Inga Zvapupu Zva Jehovha, tinovangisira kuti tipone mukuzwirana no zvakajijisa Jesu zve no zvaiitwa ngo vapostori. Divi iri rinonasa kukhombija zvatinotenda.

1. Mwari. Tinonamata Mwari umwe wokadi, Musiki wo zvese, zina rake ndi Jehovha. (Nduyo 83:18,Shanduro yeNyika Itsva; Apokalipsi 4:11) Iyena ndi Mwari wa Abhirahama, Mosi, na Jesu.—Exodo 3:6; 32:11; Johani 20:17.

2. Bhaibheri. Itusu tinotenda kuti Bhaibheri mazwi akafemehwa ndi Mwari kuitira vandhu. (Johani 17:17; 2 Timoti 3:16) Zvatinotenda zvakacijikira mumabhuku anokwana makumatandhatu na tandhatu o Bhaibheri, anobatanija “Citenderano co Kare” no “Citenderano Cipsa.” Prosori Jason David BeDuhn wakazvinanga paakatara ngo pamusoro po Zvapupu zva Jehovha eciti “zvavanotenda no zvavanoita zvinovha mu Bhaibheri zve avacinji zvarinonanga kuti zvizwirane no zvavanoda.” *

   Tinotenda zvese zvakatahwa mu Bhaibheri. Asi tinoziva kuti zvimweni zvarinonanga zvakatahwa kuitira kuezanisira.​—Apokalipsi 1:1.

3. Jesu. Tinotevejera zvakajijiswa ndi Jesu Kristu no muezaniso wake. Tinotenda kuti iyena muponesi wedu zve Mwana wa Mwari. (Mateu 20:28; Maitiro o Vapostori 5:31) Ngokudaro, tiri maKristu. (Maitiro o Vapostori 11:26) Takajija muBhaibheri kuti Jesu asipi Mwari womasimba ese, kana kuti Bhaibheri aribeseri jijiso yo Utatu.​—Johani 14:28.

4. Umambo hwa Mwari. Asipi zviri mu mwoyo mo maKristu, asi Umambo wokadi uri kudenga. Umambo uu unozofakeya utongi wese wo vandhu zve unozoita kuti cinangwa ca Mwari ciitike pasi pano (Danieli 2:44; Mateu 6:9, 10) Izvi zvinozoitika sambi-sambi, inga zvinonanga Bhabheri tiri kurarama mu “njiku jokupejisira.”​—2 Timoti 3:1-5; Mateu 24:3-14.

   Jesu ndi Mambo wo Umabo hwa Mwari uri kudenga. Iyena wakatanga kutonga mu gore ra 1914.​—Apokalipsi 11:15.

5. Ruponeso. Muripo wa Jesu unotiita kuti tisujunyuhwe mucishaishi no rufu. (Mateu 20:28; Maitiro o Vapostori 4:12) Kuitira kubesereka ngo muripo uu, mundhu anodikana kuva no rutendo na Jesu, wocinja mugariro wo upenyu wake zve obhabhatijwa. (Mateu 28:19, 20; Johani 3:16; Maitiro o Vapostori 3:19, 20) Zviito zvinokhombija kuti uno rutendo wakavanga (Jakobo 2:24, 26) Ruponeso ahutengwi—tinouwana basi ngo “unyaxa hwa Mwari.”—VaGalàsia 2:16, 21.

6. Denga. Jehovha Mwari, Jesu Kristu no ngirozi jakagodeka vonogara kudenga. * (Nduyo 103:19-21; Maitiro o Vapostori 7:55) Vandhu vanokwana kuita 144,000—ndivona vanozomuswa kuti vaende kudenga kotonga na Jesu mu Umambo.​— Danieli 7:27; 2 Timoti 2:12; Apokalipsi 5:9, 10; 14:1, 3.

7. Nyika. Mwari wakasika nyika kuti igahwe ngo vandhu nokucingaperi. (Nduyo 104:5; 115:16; Mucumaeri 1:4) Mwari anozokomborera vandhu vanomuzwira, vanozova no uhomi hwaushoni muparadhiso pasi pano.​—Nduyo 37:11, 34.

8. Ushati no Matambujiko. Pakapanduka imwe ngirozi ya Mwari, ushati no matambujiko zvakatanga pasi pano. (Johani 8:44) Pakupera kupanduka, ngirozi iyi yakapuwa zina rokuti “Sathana” kana kuti “Dhiyabho,” iyona yakacengeja varovorani vokutanga kuti vabatane naye, izvi zvakabara matambujiko kumubarihwana wa Adhamu. (Genesi 3:1-6; VaRoma 5:12) Ngo cinangwa cokuda kutonga zvese zvakaithwa ndi Sathana, Mwari ari kutendera ushati no matambujiko zveciitika, asi aazozvitenderi mbhera narini.

9. Rufu. Vaya vakafa avacipozve. (Nduyo 146:4; Mucumaeri 9:5, 10) Ivona avapiswi mugomba romuriro.

   Mwari anozomusa mamiriyau no mamiriyau o vandhu vakafa. (Maitiro o Vapostori 24:15) Pakupera korumuko, vaya vonoramba kuita zvinoda Mwari vanozourawa nokucingaperi zve avazovizve no vetero yorumuko.—Apokalipsi 20:14, 15.

10. Mbhuri. Tinotevejera mavonero a Mwari ngo pamusoro po mucadho, pa kubatana ko mwarume umwe no mwanakaji umwe, kuita upombo nga rimwe thangwe ringaita kuti vakarovona varambane. (Mateu 19:4-9) Tinocokwadi cokuti uzivi unowanika muBhaibheri unobesera mbhuri kuti jibudirire.—VaEfeso 5:22–6:1.

11. Manamatiro Edu. Atinamati cipambhano nee cithombi. (Deuteronòmio 4:15-19 1 Johani 5:21) Vonanyi zvatinoshandisa pakunamata kwedu:

    • Kuita mukumbiro kuna Mwari.—VaFilipi 4:6.

    • Kuverenga no kujija Bhaibheri.​—Nduyo 1:1-3.

    • Kurangarijisisa zvatinojiija muBhaibheri.​—Nduyo 77:12.

    • Kusongana pamwepo kuti tiite mukumbiro, kujija Bhaiibheri, kuimba, kubhuya ngo pamusoro po zvatinotenda zve kuvangisana umwe no umweni.—VaKolosi 3:16; Vaheberi 10:23-25

    • Kucumaera ‘vhangeri ro Umambo.’—Mateu 24:14.

    • Kubesera vanotambujika.​—Jakobo 2:14-17.

    • Kuvaka nokunajirira Nyumba jo Umambo no ndau jimweni jinoshandiswa pa kuita basa ro munyika yese rokujjisa Bhaibheri.—Nduyo 127:1.

    • Basa redu ro kubesera vaya vanonga vahwihwa ngo ngozi.​—Maitiro o Vapostori 11:27-30.

12. Sangano Redu. Takarongwa ngo ungano, ungano imwe nga imwe inoimirihwa ngo vakuru. Vakuru ava asipi mapastori zve avapagahwi mare (Mateu 10:8; 23:8) Atipagari cogumi, atifambisi paratu kuti idihwe mare pamusongano jedu. (2 VaKorinto 9:7) Mabasa edu akacijikihwa ngo zvipo zvo kuzvipira zve apana anoimirira kuti ndiyani acizivi kubhisa.

    Mukhumbi Unotonga, cikwata cidoko co maKristu akaivha kudivi ro kumujimu, anopekeja ndhungamiriro jecivha kucine kuitira Zvapupu zva Jehovha.—Mateu 24:45

13. Kubatana Kwedu. Tinotenda zvakaezana kutenderera nyika yese. (1 VaKorinto 1:10) Tinoshanda ngo simba kuti titame kuva no mukheto wo mavhumbo, majinja, ndumi no divi ro kunyama. (Maitiro o Vapostori 10:34, 35; Jakobo 2:4) Pikija takabatana, umwe na umwe wedu ano citendehwa cokukheta zvaanoda. Ecishandisa hana yake yakarovejwa ngo Bhaibheri.​—VaRoma 14:1-4; Vaheberi 5:14.

14. Mararamiro Edu. Tinoita zvese zvatinokwanisa kuti tikhombije rudo wokadi pa zvese zvatinoita. (Johani 13:34, 35) Atiiti zviro zvicingadiwi ndi Mwari, zvakadari inga kudihwa ngazi. (Maitiro o Vapostori 15:28, 29; VaGalàsia 5:19-21) Tinoda rugarisiko asi atighwiniri zvohondo. (Mateu 5:9; Isaia 2:4) Tinoreremeja utongi no mutemo javo kudari jicingahwisani no mutemo ya Mwari.—Mateu 22:21; Maitiro o Vapostori 5:29.

15. Mavonero Atinoita Vamweni. Jesu wakati: “Unozodisa mudoni wako no madisiro o unojiita iwewe.” Jesu wakanangazve kuti maKristu ‘aiti divi ro nyika ino’ (Mateu 22:39; Johani 17:16, BMAA) Pikija ticikanghwiniri mu matongero o nyika ino pomwe no kubatana no zviara, itusu tinoeja kuita ‘zvaushoni ku vandhu vese’. (VaGalàsia 6:10; 2 VaKorinto 6:14) Tinoreremeja zvivaringo zvo vamweni pa shwiro iji.—VaRoma 14:12

Kudari muno muvhunjo uri wese ngo pamusoro po zvitendhwa zvo Zvapupu zva Jehovha, mungaverenga zvizinji mu websaite yedu, kutarira imwe yo hofisi yedu, kwenda kumusongano pa Nyumba yo Umambo iri phedo no kwamunogara kana kubhuya na umwe wo Zvapupu zva Jehovha phedo no pamunogara.