Na ya kpale ti ngaso ko, bombi tɛ awakristo na bangɔ libala tɛ lo ti uzu ya, akpi na ngoi mɛ lo du na wali mɛndɛ̃, wa libala tɛ lo ti fãnani adu libala mɛ leta aye lo ni. Ti nɛngɔ ya, e hĩnga nda mɛ e tɛnɛ ngaso ko, zia e ba tɛnɛ mɛndó Yezo tɛnɛ na omɛ aba hongɔ libala nga na lingɔ libala fãni mɛndɛ̃.

Na bangɔ Matie 19:9, Yezo kambisandó yangondo ye kɔi mɛ Ngbangɔ zi lége hɛ̃ zo na lo ni, mɛ alengbi ti lingɔ ya, lo ho libala tɛ lo ná ya lo. Lo pandó ya: “Mbi pa hɛ̃ ĩ ya, se ta wali ati kɔmbɛ ma, [wa] kɔ lo azia lo, adu na wali mɛ ndɛ̃ ko, kɔli niko ati kɔmbɛ.” Na lége ti tɛnɛ tɛ Yezo e gbɔ̃ nda atɛnɛ sɛ: ti (1) tingɔ kɔmbɛ la adu ye kɔi mɛ Ngbangɔ zi lége na lo ni, ti nɛngɔ ya, zo ho libala tɛ lo ná ya lo, wa ti (2) se kɔli aho libala tɛ lo ná ya na lo, na lo ti aye mɛndɛ̃ mɛ ta Ngbangɔ tɛnɛ ni ma ko, kɔli niko ati kɔmbɛ. *

Tɛnɛ tɛ Yezo afa ya, Ngbangɔ zi lége hɛ̃ kɔli mɛ ati kɔmbɛ wa lo ho libala tɛ lo ná ya lo ya, lo du na wali mɛndɛ̃? Ta seni la ma. Se kɔli bere wali ati kɔmbɛ ko, zo ko la ta ati kɔmbɛ ma, alengbi ti mungɔ ekateli ti kangɔ lɛ lo na ndo siɔ kpale tɛ fɔ̃ lo bere ta lo ka lɛ lo na ndo ni ma. Se du ya, kɔi kɛ̃ kangɔ lɛ lo na ndo siɔ kpale tɛ fɔ̃ lo, wa ala ho libala tɛ la ka gbɛlɛ leta ko, ala zu sɛ alengbi ti lingɔ libala mɛndɛ̃.

Ngoi mɛndɛ̃, wali lengbi ti tɛnɛngɔ hɛ̃ kɔ lo ya, ni ye kangɔ lɛ ni na ndo siɔ kpale tɛ lo ti nɛngɔ ya, ani bata libala tɛ ani. Wa ye mɛ na lingɔ tɛrɛ lo se du ya, kɔli mɛ wa tingɔ kɔmbɛ akɛ̃ dangɔ bɛ tɛ ya lo, wa lo gwe lo ho libala ka tɛ leta na ndenge tɛ lo nɛ? Na lo mɛ ya, lo ye kangɔ lɛ lo na ndo siɔ kpale tɛ kɔ lo ti nɛngɔ ya, lo bata libala tɛ la ko, ta Ngbangɔ zi lége hɛ̃ kɔli niko ti nɛngɔ ya, lo du na wali mɛndɛ̃ ma. Se du ya, kɔli niko amu bo ekateli ti dungɔ na wali mɛndɛ̃, abɛse ta Ngbangɔ zi lége hɛ̃ lo ma ko, lo di lo ti kɔmbɛ fãni mɛndɛ̃, wa lo na lingɔ Kɔmite fãni mɛndɛ̃ ti nɛngɔ ya abiazi aba kpale tɛ lo.​—1 Kɔr. 5:1, 2; 6:9, 10.

Se du ya, kɔli kɔi du na wali mɛndɛ̃, kanda ta Ngbangɔ zi lége hɛ̃ lo ti dungɔ na wali mɛndɛ̃ ma ko, ngasia la bombi tɛ awakristo alengbi ti bangɔ libala tɛ lo ti uzu nga na ti fãnani nɛ? Na bangɔ Ngbangɔ, libala tɛ lo ti uzu adɛ bo da? Wali ko la ta lo ti kɔmbɛ ma, lo lengbi ti mungɔ ekateli ti kangɔ lɛ lo na ndo siɔ kpale tɛ kɔ lo bere kɛ̃ngɔ kangɔ lɛ lo na ndo ni? Elengbi ti bangɔ libala ti fãnani mɛ kɔli niko ali ya, adu libala ti kɔmbɛ?

Ndó gã, bombi tɛ awakristo ndo hũndó libala niko ti fãnani ya, adu libala ti kɔmbɛ, se du ya, wali mɛ ta ali siɔ kpale ma adɛ lɛ lo ngɛ̃́, ta lo du na kɔli mɛndɛ̃ ma, wa ta lo li nga pite ma. Kanda, kaya tɛnɛ mɛndó Yezo tɛnɛ na omɛ aba libala nga na hongɔ libala ko, ta lo tɛnɛndó tɛnɛ tɛ zo mɛ ta lo li siɔ kpale ma, ma. Lo pa bondó ya, kɔli ko la aho libala tɛ lo ná ya lo, ta na landangɔ tɛnɛ mɛ Ngbangɔ tɛnɛ ma, wa lo du na wali mɛndɛ̃ ko, lo ti kɔmbɛ. Na ya kpale ti ngaso, hongɔ libala nga dungɔ na wali mɛndɛ̃ (mɛ Yezo tɛnɛ ya, adu tingɔ kɔmbɛ), ali ya libala tɛ lo ti uzu awɛ.

 Se du ya, kɔli ho libala tɛ lo ná ya lo na ndo ngunu ta na tina mɛ Ngbangɔ ye ma, wa lo du na wali mɛndɛ̃ ko, ta tina di dɛ da ma ya, ya lo mɛ ta ali ye kɔi ma aka lɛ lo na ndo siɔ lo tɛ lo bere akɛ̃ kangɔ lɛ lo na ndo siɔ kpale tɛ lo ma. Na lo ni la, ta lo lengbi ti mungɔ ekateli niko ti ngbondoni ma. Na lo ni la, abɛse ta wali ti uzu akpi ma, ta lo du na kɔli mɛndɛ̃ ma, bere ta lo li pite ma ko, ta ni la alengbi ti lingɔ ya, azi ti ya bombi aba libala tɛ kɔli niko ti fãnani ya, adu ti kɔmbɛ ma. *

Na ya ndakisa mɛ e lo ti bangɔ ni ko, kɔli ti kɔmbɛ, wa lo ho libala tɛ lo ná ya lo na ndo ngunu. Wa se du ya, ta kɔli ti kɔmbɛ ma, wa lo ho bo libala tɛ lo ná ya lo, lo du na wali mɛndɛ̃ mɛ? Bere ta lo li pite uzu ti lo hongɔ libala ma, kanda lo li ni na gesi, wa lo du na wali mɛndɛ̃ na ngoi mɛ ya lo na gwɛ̃ ti kangɔ lɛ lo na ndo siɔ kpale tɛ lo mɛ? Na ya akpale niko zu, hongɔ libala nga lingɔ libala mɛndɛ̃ mɛ adu tingɔ kɔmbɛ na lingɔ ya, libala ti uzu awɛ. Libala tɛ lo ti sɛ adu libala mɛ leta aye ni. Nga ma se mɛ Linɔngi ti Sinzili ti 15/02/1980, pajɛ 32 na français atɛnɛ na ni, “Na lo mɛ ya, lo li libala ná zo mɛndɛ̃ wɛ ko, ta lo lengbi ti diringɔ fãni mɛndɛ̃ ná ya lo ti uzu ma; libala tɛ la akpi wɛ.”

Ta gbinyangbingɔ ti kpale mɛ alengbi ti tongɔ awakristo ya, ala hũ ya, ta libala di dɛ santo ma bere ta tingɔ kɔmbɛ adi dɛ kota siɔ kpale ma. Zo ko la aho libala tɛ lo ná ya lo ta na lo ti ye mɛ Ngbangɔ ahɛ̃ lége ma, wa lo du na wali mɛndɛ̃ ko, lo na lingɔ Kɔmite na lo ti tingɔ kɔmbɛ. (Se du ya, wali ti sɛ mɛ lo du na ni, lo nga Tɛmwɛ tɛ Yehova ko, lo nga na lingɔ Kɔmite na lo ti tingɔ kɔmbɛ.) Abɛse du ya, ta elengbi ti bangɔ libala tɛ lo ti fãnani mabere libala ti kɔmbɛ ma ko, ta nyita kɔli niko alengbi ti luangɔ akumba ti kotani kaya bombi ma na pɛ abulu gba nvɛ̃ni, nga ngoi zu ko la siɔ kpale tɛ lo adɛ gia bingangɔ li tɛ azi mɛndɛ̃, wa ala ndo hũ lo ya, lo du siɔni. Uzu ti nɛngɔ ya, lo lua kumba ge ya bombi ko, abiazi na bangɔ nzɔ̃ni nvɛ̃ni kpale ti ya dungɔ lɛ ngɛ̃́ tɛ wali mɛndó lo zia lo, mɛ ngoi mɛndɛ̃ lo lindó kpale tɛrɛ lo na poloso, nga na kpale ti dungɔ lɛ ngɛ̃́ tɛ ayangambi mɛndó ngoi mɛndɛ̃ lo zia ala na ngoi mɛndó ala dɛ ayangambi yakere nvɛ̃ni.​—Mal. 2:14-16.

Na bangɔ akpale ti pɛnɔ mɛ hongɔ libala na sãna, ta na landangɔ ndia ti ya Ngbangɔ ma, nga na dungɔ na wali mɛndɛ̃ ndo si na ni ko, ayɔ ya, awakristo aba akpale nga ma se mɛ Yehova ndo ba na ni, wa ala mu libala ya, adu santo.​—Mos. 5:4, 5; Aeb. 13:4.