi idi ileja ne: kavua mua kubuikila mêsu pa mpekatu yabu anyi kubafuila luse kakuyi tshintu tshiakanangane to. (Misambu 89:14; Lomo 3:23-26) Bu mudi Nzambi munange bantu ba bungi, wakenza tshintu tshia mushinga bua bafuidibue luse bua mpekatu yabu ne bua ijike. (Lomo 5:6-8) Tshia kupikulangana natshi ke tshintu tshia mushinga mukole atshi.

Mmushindu kayi udi tshia kupikulangana natshi tshiambuluisha?

 Mu Bible, tshiambilu tshia ne: “tshia kupikulangana natshi” tshidi tshikongoloja malu manene asatu aa:

1.   Tshidi tshileja difutu.​​—Nomba 3:46, 47.

2.   Tshidi tshifila dipikudibua, anyi dikuula.​​—Ekesode 21:30.

3.   Tshidi tshipetangana ne mushinga wa tshintu tshidibu buula, anyi tshia kubuikila natshi. a

 Tumonayi mudi malu manene aa akumbena mulambu wa Yezu Kristo wa tshia kupikulangana natshi.

1.   Difutu. Bible udi wamba bua bena Kristo ne: bavua “banusumbe ku mushinga kampanda.” (1 Kolinto 6:20; 7:23) Mushinga au mmashi a Yezu adiye ‘musumbile Nzambi bantu ba mu tshisa tshionso ne mu muakulu wonso ne mu tshisamba tshionso ne mu ditunga dionso.’​​—Buakabuluibua 5:8, 9.

2.   Dipikudibua. Mulambu wa Yezu udi ufila “dipikudibua ku tshia kupikulangana natshi” ku mpekatu.​​—1 Kolinto 1:30; Kolosayi 1:14; Ebelu 9:15.

3.   Dipetangana. Mulambu wa Yezu udi upetangana menemene ne muoyo mupuangane uvua Adama mujimije. (1 Kolinto 15:21, 22, 45, 46) Bible udi wamba ne: “Bualu anu bu muvua ba bungi bavuijibue bena mpekatu ku dibenga kutumikila dia muntu umue au [Adama], bia muomumue kabidi, ba bungi nebavuijibue bakane ku ditumikila dia muntu umue eu [Yezu Kristo].” (Lomo 5:19) Mvese eu udi umvuija mushindu udi lufu lua muntu umue mua kufuta tshia kupikulangana natshi bua benji ba mpekatu ba bungi. Bushuwa, mulambu wa Yezu udi “tshia kupikulangana natshi tshidi tshikumbanangane” bua bantu bonso badi benza tshionso tshidibu mua kuenza bua tshibambuluishe.​​—1 Timote 2:5, 6.