Psalm 46:1-11
Diyin God éí bineʼ ahiniichéehii áádóó bee danihidziilii nilı̨́
46 Diyin God éí bineʼ ahiniichéehii áádóó bee danihidziilii nilı̨́; nihide áhootʼįįhgo tʼáá áko nihíká iilwoʼii nilı̨́.
2 Éí bąą azhą́ nahasdzáán łahgo ádzaa nidi, azhą́ tónteel ałníiʼdi dził adahałtsǫ́ǫ́s nidi, doo nídeiildzid da doo.
3 Azhą́ tó ayóó ádeitsʼaʼgo ádá hálchįʼgo bíígháán náádadiidáah nidi, áádóó tó deílkʼoołígíí dził bínídazdiiłhałgo nidayiiłnáa nidi, doo nídeiildzid da doo. Síilah.
4 Tooh léiʼ nílı̨́, áádóó bitsʼádaazlínígíí Diyin God bikin haalʼáadi Aláahgo Ayóóʼátʼéii kééhatʼı̨́įgi bił hózhǫ́ǫgo áyósin.
5 Diyin God éí kin haalʼáii yił hólǫ́, áádóó doo nahjįʼ kóbidiʼdoolníił da. Abíínígo Diyin God bíká adoolwoł.
6 Ałʼąą dineʼé ádéédahooldzííd; ałʼąą dineʼé bee bóhólníihgo bił nahazʼą́ą́góó dah nidaasdááz. Haadzíiʼgo nahasdzáán dííłhı̨́ı̨́ʼ.
7 Tʼáá ałtsoní bee Bóhólníihii éí nihił hólǫ́. Jéíkab biDiyin God bineʼ adahiniichééh. Síilah.
8 Hágo, Bóhólníihii binaanish níníłʼı̨́; nihokááʼgóó hóółchxǫʼígíí níníłʼı̨́.
9 Nahasdzáán nidaneesʼą́ąjįʼ anaaʼ dahólóonii ánéísįįd. Ałtı̨́ı̨́ʼ yiyiitííh; tsiidétáán yiyiiłneʼ. Tsinaabąąs bijáád naakiígíí iidiyiiłkʼą́ą́h.
10 Hashtʼedíínítʼé; shí Diyin God nishłı̨́įgo nił bééhodoozįįł. Ałʼąą dineʼé bitahgóó ayóó áníshtʼéego áshidiʼdoolnííł; nahasdzáán bikáaʼgi ałdóʼ ayóó áníshtʼéego áshidiʼdoolnííł.
11 Tʼáá ałtsoní bee Bóhólníihii éí nihił hólǫ́. Jéíkab biDiyin God bineʼ adahiniichééh. Síilah.
