Psalm 68:1-35
Diyin God éí Dził Sáínai áádóó diyingo hazʼą́ągi hólóonii
68 Hániʼdii Diyin God dildzííł! Hániʼdii biʼanaʼí danilíinii tabidiʼnooskaad! Hániʼdii bikʼee dadiniihii bitsʼą́ąjįʼ yóóʼiijeeh!
2 Łid bił yóóʼiiyołígi átʼéego yóóʼabíʼdísooł! Akʼah konibąąhgóó diłhįhígi átʼéego Diyin God binááł hániʼdii diné doo yáʼádaashóonii ádabiʼdildįįh!
3 Nidi bíniʼdii tʼáá ákogi ádaatʼéii bił dahózhǫ́! Bíniʼdii Diyin God binááł bił nidahoozhǫǫh! Tʼáá aaníí, tʼáá íiyisí bił nidahoozhǫǫh leʼ!
4 Diyin God bichʼįʼ dahohtaał; bízhiʼ baa dahohniihgo dahohtaał! Éí yótʼááh hiníláii yikááʼ náhodididleehii yéego bichʼįʼ dahohtaał! Bízhiʼ éí Jiihóvah* wolyé, éí bidááhdóó nihił nidahoozhǫǫh leʼ!
5 Diyin God éí áłchíní bizhéʼé ádaadinii yiTaaʼ nilı̨́ áádóó hodiyingo kééhatʼı̨́įgi asdzání bąąh ádahasdįįdii yá ánihwiiʼaahii nilı̨́.
6 Tʼáá bitaʼígóó naagháii bighan hólǫ́ǫ doogo Diyin God baidiyiiʼaah. Awáalyaa naazhjéʼígíí chʼíyiiʼéésh. Nidi nidaalteehii tʼéiyá kéyah dahóółtseiigi kéédahatʼı̨́.
7 Diyin God nílíinii, nidineʼé bilą́ąjįʼ dah diniyáago honoojíí góneʼ bá chʼíhwííníleʼ. Síilah.
8 Áko niʼ nahaasʼnááʼ, Diyin God hólóonii binááł, wótʼááhdę́ę́ʼ tʼáá íiyisí nahóółtą́, Ízrel biDiyin God nilíinii binááł Dził Sáínai nahaasʼnááʼ.
9 Diyin God nílíinii, nikʼehgo tʼóó ahayóí nahóółtą́. Nidineʼé kéyah bííʼ dooleełígíí nídínéesdzáago hashtʼéinidlaa.
10 Ákwii nidineʼé kéédahatʼı̨́ı̨́ nítʼééʼ. Diyin God nílíinii, baa dahojoobáʼíii nidi jiiníbaʼígíí binahjįʼ baa áhosínílyąąd.
11 Bóhólníihii haadzííʼ. Sáanii tʼóó ahayóí dahalneʼgo kódaaní,
12 Anaʼí dah deínéehii éí aláahgo bindanitʼaʼí tʼáá bił yóóʼadahinichééh! Hooghandi asdzání nidaazdáhígíí éí anaʼí binaalyeʼé daasnáanii nideiniih.
13 Dibé naazhjééʼ bitahgóó danohjahgo hasbídí bitʼaʼ béésh łigaii bikʼéstiʼ nahalinígíí, áádóó bitsʼos nineezígíí éí óola łitsoii bikʼéstiʼ nahalinígíí nidahonohłin.
14 Aláahgo Ayóóʼábóodziilii éí aláahgo naatʼáanii danilíinii yikʼeh deesdlı̨́ı̨́ʼdóó tainooskaadgo yas nahalingo Dził Zálman bąąh yígai.
15 Diyin God bidził łaʼ Béíshan wolyé; Béíshan éí dził deelzhaaígi átʼé.
16 Dził dah dahatsʼosii nohłíinii, haʼátʼíísh biniyé dziłghą́ąʼgi Bóhólníihii kééhashtʼı̨́į doo nízingi deinołchʼı̨́ı̨́d? Tʼáá aaníí, ákweʼé Bóhólníihii hoolʼáágóó kééhatʼı̨́į dooleeł!
17 Tsindaabąąs bijáád naakiígíí yee dah deínéehii éí diyingo naalʼaʼí naadiindi mííl, áádóó míildi ałkʼi náámíilgo ánéelą́ą́ʼ. Dził Sáínaigi Bóhólníihii diyingo hólónígi átʼéego éí bitahgi hólǫ́.
18 Aghánáhóóʼáajįʼ hahosíníleʼ. Yisnááh tʼáadoo bee néelą́ʼígóó hashíníʼeezh. Áádóó ákwii Bóhólníihii kééhatʼı̨́į doo biniyé diné bitahgi aa deetʼáanii naa dayiiznil; nidaalteehii nidi bitahgi ałdóʼ naa daʼiiznil.
19 Bóhólníihii éí tʼáá ákwíí jı̨́ nihiyéél nihá yooyéełii, tʼáá éí Diyin God yisdánihiiníiłii baa haʼniih. Síilah.
20 NihiDiyin God éí bee yisdáʼiildéehii nilı̨́. Áádóó Bóhólníihii Diyin God éí anoonééł bikʼeeʼąą hodeeztʼiʼii nilı̨́.
21 Nidi Diyin God éí biʼanaʼí danilíinii dabitsiitsʼiin yidoołjish. Bitsiiʼ tʼóó ahayóii ádaa haʼniihii ádihodiiltʼiʼgo naagháii bitsiitsʼiin yidoołjish.
22 Bóhólníihii ání, Éí Béíshandę́ę́ʼ nídeeshʼish; tónteel táłtłʼááhdę́ę́ʼ hahideeshnił.
23 Áko niʼanaʼí bidił biiʼgóó chʼídíínááł, áádóó nilééchąąʼí éí daʼdoołchʼał.
24 Diyin God nílíinii, hodílzingo ná daʼínéehii dayooʼı̨́. ShiDiyin God aláahgo shinanitʼaʼí, hodiyingo hazʼání biiʼjįʼ bá daʼínéehii dayooʼı̨́.
25 Dahataałígíí alą́ąjįʼ yikah. Akéédę́ę́ʼ bibee naʼaʼnéhí sin yee nidaanéhígíí yikah. Bitaʼ góneʼ éí chʼikéí ásaaʼ daagádígíí yee nidaanéego yikah.
26 Diné tʼóó ahayóí áłah danilı̨́įgi Diyin God baa dahohniih. Nihí Ízrel bitsʼą́ą́dóó dahosoolı̨́įʼii, Bóhólníihii baa dahohniih.
27 Bénjamin lą́ą, akéédę́ę́ʼ naagháhígíí éí alą́ąjįʼ ooʼish; Júdah dineʼé yá aląąjįʼ naazíinii yił yinéełii bił, áádóó Zébyulan dineʼé yá aląąjįʼ naazíinii, Náftalai dineʼé yá aląąjįʼ naazíinii ałdóʼ akééʼ yinééł.
28 Ayóó ánóodziil doogo niDiyin God ná haadzííʼ. Diyin God nílíinii, nihá binishínílnishii niłdzilgo ánílééh.
29 Jerúsalem kin haalʼáagi nikin biiʼ sohodizin siʼánígíí hoł danilı̨́įgo aláahgo naatʼáanii dajílíinii aa yílyáii naa dajiiníił doo.
30 Lókʼaaʼtahgóó naaldlooshii ałchinii* áádóó dóola índa diné bibéégashii yáázh deílʼáhígíí nidahojílinii nidahodíteehgo béésh łigaii baa dajidleeʼgo naa dahizhdoojih. Anaaʼ baa bił nidahoozhǫǫhii tanoołkaad.
31 Ííjip kéyahdę́ę́ʼ naatʼáanii danilíinii chʼídookah; Iithiyópiya dineʼé tsxı̨́įłgo Diyin God yichʼįʼ kʼídidoolchiłgo náyookąąh doo.
32 Ałʼąą dineʼé nihił dah nahazʼą́ą́dę́ę́ʼ Diyin God bichʼįʼ dahohtaał; Bóhólníihii baa dahohniihgo dahohtaał. Síilah.
33 Tʼáá shiidą́ąʼdii yótʼáahdi hiníláii yikááʼ náhodididleehii bichʼįʼ dahohtaał. Jóʼakon, hahadziihgo biinééʼ ayóó íitsʼaʼ.
34 Diyin God bidziil dadohníigo baa dahohniih. Aláahgo yee ayóó átʼéii yee Ízrel yaa áhályą́ áádóó bidziilígíí éí wótʼáahdi hólǫ́.
35 Diyin God nílíinii, nikin biiʼ sohodizin góneʼ ayóó átʼéego nitsʼąą hastiʼgo niʼdólzin. Ízrel biDiyin God éí bidineʼé dziil áádóó bibee adziilii yeidiiʼaah. Diyin God baa dahohniih!
Footnotes
^ Jiihóvah éí Bóhólníihii jiníigo óolyé.
^ King James Bible biyiʼ bee akʼeʼashchínígíí ání, Tsiidétáán yee deíbáahii dah yinéłígíí, nidi Hííbrew bizaadjí éí doo áníi da.
