Diandamuna dia mu Bible

 Mpekatu ntshienzedi tshionso, mmushindu wa kudiumvua, anyi mmeji adi kaayi apetangana ne mikenji ya Nzambi. Nkudiatakaja mikenji ya Nzambi mu dienza malu mabi, anyi malu adi kaayi makane ku mêsu kua kuende. (1 Yone 3:4; 5:17) Bible udi wamba kabidi ne: kubenga kuenza tshidi tshimpe mmpekatu.​—Yakobo 4:17.

 Mu miakulu ya ntuadijilu ivuabu bafunde Bible, muaku mpekatu udi umvuija “kupanga kukumbaja bualu kampanda” anyi tshipatshila. Tshilejilu, basalayi ba mu Isalele wa kale bavua bapiluke mu dikupa dia mabue ne ndundu wa dikupa nende mabue, ne kabavua ‘bapangila to.’ Bobu bakudimune tshiambilu atshi muaku ku muaku tshidi tshiumvuija ‘kakuenza mpekatu to.’ (Balumbuluishi 20:16) Nunku, kuenza mpekatu nkupangila bua kutumikila mikenji mipuangane ya Nzambi.

 Bu mudi Nzambi Mufuki, udi ne bukenji bua kuelela bantu mikenji. (Buakabuluibua 4:11) Netumubadile malu bua bienzedi bietu.​—Lomo 14:12.

Muntu udi mua kupanga kuenza mpekatu nansha mukese anyi?

 Tòo. Bible udi wamba ne: “bantu bonso mbenze mpekatu ne kabena bafika ku butumbi bua Nzambi.” (Lomo 3:23; 1 Bakalenge 8:46; Muambi 7:20; 1 Yone 1:8) Bua tshinyi bidi nanku?

 Ku tshibangidilu, Adama ne Eva bantu ba kumpala kabavua ne mpekatu to. Bivua nanku bualu bavua bafukibue bapuangane, mu tshimfuanyi tshia Nzambi. (Genese 1:27) Kadi bakajimija bupuangane buabu pakabengabu kutumikila Nzambi. (Genese 3:5, 6, 17-19) Pakalelabu bana, bakabasambulujila mpekatu, kupianabu dipanga bupuangane. (Lomo 5:12) Ke bualu kayi mukalenge Davidi wa Isalele wakamba ne: “Mvua muledibue ne tshibawu tshia tshilema.”​—Misambu 51:5.

Kudi mpekatu minene kupita mikuabu anyi?

 Eyowa. Tshilejilu, Bible udi wamba ne: bantu ba mu Sodoma bavua “bantu babi, benji ba mpekatu banene” mpekatu wabu uvua ‘mupite bunene.’ (Genese 13:13; 18:20) Mona malu asatu adi aleja bunene anyi bujitu bua mpekatu.

1.   Bunene bua bualu. Bible udi utudimuija bua kuepuka mpekatu minene bu mudi tshiendenda tshia masandi, ditendelela dia mpingu, buivi, dikuatshika dia maluvu, dinyengangana dia bintu, dishipangana, ne dienza malu a mîdima. (1 Kolinto 6:9-11; Buakabuluibua 21:8) Bible udi uleja mudi mpekatu eyi mishilange ne mpekatu ya dipanga kuela meji anyi mpekatu mienza kabiyi ku bukole to. Tshilejilu, mêyi anyi bienzedi bidi bitapa bakuabu ku muoyo. (Nsumuinu 12:18; Efeso 4:31, 32) Nansha nanku, Bible udi utukankamija bua kubenga kupepeja mpekatu kayi yonso, bualu idi mua kufikisha ku dishipa mikenji ya Nzambi bibi menemene.​—Matayi 5:27, 28.

2.   Tshidi tshisaka ku mpekatu. Bantu bakuabu batu benza mpekatu mu dipanga tshidi disua dia Nzambi. (Bienzedi 17:30; 1 Timote 1:13) Nansha mudi Bible ubenga mpekatu ya mushindu au, udi uyitapulula ne mpekatu wa muntu udi mushipe mikenji ya Nzambi ku bukole. (Nomba 15:30, 31) Mpekatu muenza ku bukole udi ufumina mu ‘muoyo mubi.’​—Yelemiya 16:12.

3.   Bungi bua misangu. Bible udi kabidi uleja dishilangana didi pankatshi pa mpekatu umue ne tshibidilu tshia kuenza mpekatu. (1 Yone 3:4-8) Bantu badi ‘benza mpekatu ku bukole’ nansha panyima pa bobu bamane kulonga mua kuenza malu makane, Nzambi neabalumbuluishe.​—Ebelu 10:26, 27.

 Bantu badi badipisha bua mpekatu minene badi mua kudiumvua batekesha mu mikolo kudi bujitu bua bilema bidibu benze. Tshilejilu, mukalenge Davidi wakafunda ne: “Bilema bianyi mbindiundile pa mutu wanyi; bu bujitu bunene, bidi bipite bungi bundi mua kuambula.” (Misambu 38:4) Kadi Bible udi ufila ditekemena edi: “Muntu mubi alekele njila wende ne muena malu mabi alekele meji ende; apingane kudi Yehowa wikala mua kumufuila luse, kudi Nzambi wetu, bualu yeye neamubuikidile mu mushindu mualabale.”​—Yeshaya 55:7.