Hosea 2:1-23
2 “Mubwire abaghala benyu muti, ‘Bandu baghe!’*
Mubwire n’abali benyu muti, ‘Iwe mukali, iwe balyaghanyira!’*
2 Mushitake mama wenyu, mumushitake,Kundi si mukali waghe, naghe sindi mwira wiwe.
Atsire obumbalaka* bwiweKandi alusaye obusingiri bwiwe omo kati-kati k’amabere wiwe.
3 Amatendikola atya, ingendimulusya esyongyimba syosi, iniabya ngoko abutawa,Ngendisyamuyira ng’embwarara,Ngendisyamuyira ng’ekitaka ekyumire,Kandi ngendisyaleka iniahola omo nyota.
4 Kandi sinendisyaghanyira abana biweKundi ni bana b’obumbalaka.*
5 Kundi mama wabo abirikola obumbalaka.*
Oyo wabaheka omo nda abirikola emyatsi eyikit’isoni, kundi mwabugha ati,‘Ngendisyakwama abanianzire kutsibu,Abakamba omukati waghe n’amaghetse waghe,Obweya bwaghe bw’esyombuli, ekitani kyaghe, amaghuta waghe, n’obwabu bwaghe.’
6 Neryo ngendimukingira enzira omo luba lw’amahwa;Kandi ngendihimba oluhimbo lw’amabwe,Akasyasunga ah’erilaba.
7 Akendisyakwamirira abamwanzire kutsibu, aliwe syendisyabahikako;Akendisyabarondya, aliwe syendisyabasunga.
Neryo akendisyabugha ati, ‘Ngasubira omwira waghe w’erimbere,Kundi omo biro ebyo, nabya ndeke kulenga ngoko niri munabwire.’
8 Mwataminya ngoko n’ingye nabya ngamuha engano, edivai nyihya-nyihya, n’amaghuta,Kandi ngoko n’ingye nabya ngamuha efeza* nene eyo abya nayoN’ehoro eyo abya akakolesya akaramya Baali.
9 ‘Busana n’ekyo, ngendisyasa oko mughulu w’erighesa n’eriheka engano yagheNgendisyaheka n’edivai yaghe nyihya-nyihya yabikamwa,Kandi ngendisyapura n’obweya bwaghe bw’esyombuli n’ekitani kyaghe ebyangaswikire omubiri wiwe owali ndumbu.
10 Neryo lino, ngendisukula obusoni bwiwe bo ndeke-ndeke ababya bamwanzire kutsibu batoke erilangirabo,Sihendisyabya oyukamusabula omo byala byaghe.
11 Ngendisyabughaho obutseme bwiwe bosi,Ebiro biwe bikulu, ebiro biwe bikulu by’omughenda muhya-muhya, esyosabato siwe, n’ebindi biro biwe bikulu byosi.
12 Ngendisyatsandya emizabibu yiwe n’emiti yiwe y’esyotini, ebyo abughako ati:
“Oyo w’omusahara waghe, ogho ababya banianzire bamba”;Ngendisyayiragho mo musitu,Esyonyama sy’omoli sikendisyatomerabyo.
13 Ngendisyamuha amalipizi busana n’ebiro ebyo abya akahereramo esyosanamu sya Baali sy’amahere,Omughulu abya akayipamba omo syombuka n’amapambo, n’erikwamirira abamwanzire kutsibu,Aliwe ingye inianibirirwa,’ Yehova atya.
14 ‘Busana n’ekyo, ngendilengekania naye atoke erisuba omo nzira eyuwene,Ngendimutwala omo mbwarara,Kandi ngendikania naye omutima wiwe atoke erinibyako.
15 Eritsuka oko mughulu oyo, ngendisyamusubulirya amalima wiwe w’emizabibuN’Omusya* we Akori akendisyabya ng’omulango w’amaha;Iniane eyo, akendisyabya akanisubirya ngoko abya akanisubirya iniakine mumbesa,Ngoko abya akanisubirya omughulu alua e Misri.
16 Ekiro ekyo,’ Yehova atya‘Ukendisyaniahula mo mwira waghe, siwendisyasyaniahula mo mukama waghe.’*
17 Ngendisyalusya omo buno bwiwe mw’amena w’esyosanamu sya Baali,Sibendisyasyibuka amena wasyo.
18 Oko mughulu oyo, ngendisyakolerabo endaghane haghuma n’esyonyama sy’omoli,Haghuma n’esyonyunyu sy’omo kyanya, kandi haghuma n’esyonyama esikayikura oko kitaka;Ngendisyalusya omo kihugho m’obuta,* omuyali, n’amalwa.
Ngendisyikalyabo omo buholo.
19 Ngendisyakuyira mo mukali waghe kera na kera;Ngendisyakuyira mo mukali waghe omo ritunganene n’omo kwenene,Omo lwanzo oluteleghula n’omo bughanyiri.
20 Ngendisyakuyira mo mukali waghe omo butaleghula,Neryo oko kwenene, ukendisyaminya Yehova.’
21 ‘Ekiro ekyo, ngendisyakusubirya,’ Yehova atya,‘Ngendisyakusubirya inine e lubula,N’olubula lukendisyasubirya ekihugho;
22 Ekihugho kikendisyasubirya engano, edivai nyihya-nyihya, n’amaghuta.
Nabyo bikendisyasubirya Yezreeli.*
23 Ngendisyayiherera iye ng’embuto oko kihugho,Kandi ngendisyaghanyira oyo wataghanyirawa;*Ngendisyabwira abatabya bandu baghe* niti: “Muli bandu baghe,”Nabo bakendisyanibwira bati: “Uli Mungu wetu.”’”
