Ka gahua tokoua i loto he fakamauaga ko e taane mo e hoana kua tuga e tagata fakaholo vakalele mo e lagomatai fakaholo vakalele ne muitua tokoua ke he fakaholoaga. Pete ka tutupu e tau lekua, igatia e hoa mo e manamanatu he puhala ko “maua” ka e nakai ko “au.”

MATAPATU FAKAAKOAGA HE TOHI TAPU: “Kua nakai tuai tokoua, ka kua tino taha na laua.”​—Mataio 19:6.

“Nakai ko e gahua tokotaha e fakamauaga. Kua lata e taane mo e hoana ke gahua tokoua ke kautū ai.”​—Christopher.

Ka taufetoko, ko e taane mo e hoana ne nakai gahua tokoua ka hihiga ke latau ka e nakai onoono ke fakamafola e lekua. Ko e tau lekua ikiiki to tutupu mai e tau mena vihi lalahi.

“Kua uho lahi mahaki e gahua tokoua he fakamauaga. Ka nakai gahua tokoua au mo e taane haaku, kua tuga e tau tagata tokoua noa ni ne nonofo he taha e fale, ti ko e lekua mogoia ka taute e tau fifiliaga aoga lahi.”​—Alexandra.

MANAMANATU HIFO

• Onoono nakai au ke he tupe ne moua e au ko e “haaku oti”?

• Ke moua e okioki mitaki, lata nakai au ke nofo kehe mai he hoa?

• Fakamamao nakai au mai he tau magafaoa he hoa haaku pete he tata a ia ki a lautolu?

TUTALA MO E HOA HAAU

• Ko e (tau) vala fe he fakamauaga ha taua ne kua gahua mitaki ki a taua?

• Ko e (tau) vala fe kua lata a taua ke fakaholo ki mua?

• Ko e heigoa e tau lakaaga ka taute e taua ke fakaholo ki mua e agaaga he gahua tokoua?

TAU PUHALA

• Manamanatu ke he pelē tenisi, ko mua he tau faahi kehekehe he nete. Ko e heigoa e tau lakaaga aoga ke taute e koe ke fakalataha mo e hoa haau ke maeke a mua ke haia tokoua he taha e kau?

• He nakai manamanatu, ‘Maeke fēfē au ke mua?’ ka e manamanatu ‘Maeke fēfē a maua ke mua tokoua?’

“Tiaki e manatu ko hai ne hako mo e ko hai ne hepe. Nakai aoga e mena ia ke moua e mafola mo e kaufakalataha he fakamauaga haau.”​—Ethan.

MATAPATU FAKAAKOAGA HE TOHI TAPU: “Aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.”​—Filipi 2:3, 4.