Zekaria 2:1-13
2 Kandi munasumba ameso, namalangira omundu inianawite oko kamba y’eripimamo omo byala biwe.
2 Neryo munamubulya niti: “Ukayahi?”
Mwanisubirya ati: “Ngayapima e Yerusalema, nitoke eriminya obughali n’obuli bwagho.”
3 Neryo omumalaika oyo wabya akakania naghe mwaghenda, n’oghundi mumalaika amasyahindana naye.
4 Neryo mwamubwira ati: “Tibita eyiri omulwana olya, uyamubwire uti, ‘“Abandu bakendisyikala e Yerusalema ngoko abandu bakikala omo mulongo owateko esyombimbo, kundi abandu abali mugho bakendisyabya banene, n’esyonyama esiri mugho sikendisyabya sinene.
5 Oko muyi oyo, ngendisyabya oluhimbo lw’omuliro olutimbire kugho, kandi ngendisyabya lukengerwa omo muyi oyo,” Yehova atya.’”
6 “Mwase! Mwase! Mutibite, mulue omo kiharo ky’oko luhande lw’endata,” Yehova atya.
“Kundi nabiribapanza-panzira oko mahunga ani w’elubula,” Yehova atya.
7 “Asa, Sioni! Uyibalaye, iwe wikere ewa mwali wa Babiloni.
8 Kundi bino byo Yehova w’emilondo akabugha, oyo wabya abihabwa olukengerwa,* mwanituma eyiri ebihanda ebyapura ebindu byenyu: ‘Oyukabatulako akabya iniamatula omo kalangira k’eriso ryaghe.
9 Kundi lino ngendisumba ebyala byaghe nitoke erihabo amalipizi, abakobe babo-babo bo bakendipura ebindu byabo.’ Neryo oko kwenene-kwenene, mukendiminya ngoko Yehova w’emilondo yulyanituma.
10 “Mwali we Sioni, uyitsangure busana n’obutseme, kundi ninemwasa, kandi ngendisyikala omo kati-kati kaghu,” Yehova atya.
11 “Ekiro ekyo, ebihanda bingyi bikendisyayighunga oko Yehova, kandi ebihanda ebyo bikendisyabya bandu baghe; kandi ngendisyikala omo kati-kati kaghu.” Neryo oko kwenene-kwenene, mukendisyaminya ngoko Yehova w’emilondo yo wanituma okw’inywe.
12 Yehova akendisyimya Yuda atoke eribya kindu kiwe oko kitaka kibuyirire, kandi akendisyasyasombola Yerusalema.
13 Abandu bosi* babye bukutu embere sya Yehova, kundi akalua omo bwikalo bwiwe bubuyirire n’erikola.
