Ko e tala ia Teutaronome 22:25-27, kua nakai hagaao pauaki ke fakakite e agahala he tagata taane ha kua fitā a ia he agahala. Ko e fakatufono nei kua hagaaki ke he fakamooli he nakai agahala po ke nakai kelea he fifine. Mailoga e kakano.

Ko e tau kupu tohi fakamua ne tutala hagaao ke he tagata taane ne mahani feuaki mo e fifine kua fakatutane “he maga.” He taute pihia, kua agahala a ia he faivao ha ko e fifine kua fakatutane kua mau tuai a ia. Ka e kua e fifine? “Nakai fakatutu ai a ia ke he maga.” Ane hea fakatūtū a ia, to logona mooli he falu a ia ti lago a ia. Ka e nakai hea fakatūtū a ia. Kua mahani faivao a ia ti fakafili tokoua a laua kua agahala.​—Teu. 22:23, 24.

Matutaki foki e Fakatufono ke tohi e taha tuaga: “Kaeke ko e vao kua moua ai he tagata e tama fifine kua fakatutane, ti taofi ai he tane a ia mo e mohe mo ia; kia mate ai e tane ne mohe mo ia tokotaha ni; Ka e aua neke eke ai ha mena ke he tama fifine; nakai fai hala e tama fifine ke mate a ia; tuga ne tu atu he tagata ne katofia mo ia mo e kelipopo a ia kua pihia la e mena na; Nukua moua ai a ia ke he vao, ti fakatutu ai he tama fifine ne fakatutane, ka e nakai ha i ai taha ke laveaki a ia.”​—Teu. 22:25-27.

Kakano ia ati talitonu e tau ikifakafili ke he fifine. Puhala fe? Tuga kua “fakatutu ai [e] tama fifine ne fakatutane, ka e nakai ha i ai taha ke laveaki a ia.” Ti nakai taute e ia e mahani faivao. Ka ko e tagata taane ne agahala a ia he fakapilo pulenoa mo e mahani faivao ha kua “taofi ai he tane a ia mo e mohe mo ia,” ko e fifine kua fakatutane.

Ti pete ni kua hagaaki e fakatufono nei ke he nakai agahala he fifine, kua fakamaama fakahako he tala hagaao ke he tagata taane kua agahala he fakapilo pulenoa mo e mahani faivao. Mauokafua a tautolu to “kumi fakamitaki ai” he tau ikifakafili e mena ne tupu mo e taute e fifiliaga fakatatau ke he poakiaga ne lagaloga e fatiaki fakamaaliali he Atua.​—Teu. 13:14; 17:4; Esoto 20:14.