JIIHÓVAH éí biYeʼ tsʼídá aláahdi ayóóʼáyóʼnínígíí bichʼįʼ nahodiyooʼnaał, áádóó dazhdootsaałgo hoł bééhózin. Genesis 3:15gi baa haʼoodzííʼ yę́ę díí tʼáá aaníí ákótʼéego bohodoolníiłgo yee nítʼı̨́. God biyeʼ daaztsą́ągo éí ayóó átʼéego yínííł áhodoolííł. Díísh éí haitʼéego bílaʼashdlaʼii bichʼįʼ ííshjání ázhdoolííł? Diyin Bizaad biiʼ łaʼ tʼáá aaníí ákóhóótʼįįdgo yaa halneʼ. God éí Éíbraham niyeʼ ayóóʼííníʼnínígíí Áízak náádiyííłnih yidííniid.

Éíbraham éí hweʼoodląʼ ayóó átʼéego bidziil ńtʼééʼ. Shą́ą́ʼ, God éí Éíbraham yichʼįʼ ádee haadzííʼ, éí Yisdáʼiiníiłii bóhóoneʼ yę́ę Áízak bitsʼą́ą́dę́ę́ʼ bidiʼdoochííł. Éíbraham hayeʼ Áízak náájiisniiʼ ládą́ą́ʼ, éí God nínéidiyoosáałgo joodlą́. Áko hayeʼ náázhdiyoołnihgo baa nízhdiidzá, ńtʼééʼ God bitsʼą́ą́dę́ę́ʼ diyingo naalʼaʼí léiʼ niʼ kóhoolaa. Éíbraham éí God bikʼeh hojííłʼįįdígíí biniinaa haa haznih. Áko God yee ádee haadzííʼ yę́ę yee hachʼįʼ hanáánáádzííʼ.

Áízak éí naaki hayeʼ hazlı̨́ı̨́ʼ, éí Íísa dóó Jéíkab. Jéíkab éí dadólzinii yaa ahééh nízin ńtʼééʼ, áko éí bąą hó hakʼi hojisdliʼ. God éí Jéíkab, Ízrel yee yiyíízhiʼ. Áko Ízrel dabiyeʼígíí 12go, Ízrel dineʼé bá álą́ąjįʼ nidajizı̨́įgo ádahoʼdilyaa. Ákosh éí díí haitʼéego ayóó átʼéii dineʼé dajizlı̨́ı̨́ʼ?

Tʼáá ałkééʼ kóhóótʼįįd, éí Ízrel dabiyeʼ łaʼ hatsilí Jóseph dajoołchʼı̨́įdgo baa nízhdiikai. Éí Jóseph naalteʼ jílı̨́ dahałníigo baa ndahaazniiʼ, áádóó Ííjipgóó hoł íldeeʼ. Ákondi God éí Jóseph bibee oodląʼ bidziilgo doo náhinilyées daígíí biniinaa yikʼi hoosdliʼ. Azhą́ shı̨́ı̨́ yéigo hachʼįʼ nahwiisʼnááʼ ndi Ííjip binanitʼaʼí Féro haa ákoniizı̨́įʼgo, Jóseph ayóó átʼéego óhólnííh yaah niinílá. Díí éí tsʼídá ákódígi yéigo dahodííchįįd, áko Jéíkab biyeʼ łáʼ Ííjipgóó chʼiyáán ndahidoołnih yił níigo ayiisʼaʼ. Ńtʼééʼ Jóseph tʼáá ałtso chʼiyáán nahaniihgi bee bóhólnííh lá! Ákweʼé ahéénídahojoosįįdgo ayóó átʼéego ałhaa dajííchago, Jóseph éí hánaaí bił kʼé nídahizhdooʼniid. Áádóó tʼáá ájíłtso Ííjipjįʼ dazhdoonééł biniyé yá hashtʼediidzaa. Kéyah tsʼídá yáʼátʼééhígíí baa dadeetʼą́, éí ákweʼé kéyah bikáaʼgi yáʼátʼéehgo kʼeeʼąą jinootʼı̨́įł doo. Jóseph éí God yee ádee haadzííʼ yę́ę bikʼeh áhoodzaago yaa ákoniizı̨́ı̨́ʼ.

Jéíkab éí haʼáłchíní hanaagóó kʼeeʼąą nootʼı̨́įłgo Ííjipdi kééhojitʼı̨́įgo hajistih. Jéíkab dadootsaałjįʼ yoołkáałgo biyeʼ Júdahjígo oochíłígíí Yisdáʼiiníiłii ayóó átʼéego hooʼáał dooígíí bitsʼą́ą́dóó doochííł níigo yaa chʼíhoníʼą́. Ląʼí nínáánááhaidóó bikʼijįʼ Jóseph tʼah doo dajitsaahgo, éí níléí náasdi Jéíkab baʼáłchíní Ííjipdę́ę́ʼ God chʼéébidooʼish níigo yaa chʼíhoníʼą́.

​—Genesis wóltaʼii 20dóó 50jįʼ dóó Hebrews wóltaʼii 11:17dóó 22jį biiʼ baa haneʼ.